តាមរយៈកិច្ចព្រមព្រៀងរវាងអាជ្ញាធរជាតិអប្សរាជាមួ យនិងសាកលវិទ្យាល័យសូហ្វយ៉ាប្រទេសជប៉ុន ការជួសជុលស្ពានហាលប្រាសាទអង្គរវត្តមានរយៈពេល៥ឆ្នាំ (២០១៥-២០២០) និងគ្រោងបញ្ចប់ជាស្ថាពរនៅពាក់កណ្តាលឆ្នាំ២០២០។
ប៉ុន្តែភាពជាក់ស្ដែង ការជួសជុលស្ពានហាលខាងលិចប្រាសាទអង្គរវត្តដំណាក់កាលទី២ ដែលគ្រោងនឹងបញ្ចប់នៅក្នុងឆ្នាំ២០២០ អាចនឹងត្រូវពន្យាពេលដោយមូលហេតុបច្ចេកទេសចាំបាច់មួយចំនួន។
តាមការលើកឡើងរបស់ មន្ត្រីបច្ចេកទេសប្រចាំការដ្ឋានជួសជុលស្ពានហាលខាងលិចប្រាសាទអង្គរវត្តនៃនាយកដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការ លោក អន សុភាព បាននិយាយថា តាមលទ្ធផលជាក់ស្តែងការជួសជុលអនុវត្តបានត្រឹមតែ១៥%ប៉ុណ្ណោះ ព្រោះយើងបានចំណាយពេលវេលាច្រើនលើការងារស្រាវជ្រាវ និងវិភាគបច្ចេកទេស ដូចជារចនាសម្ពន្ធនិងសម្ភារៈសំណង់ ស្ថានភាពនៃការខូចខាតរបស់ថ្ម គុណភាពថ្ម ស្ថានភាពដីដែលបង្ហាប់នៅក្នុងស្ពានហាល និងលទ្ធផលពិសោធលើការបុកបង្ហាប់ដីសាកល្បងចំនួន១០ម៉ែត្របានជោគជ័យ។
ព័ត៌មានជាតិ ថ្មីៗ
មន្ត្រីបច្ចេកទេសរូបនេះ បានពន្យល់បន្ថែមថា ការជួសជុលលើកទី២នេះ គឺមានការខុសប្លែកពីការជួសជុលនៅសម័យបារាំង និងការជួសជុលក្នុងដំណាក់កាលទី១ ដោយក្រុមអ្នកជំនាញផ្នែកអភិរក្សរបស់អាយស៊ីស៊ី-អង្គរ បានតម្រូវមិនឱ្យមានការរុះរើជញ្ជាំងស្ពានថ្មបាយក្រៀមនេះឡើយ ដោយត្រូវរក្សាស្លាកស្នាមនៃការជួសជុលនៅក្រោយសម័យអង្គរទុកជាប្រវត្តិសាស្ត្រ ថ្វីត្បិតតែរចនាសម្ព័ន្ធសំណង់ស្ពាននេះមានការខូចខាតខ្លាំងក៏ដោយ។
ចំពោះការជួសជុលដែលលំបាកបំផុតដល់ក្រុមការងារជួសជុលនោះ លោក អន សុភាព បញ្ជាក់ថា គឺការស្រាវជ្រាវរកវិធីសាស្ត្រ គ្រប់បច្ចេកទេស ដើម្បីទប់ពង្រឹងរចនាសម្ព័ន្ធសំណង់ប្រកបដោយគុណភាពខ្ពស់ ហើយមិនប៉ះពាល់ដល់សំណង់ស្ពានចាស់ ដែលទ្រុឌទ្រោមខូចខាតដោយសារអាយុកាលនៃវត្ថុធាតុដើម ការត្រាំក្នុងទឹកជាប្រចាំ។ ហើយការងារនេះ ក្រុមការងារជំនាញ ចាំបាច់ត្រូវរក្សាភាពដើមនៃសំណង់បុរាណឱ្យបានច្រើនបំផុត ដោយប្រើបច្ចេកទេសនិងសម្ភារៈទំនើបខ្លះ លាយនឹងបច្ចេកទេសបុរាណ ដើម្បីពង្រឹងរចនាសម្ព័ន្ធសំណង់ឱ្យជាប់មាំបានល្អ។
អត្ថបទ និងរូបភាព៖ លោក អ៊ិន សីហរិទ្ធ
កែសម្រួលអត្ថបទ៖ លោក សេង ផល្លី
