នៅព្រឹកថ្ងៃទី២៩ ខែតុលា ឆ្នាំ២០១៨នេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានដឹកនាំមន្ត្រីជាន់ខ្ពស់ជាច្រើនរូបទៀត នៃក្រសួងការពារជាតិ បានអញ្ជើញចូលរួមក្នុងពិធីបុណ្យឆ្លងគម្រប់៧ថ្ងៃ ឧទ្ទិសមហាកុសល ជូនវិញ្ញាណខ័ន្តសព ឧត្តមសេនីយឯក ជា ម៉ន មេបញ្ជាការរងកងទ័ពជើងគោក មេបញ្ជាការយោធភូមិភាគទី៤ ក្នុងទឹកចិត្តសម្តែងនូវការសោកស្តាយ និង ចូលរួមរំលែកទុក្ខដ៏ក្រៀមក្រំបំផុត ចំពោះគ្រួសារនៃសព ។
សូមបញ្ជាក់ថា ឯកឧត្តម ឧត្តមសេនីយ៍ឯក ជា ម៉ន បានទទួលមរណភាព កាលពីថ្ងៃទី២៣ ខែតុលា ឆ្នាំ២០១៨ វេលាម៉ោង ២១និង១០នាទី ដោយរោគាពាធ ក្នុងជន្មាយុ៦៦ឆ្នាំ និងបានតម្កល់ទុកធ្វើបុណ្យទក្ខិណានុប្បទានតាមគន្លងប្រពៃណីព្រះពុទ្ធសាសនា នៅគេហដ្ឋាននៃសព ភូមិវាល សង្កាត់គោកចក ក្រុងសៀមរាប ហើយរសៀលថ្ងៃទី២៨ ខែតុលា បានប្រព្រឹត្តទៅនៃពិធីរំកិលសព ដង្ហែរប្រទក្សិណក្រុងសៀមរាប និងយកទៅតម្កល់លើមេរុ ក្នុងបរិវេណគេហដ្ឋានតម្កល់សពវិញ និងប្រារព្ធពិធីបូជានាល្ងាចថ្ងៃដដែលនោះ ភ្ជាប់ដោយពិធីបុណ្យទក្ខិណានុប្បទានគម្រប់៧ថ្ងៃ ផងដែរ ។
នៅក្នុងលិខិតថ្លែងអំណរគុណនៃគ្រួសារសព បានបង្ហាញថា ៖ វត្តមានរបស់ សម្តេច ឯកឧត្តម អ្នកឧកញ៉ា លោកជំទាវ អស់លោក លោកស្រី ដែលអញ្ជើញមកពីក្រសួង-ស្ថាប័ន មន្ទីរ-អង្គភាពនានា ក្រុមហ៊ុន សហគ្រាស វិស័យឯកជននានា ញាតិមិត្តជិតឆ្ងាយ ចូលរួមក្នុងពិធីបុណ្យសព ចាប់តាំងពីថ្ងៃដំបូង រហូតដល់ថ្ងៃបញ្ជប់ គឺជាកិត្តិយស និងមហាកុសល មិនអាចកាត់ថ្លៃបាន ហើយក៏ជាការដឹងគុណនូវគំរូវីរភាពរបស់ឯកឧត្តម ជា ម៉ន ដែលស្ទើរមួយជីវិតរបស់ឯកឧត្តម បានធ្វើពលីកម្មគ្រប់បែបយ៉ាង ដើម្បីបុព្វហេតុជាតិ មាតុភូមិ និង ប្រជាជនកម្ពុជា ។
នៅក្នុងលិខិតថ្លែងអំណរគុណនោះផងដែរ ក៏បានបង្ហាញនូវការដឹងគុណដ៏ធំធេងបំផុត ចំពោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានផ្តួចផ្តើមនិងបានឧបត្ថម្ភថវិកា សម្រាប់ការរៀបចំពិធីបុណ្យសពយ៉ាងអធឹកអធម បញ្ចប់តាមប្រពៃណីសាសនា និង ពិធីការកងទ័ព ៕
អត្ថបទ និង រូបថត : លោក ងិន គឹមឡេង
កែសម្រួលអត្ថបទ : លោក លីវ សាន្ត
#មន្ទីរព័ត៌មានខេត្តសៀមរាប
