ក្រមាខ្មែរ ដែលបានរចនាម៉ូតនៅទីក្រុងប៉ារីស ប្រទេសបារាំង និងត្បាញដោយដៃដោយជនជាតិខ្មែរ ត្រូវបានយកមកតាំងបង្ហាញក្នុងពិព័រណ៍មួយ ឈ្មោះថា “Woman’s Tales” នៅសណ្ឋាគារសូហ្វីថែលភូគ្រីត្រា ខេត្ដសៀមរាប នារាត្រីថ្ងៃទី១៦ខែវិច្ឆិកាឆ្នាំ២០១៩។
លោក នាក់ ណេរ៉ុន អភិបាលរង ខេត្ដសៀមរាប បានលើកឡើងថា សិប្បកម្មតម្បាញខ្មែរ មានប្រវត្តិជាយូរលង់ណាស់មកហើយ ដែលគេបានស្រាវជ្រាវដឹងថា បានកកើតដំបូងបង្អស់ក្នុងសម័យហ្វូណនក្នុងទឹកដី ស្ថិតក្នុងស្រុកបាទី ខេត្តតាកែវបច្ចុប្បន្ននេះ។
លោកអភិបាលរងខេត្ត បានបញ្ជាក់ថា សិប្បកម្មតម្បាញ ដើរតួនាទីយ៉ាងសំខាន់ ក្នុងជីវភាពរស់នៅ ក៏ដូចជាវប្បធម៌ប្រពៃណីខ្មែរ។ ក្រណាត់ ក្រមា សំពត់ សូត្រ ហូល និងផាមួង ជាវាយនភណ្ឌប្រពៃណីខ្មែរ ដែលជាស្នាដៃដ៏ប្រពៃ បានបន្សល់ពីមួយជំនាន់ទៅមួយជំនាន់ ដើម្បីឲ្យកូនខ្មែរជំនាន់ក្រោយជួយថែរក្សា និងលើកស្ទួយកេរ្តិ៍មរតកជាតិនេះ ឲ្យបានគង់វង្សជារៀងរហូត។
ជាទូទៅក្រមា នៅក្នុងជីវភាពប្រជាពលរដ្ឋខ្មែរ វាជាសម្ភារប្រើប្រាស់ប្រចាំថ្ងៃ សម្រាប់យកមកគ្របដណ្ដប់ និងប្រើប្រាស់ទៅតាមជីវភាព និងតំបន់នីមួយ។ ដោយឡែក អ្នកខេត្តសៀមរាប តែងនិយមហៅក្រមា ថា “កន្សែង” ជំនួសវិញ។
តាមការឲ្យដឹងពីប្រធានអង្គការកុមារមេគង្គ សមិទ្ធផលក្រមាដាក់បង្ហាញនាពេលនេះ បានត្បាញដោយដៃ នៅស្រុកបន្ទាយឆ្មារ ខេត្តបន្ទាយមានជ័យ។ អ្នកតម្បាយជាស្ត្រីចំនួន ១០០នាក់ ត្រូវបានបណ្តុះបណ្តាលតាំងពីឆ្នាំ២០០១។
ប្រធានអង្គការដដែលនេះ បានបញ្ជាក់ថា ការដាក់តាំងបង្ហាញផលិតផលច្នៃពីសូត្រ និងអំបោះក្នុងពិព័រណ៍មួយនេះ មានគោលបំណងជំរុញដល់សិប្បករខិតខំអភិវឌ្ឍជំនាញពួកគេ និងប្រើប្រាស់វត្ថុធាតុដើមមានគុណភាព និងដើម្បីចូលរួមអភិរក្សជំនាញ និងរចនាតម្បាញខ្មែរផងដែរ។
សូមជម្រាបថា ពិព័រណ៍បង្ហាញក្រមាខ្មែរនេះ រៀបចំដោយ អង្គការកុមារមេគង្គ និងក្រុមហ៊ុនស័រវី ឌុយ មេគង្គ ដែលបានរួមចំណែកយ៉ាងសកម្ម ក្នុងសកម្មភាពមនុស្សធម៌ និងការចូលរួមបណ្តុះបណ្តាលកុមារកម្ពុជា ហើយបានផ្តល់ចំណេះជំនាញវិជ្ជាជីវៈតម្បាញសូត្រ និងផ្តល់ការងារដែលមានស្ថានភាពដល់ស្ត្រីនៅតាមជនបទនេះផងដែរ៕
អត្ថបទ និង រូបភាព ៖ លោក បូ សាវី
កែសម្រួល៖ សេង ផល្លី
