ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានមានប្រសាសន៍ថា រដ្ឋបាលខេត្តសៀមរាប នៅតែស្វាគមន៍ការវិនិយោគផ្ទាល់ពីបរទេស ប៉ុន្តែយើងក៏ចង់ឃើញវិនិយោគិនខ្មែរងើបឡើងកាន់តែច្រើន នៅក្នុងបរិយាកាសប្រកួតប្រជែងមួយប្រកបដោយការស្មើភាព និងយុត្តិធម៌រវាងអ្នកនៅក្នុងស្រុក និងអ្នកមកពីក្រៅស្រុក ដូច្នេះ សូមឲ្យនិស្សិត យុវជន និងសហគ្រិន ព្រមទាំងម្ចាស់សហគ្រាសធុនតូចនិងមធ្យមទាំងអស់ ត្រូវតែមានសមត្ថភាពខ្ពស់ ក្នុងការចាប់យកបច្ចេកវិទ្យាមកប្រើប្រាស់ក្នុងអាជីវកម្មរបស់ខ្លួនថែមទៀត និងត្រូវលប់បំបាត់នូវផ្នត់គំនិតមិនល្អមួយចំនួន ដូចជា៖ ការធ្វើអាជីវកម្មតាមគេតាមឯង ដោយមិនមានការសិក្សាទីផ្សារច្បាស់លាស់ និងការប្រែក្លាយពីការគ្រប់គ្រងតាមបែបគ្រួសារ មកជាការគ្រប់គ្រងតាមបែបអាជីវកម្មវិញ ខណៈដែលកម្ពុជាត្រូវការសហគ្រិនចំណានៗ ថែមទៀត ដើម្បីជួយជំរុញដល់ការអភិវឌ្ឍប្រទេសជាតិ ឱ្យមានការឈានឡើង ជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០ ។
ឯកឧត្តម ទៀ សីហា មានប្រសាសន៍បន្ថែមថា ក្រៅពីនេះ យើងក៏នឹងកសាងនូវប្រព័ន្ធអេកូឡូស៊ីមួយ ដែលកាន់តែមានភាពអនុ គ្រោះថែមទៀត ដើម្បីលើកកម្ពស់បរិយាកាសប្រកួតប្រជែង ដែលធានាដល់ការលូតលាស់នៃសហគ្រិន តាមរយៈក្របខ័ណ្ឌច្បាប់ចាំបាច់មួយចំនួន ដូចជាច្បាប់ក្ស័យធន ច្បាប់ប្រកួតប្រជែង និងការពារកម្មសិទ្ធិបញ្ញាជាដើម ដូច្នេះ តាមរយៈវេទិកាទិវាសប្តាហ៍ សហ គ្រិនភាពពិភពលោក- កម្ពុជា ឆ្នាំ២០១៩ នៅខេត្តសៀមរាបនាពេលនេះ គឺពិតជាបានឆ្លើយតប ដល់អ្នកបង្កើតគំនិតថ្មី និងអ្នកដែលបានចែករំលែកបទពិសោធន៍ ជោគជ័យក្នុងពិភពលោក សម្រាប់យុវជនជំនាន់ក្រោយ បានយកមកអនុវត្តន៍លើមុខរបររបស់ខ្លួន។
ឯកឧត្តម ទៀ សីហា មានប្រសាសន៍យ៉ាងដូច្នេះ ក្នុងឱកាសអញ្ជើញជាអធិបតីក្នុងវេទិកាទិវាសប្តាហ៍សហគ្រិនភាពពិភពលោក- កម្ពុជា ឆ្នាំ២០១៩ ដែលរៀបចំធ្វើឡើងនៅសណ្ឋាគារ សុខា ខេត្តសៀមរាប នាព្រឹកថ្ងៃទី១៨ ខែវិច្ឆិកា ឆ្នាំ២០១៩ រួមជាមួយនឹងឯកឧត្តម ហេង សុខគង់ រដ្ឋលេខាធិការ ក្រសួងឧស្សាហកម្ម និង សិប្បកម្ម ដោយមានអ្នកចូលរួមជាង ៦០០នាក់ ដែលភាគច្រើនជាសិស្ស និស្សិត យុវជន និងសហគ្រិន មកពីក្រុមហ៊ុនផ្សេងៗ និង មន្ត្រីអ្នកមុខអ្នកការនៅក្នុងខេត្តសៀមរាប រាជធានីភ្នំពេញ និងតាមបណ្ដាខេត្តមួយចំនួនទៀតផង ដោយមានការឧបត្ថម្ភពីមូលនិធិ ស.អ យូអិនឌីភី (UNDP) និង អង្គការ Konrad-Adenauer-Stiftung ប្រចាំនៅកម្ពុជា និងដៃគូជាច្រើនទៀត ហើយទទួលបានការគាំទ្រពីក្រសួងពាក់ព័ន្ធរួមមានក្រសួងប្រៃសណីយ៍ និង ទូរគមនាគមន៍ ក្រសួងអប់រំយុវជន និងកីឡា ក្រសួងសេដ្ឋកិច្ច និងហិរញ្ញវត្ថុ ក្រសួងការងារ និងបណ្តុះបណ្តាលវិជ្ជាជីវៈ និងក្រសួងពាណិជ្ជកម្ម។
ឯកឧត្តម ហេង សុខគង់ រដ្ឋលេខាធិការ ក្រសួងឧស្សាហកម្ម និង សិប្បកម្ម មានប្រសាសន៍ថា អត្ថប្រយោជន៍នៃការប្រើប្រាស់ទូរស័ព្ទដៃ គឺជាជំហានដំបូងនៃការឈានឆ្ពោះទៅរក បច្ចេក វិទ្យាឌីជីថល និងបដិវត្តឧស្សាហកម្មជំនាន់ទី៤ ដែលក្នុងទូរស័ព្ទស្មាតហ្វូន មានបំពាក់ប្រព័ន្ឋបញ្ញាសិប្បនិមិត្ត(AIអេអាយ) ៗជានិមិត្តរូបដ៏សំខាន់នៃបច្ចេកវិទ្យាឧស្សាហកម្មជំនាន់ទី៤ ដែលជាយុគសម័យប្រើប្រាស់នូវប្រព័ន្ឋបញ្ញាសិប្បនិមិត្តដែលបញ្ញាសិប្បនិមិត្តនេះបានមកពីទិន្នន័យនៃការប្រើប្រព័ន្ឋទំនាក់ទំនងផ្សេងៗតាមទូរស័ព្ទស្មាតហ្វូន ដែលត្រូវបានរក្សាទុកនៅក្នុងលំហ ហើយគេទាញយកទិន្នន័យទាំងនោះយកមកបញ្ចូលក្នុងម៉ាស៊ីននិងបង្កើតជាបណ្តុំអង្គចងចាំថ្មី ដើម្បីឱ្យវាក្លាយទៅជាបញ្ញាសិប្បនិមិត្តដែលមានភាពឆ្លាតវៃ រួចដាក់បញ្ចូលទៅក្នុងគ្រឿងយន្ត មនុស្សយន្ត ជាដើមសម្រាប់បំរើការងារដល់មនុស្ស។
ឯកឧត្តម ហេង សុខគង់ មានប្រសាសន៍បន្ថែមថា៖នៅឆ្នាំ២០១០ ពេលដែលឧស្សាហកម្មជំនាន់ទី៤ចាប់ផ្តើម នៅប្រទេសមួយចំនួននៅក្នុងតំបន់អាស៊ានបានកំណត់យកយុទ្ឋសាស្ត្រប្រទេសវៃឆ្លាត (Make Singapor 4.0)ជាដើម ប៉ុន្តែកម្ពុជាបានយកប្រធានបទ Digital Cambodia ដែលនឹងបើកឱ្យដំណើរការនៅឆ្នាំ២០២៣ ប៉ុន្តែមុននឹងចាប់ផ្តើមដំណើរការ កម្ពុជាត្រូវការនូវធនធានមនុស្សដែលមានការអភិវឌ្ឍនិងប្រឹងប្រែងកសាងសមត្ថភាពខ្លួនដើម្បីដើរឱ្យទាន់ទៅនឹងបរិប័ទនៃបដិវត្តឧស្សាហកម្ម៤,០ និងក៍ដើម្បីរក្សាបានលំនឹងនូវមុខរបរ អាជីវកម្មនិងការងារតាមបណ្តាក្រុមហ៊ុន សហគ្រាសផ្សេងៗក៍ដូចជាខ្លួនឯងផ្ទាល់ផងដែរ ចៀសវាងនូវការបាត់ បង់ឱកាសការងារ បាត់អាជីពនិងបាត់មុខរបរឬក្ស័យធនដោយមិនបានត្រៀមខ្លួនជាមុននៅពេលឧស្សហកម្មជំនាន់ទី៤ ជឿន លឿនដល់កម្រិតដោយយើងមិនបានអភិវឌ្ឍសមត្ថភាពចំណេះដឹងឱ្យបានទាន់ពេលវេលា។
សូមរំលឹកខ្លីថា៖បដិវត្តឧស្សាហកម្មជំនាន់ទី១ បានកើតឡើងនៅសតវត្សទី១៨ ជាយុគសម័យប្រើប្រាស់ថាមពលដោយចំហាយទឹក , បដិវត្តឧស្សាហកម្មជំនាន់ទី២ បានកើតឡើងនៅអំឡុងសតវត្ស ទី២០ ជាយុគសម័យប្រើប្រាស់ថាមពលដើរដោយអគ្គីសនីនិងអេឡិកត្រូនិក រីឯបដិវត្តឧស្សាហកម្មជំនាន់ទី៣កើតឡើងនៅដើមសតវត្សទី២១ ដោយការប្រើប្រាស់ប្រព័ន្ឋបច្ចេកវិទ្យាព័ត៌មានវិទ្យា (អាយធី) និង បដិវត្តឧស្សាហកម្មជំនាន់ទី៤ បានកើតឡើងនៅក្នុងឆ្នាំ២០១០ជាយុគសម័យប្រព័ន្ឋឌីជីថល ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
