នារសៀលថ្ងៃទី១៨ ខែ វិច្ឆិកា ឆ្នាំ២០១៩ រដ្ឋបាលខេត្តសៀមរាប និង សាលាសណ្ឋាគារ និង ទេសចរណ៍ ប៉ូលឌុយប្រ៊ូល បានចុះហត្ថលេខាលើកិច្ចសន្យា បន្តផ្ដល់ទីតាំង និង អគារនៅលើទីតាំងចាស់ របស់សាលា ដើម្បីបន្តបណ្តុះបណ្តាលជំនាញបដិសណ្ឋារកិច្ច និង ទេសចរណ៍ ដល់យុវជនកម្ពុជា និង ផ្តល់លទ្ធភាពជូនយុវជនខ្មែរ នូវឱកាសការងារ និង អាជីពពិតប្រាកដសម្រាប់អនាគត។
មានប្រសាសន៍ក្នុងឱកាសនោះ ឯកឧត្តម ទៀ សីហា អភិបាលខេត្តសៀមរាប បានធ្វើការសម្តែងនូវអំណរគុណ ចំពោះឯកឧត្តម ប៉ូល ឌុយប្រ៊ូល ប្រធានអង្គការបណ្តុះបណ្តាល និងវឌ្ឍនភាពកម្ពុជា ដែលមិនត្រឹមតែបណ្ដុះបណ្ដាលជំនាញ ពាក់ព័ន្ធនឹងសណ្ឋាគារ និង ទេសចរណ៍ប៉ុណ្ណោះទេ ថែមទាំងមានទឹកចិត្តមនុស្សធម៌ ចំពោះសិស្សក្រីក្រ មកពីបណ្តាខេត្តផ្សេងៗ ក៏ដូចខេត្តសៀមរាបផងដែរ ។
ក្នុងរយៈពេល១៧ឆ្នាំមកនេះ សាលាសណ្ឋាគារ និង ទេសចរណ៍ ប៉ូលឌុយប្រ៊ូល ខេត្តសៀមរាប បានបណ្តុះបណ្តាលសិស្សប្រមាណជាង ៣ពាន់នាក់ និងបានចេញទៅបម្រើការងារនៅតាម ភោជនីយដ្ឋាន សណ្ឋាគារ និង ក្រុមហ៊ុន ព្រមទាំងមួយចំនួនបានយកទៅធ្វើជាអាជីពក្នុងកិច្ចប្រកបការងារចិញ្ចឹមក្រុមគ្រួសារផងដែរ។
ឯកឧត្តម ប៉ូល ឌុយប្រ៊ូល ក៏បានថ្លែងអំណរគុណចំពោះ ឯកឧត្តមអភិបាលខេត្ត និង រដ្ឋបាលសាលាខេត្តសៀមរាប តែងតែធ្វើកិច្ចសហការល្អជាមួយគ្នានាពេលកន្លងមក។ ក្នុងនោះ កិច្ចទំនាក់ទំនងកិច្ចការរដ្ឋបាល និង ការងារសន្តិសុខ សណ្តាប់ធ្នាប់ក្នុងខេត្តសៀមរាប បានធ្វើឲ្យអ្នកវិនិយោគបរទេសមានការជឿជាក់ លើកិច្ចដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រី និងបានធ្វើឲ្យប្រទេសកម្ពុជាទាំងមូល មានការអភិវឌ្ឍន៍លើគ្រប់វិស័យ។
សូមជម្រាបថា ឯកឧត្តម ប៉ូល ឌុយប្រ៊ូល គឺជាបុគ្គល ដែលបានបង្កើតឲ្យមាន សាលាសាលាសណ្ឋាគារ និង ទេសចរណ៍ ប៉ូលឌុយប្រ៊ូល នៅក្នុងខេត្តសៀមរាប និងបានសម្ពោធជាផ្លូវការនៅឆ្នាំ២០០២។
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
