នៅថ្ងៃទី១៥ ខែវិច្ឆិកា ឆ្នាំ២០១៩នេះ ឯកឧត្តម គុជ លីណា អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប តំណាងឯកឧត្តម ទៀ សីហា ប្រធានគណៈកម្មាធិការសាខា បានដឹកនាំក្រុមប្រតិបត្តិសាខា និងអនុសាខាកាកបាទក្រហមកម្ពុជា ស្រុកអង្គរជុំ ខេត្តសៀមរាប បាននាំយកបច្ច័យរួម និងទេយ្យវត្ថុមួយចំនួន ចូលរួមរំលែកមរណទុក្ខគ្រួសារសពលោក យ៉ា ប៊ាន ប្រធានក្រុមអ្នកស្ម័គ្រចិត្តកាកបាទក្រហមកម្ពុជា ឃុំតាសោម ស្រុកអង្គរជុំ ដែលរងគ្រោះថ្នាក់ចរាចរណ៍កាលពីសប្តាហ៍មុន ហើយបានទទួលមរណៈភាពកាលពីថ្ងៃទី១៤ ខែវិច្ឆិកា ឆ្នាំ២០១៩ម្សិលមិញនេះ។
ក្នុងឱកាសចូលរួមរំលែកទុក្ខដ៏ក្រៀមក្រំនេះ ឯកឧត្តម គុជ លីណា បាននាំយកប្រសាសន៍ពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ដែលជាការចូលរួមរំលែកទុក្ខ និងសោកស្តាយជាទីបំផុត ជាមួយក្រុមគ្រួសារសព។ ការបាត់បង់លោក យ៉ា ប៊ាន គឺជាការបាត់បង់នូវធនធានមនុស្សដ៏សំខាន់ ក្នុងការគាំទ្រដល់សកម្មភាពមនុស្សធម៌ក្នុងស្រុកអង្គរជុំ ។
ទន្ទឹមនោះ បច្ច័យដែលបាននាំយកទៅនាពេលនោះមានចំនួន ៤លានរៀល និងទេយ្យវត្ថុមាន អង្ករ១០០គីឡូក្រាម មុង១ ភួយ១ សារុង១ ក្រមា១ មី១កេស ត្រីខ១យួរ ទឹកបរិសុទ្ធ៤កេស។
អត្ថបទ និងរូបភាព៖ លោក អ៊ិន សីហរិទ្ធ
កែសម្រួលអត្ថបទ៖ លោក សេង ផល្លី
