កាលពីថ្ងៃទី១៨ ខែ វិច្ឆិកា ឆ្នាំ ២០១៩ម្សិលមិញនេះ លោក លី សំរិទ្ធ អភិបាលរង នៃគណៈអភិបាលខេត្តសៀមរាប បានអញ្ជើញជាអធិបតី ក្នុងកម្មវិធីបើកការដ្ឋានសាងសង់ផ្ទះចំនួន៩ខ្នង ជូនដល់បងប្អូនប្រជាពលរដ្ឋដែលមានជីវភាពក្រីក្រនៅភូមិសំបួរ ឃុំរើល ស្រុកពួក ដែលជាគម្រោងរបស់អង្គការលំនៅដ្ឋានមនុស្សជាតិកម្ពុជា ដោយមានការអញ្ជើញចូលរួមពីសំណាក់លោកអភិបាល អភិបាលរងស្រុកពួក សមាជិកក្រុមប្រឹក្សាស្រុក មេឃុំ មេភូមិ និង សមាជិកសមាជិកានៃអង្គការលំនៅដ្ឋានជាតិអន្តរជាតិ ដែលមកពីបណ្តាប្រទេសនានាប្រមាណជាង១០០នាក់ ។
មានប្រសាសន៍ក្នុងឱកាសនេះលោក លី សំរិទ្ធ បានថ្លែងអំណរគុណដល់ម្ចាស់គម្រោងដែលជាអង្គការដៃគូ និងសប្បុរសជនជាតិ អន្តជាតិ ដែលបានរួមសហការជាមួយរាជរដ្ឋាភិបាលកម្ពុជា ក្នុងការចូលរួមកាត់បន្ថយភាពក្រីក្រនៅកម្ពុជា សំខាន់បងប្អូនប្រជាពលរដ្ឋនៅតាមតំបន់ជនបទដាច់ស្រយាល ដូចជាសក្ខីភាពនេះស្រាប់ បានឆ្លងកាត់នូវសង្គ្រាមរាំរ៉ៃជាច្រើនទសវត្សកន្លងទៅ ។
លោក លី សំរិទ្ធ មានប្រសាសន៍ទៀតថា ក្រោមគោលនយោបាយឈ្នះ ឈ្នះរបស់សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានធ្វើឲ្យប្រទេសជាតិទទួលបាននូវសុខសន្តិភាព និងមានកិច្ចអភិវឌ្ឍន៍លើគ្រប់វិស័យ ប៉ុន្តែប្រការសំខាន់ ចំពោះបងប្អូនដែលទទួលបានការជួយឧបត្ថម្ភនេះ សូមខិតខំប្រឹងប្រែងក្នុងការប្រកបរបររកស៊ី ដើម្បីធ្វើឲ្យជីវភាពរបស់ខ្លួនកាន់តែល្អប្រសើរឡើង និងត្រូវចេះប្រុងប្រយត្ន័ចំពោះគ្រោះអគ្គិភ័យ ព្រមទាំងត្រូវបញ្ជូនកូនចៅទៅរៀនសូត្រឲ្យបានខ្ពង់ខ្ពស់ ដើម្បីជួយដល់គ្រួសារនិងរួមចំណែកដល់កិច្ចអភិវឌ្ឍន៍សង្គមជាតិយើងទៀតផង ។
ព័ត៌មានជាតិ ថ្មីៗ
ក្នុងឱកាសនោះដែរ លោក លី សំរិទ្ធ បានអញ្ជើញទៅពិនិត្យមើលសាលាបឋមសិក្សាសំបួរដែលមានចំនួនសិស្សច្រើនលើសពីសាលាដែលមានស្រាប់ ហើយសិស្សចំនួន២ថ្នាក់កំពុងតែរៀនក្នុងរោង ដោល ព្រមទាំងបានផ្ដល់ជាគំនិត និង បានផ្តួចផ្តើមធ្វើបុណ្យផ្កាសាមគ្គីមួយ និងធ្វើទំនាក់ទំនងជាមួយសប្បុរសជនរួមទាំងអង្គការដៃគូ ដើម្បីសាងសង់សាលាបន្ថែមទៀត ជូនដល់សិស្សមានបន្ទប់សិក្សាឲ្យបានត្រឹមត្រូវ ទៅតាមច្បាប់ក្បួន នៃគរុកោសល្យ របស់ក្រសួងអប់រំយុវជន និងកីឡា ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
