រាជរដ្ឋាភិបាលកម្ពុជា កំពុងសិក្សាការអភិវឌ្ឍ និងពង្រីកផលិតផលទេសចរណ៍ ក្នុងខេត្តសៀមរាប សំដៅពន្យារពេល នៃការស្នាក់នៅរបស់ភ្ញៀវទេសចរអន្តរជាតិ ដោយឈរលើគោលការណ៍ “អភិរក្សដើម្បីអភិវឌ្ឍ ហើយការអភិវឌ្ឍ ដើម្បីទ្រទ្រង់ដល់ការអភិរក្ស”។
បន្ទាប់ពី រាជរដ្ឋាភិបាលកម្ពុជាបានសម្រេចបង្កើត «គណៈកម្មការអន្តរក្រសួង ដើម្បីសិក្សារៀបចំផែនការមេ សម្រាប់ការអភិវឌ្ឍវិស័យទេសចរណ៍នៅខេត្តសៀមរាប» គណៈកម្មការនេះ មានតួនាទី និងភារកិច្ច រៀបចំផែនការមេ សម្រាប់ការអភិវឌ្ឍន៍ទេសចរណ៍ នៅក្នុងខេត្តសៀមរាប ដោយផ្អែកលើប្លង់មេ នៃការប្រើប្រាស់ដីធ្លីរបស់ខេត្តសៀមរាប ដើម្បីធានាបាននូវការអភិវឌ្ឍន៍វិស័យទេសចរណ៍ប្រកបដោយចីរភាព មានរបៀបរៀបរយ មានសណ្ដាប់ធ្នាប់ល្អ ទាំងការអភិរក្ស និងការអភិវឌ្ឍន៍ទីក្រុងសៀមរាប។
រាល់ការអនុញ្ញាតឲ្យមានការរៀបចំព្រឹត្តិការណ៍វប្បធម៌ សិល្បៈកំសាន្ដធំៗនាពេលយប់ ទាំងបុរាណ និងទំនើប ទាំងក្នុងក្របខណ្ឌជាតិ និងអន្តរជាតិ នៅតាមទីតាំងប្រាសាទមួយចំនួន គណៈកម្មការនេះ ក៏មានតួនាទីពិនិត្យ សិក្សា លើការគ្រប់គ្រងព្រឹត្តិការណ៍ រក្សាការពារ ចៀសវាងធ្វើឲ្យប៉ះពាល់ដល់ទីតាំងប្រាសាទ។ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មការអន្តរក្រសួង មានប្រសាសន៍ថា ជាមួយកិច្ចខិតខំប្រឹងប្រែងរបស់ក្រសួងទេសចរណ៍ ក្នុងការធានាការអភិវឌ្ឍវិស័យទេសចរណ៍ ប្រកបដោយនិរន្តរភាព ក្រសួងបានពង្រឹងគុណភាពឧស្សហកម្មទេសចរណ៍ តាមរយៈការអនុវត្តនូវយុទ្ធនាការ «សេវាមួយ ស្តង់ដាមួយ» ដែលជម្រុញដល់ចលនាប្រលងប្រណាំងវិស័យទេសចរណ៍ ផ្អែកលើស្តង់ដាអាស៊ាន និងស្តង់ដាកម្ពុជា ការគ្រប់គ្រងវិស័យទេសចរណ៍តាមប្រព័ន្ធអនឡាញ ការពង្រឹងធនធានមនុស្សក្នុងវិស័យទេសចណ៍តាមរយៈយុទ្ធនាការ «បុគ្គលិកម្នាក់ ជំនាញមួយ» និងការផ្សព្វផ្សាយទេសចរណ៍តាមប្រព័ន្ធ ឌីជីថល ជាដើម។
ជាមួយគ្នានោះ លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ជាប្រធានអាជ្ញាធរជាតិអប្សរា និងជាអនុប្រធានគណៈកម្មការ បានលើកឡើងពីភាពចាំបាច់នៃការបែងចែកាតំបន់ (zoning) រវាងតំបន់បេតិកភណ្ឌ និងកន្លែងកម្សាន្ត ធ្វើយ៉ាងណាកុំឱ្យតំបន់បេតិកភណ្ឌក្លាយជាជនរងគ្រោះ នៃសន្ទស្សន៍(កើនឡើង)នៃភ្ញៀវទេសចរ ជាពិសេសលោកជំទាវគាំទ្រឱ្យមានការរៀបចំផែនការមេ សម្រាប់ការអភិវឌ្ឍវិស័យទេសចរណ៍នៅខេត្តសៀមរាប ប្រកបដោយនិរន្តរភាព។
កិច្ចប្រជុំបានពិភាក្សា របស់គណៈកម្មការអន្តរក្រសួង បានឯកភាពទៅលើចំណុចសំខាន់ៗមួយចំនួនដូចជា៖
– ការរៀបចំផែនការមេអភិវឌ្ឍក្រុងសៀមរាប ត្រូវអភិវឌ្ឍន៍ជាទីក្រុងទេសចរណ៍ ទីក្រុងបេតិកភណ្ឌ និងជាទីក្រុងដែលគិតគូរពីបរិស្ថាន ដោយត្រូវធ្វើសមាហរណកម្មទាំងលើទិដ្ឋភាពសេដ្ឋកិច្ច សង្គម វប្បធម៌ បរិស្ថាន និងស្ថាបត្យកម្ម ដើម្បីទ្រទ្រង់នឹងកំណើនភ្ញៀវទេសចរមកកម្សាន្តនៅខេត្តសៀមរាប ទាំងភ្ញៀវជាតិ និងអន្តរជាតិ ជាពិសេសស្របតាមទស្សនទាន «អភិរក្សដើម្បីអភិវឌ្ឍ រីឯការអភិវឌ្ឍទ្រទ្រង់ដល់ការអភិរក្ស»។
– ការអភិវឌ្ឍហេដ្ឋារចនាសម្ព័ន្ធនានាក្នុងខេត្ត៖ ត្រូវធ្វើការសិក្សារៀបចំប្រព័ន្ធផ្គត់ផ្គង់ទឹក និងអគ្គិសនីឲ្យបានគ្រប់គ្រាន់ និងត្រូវរៀបចំប្រព័ន្ធគ្រប់គ្រងសំណល់រឹង និងរាវអោយបានត្រឹមត្រូវតាមស្តង់ដាបរិស្ថាន។ ព្រមជាមួយនេះ ត្រូវរៀបចំសណ្តាប់ធ្នាប់ឲ្យបានល្អ និងមានរបៀបរៀបរយ ដាក់ភ្លើងសញ្ញាចរាចរណ៍ឲ្យបានគ្រប់គ្រាន់ រៀបចំដាក់ភ្លើងបំភ្លឺទីក្រុងសៀមរាប រៀបចំសោភ័ណភាពតាមស្ទឹងសៀមរាប ពង្រីកផ្លូវក្នុងក្រុង ជាពិសេសផ្លូវសម្រាប់ថ្មើរជើង និងផ្លូវសម្រាប់ជិះកង់។
-ការអភិវឌ្ឍតំបន់ទេសចរណ៍ជុំវិញក្រុងសៀមរាប និងគាំទ្រយុទ្ធនាការ «សៀមរាប៖ ក្រៅពីប្រាសាទ» ជាពិសេសតំបន់ព្រែកទាល់ ចុងឃ្នាស បឹងទន្លេសាប ភ្នំគូលែន និងតំបន់សហគមន៍ទេសចរណ៍ តំបន់កសិ-ទេសចរណ៍ ទេសចរណ៍ជនបទ ផលិតផលទេសចរណ៍កែច្នៃផ្សេងៗ និងព្រឹត្តិការណ៍ ពិសេសទេសចរណ៍កីឡា ដើម្បីបង្កើនឧត្តមភាពប្រកួងប្រជែងនៃវិស័យទេសចរណ៍ខេត្តសៀមរាប និងពន្យារពេលស្នាក់នៅរបស់ភ្ញៀវទេសចរ។
-ការពង្រឹងគុណភាពសេវាកម្មទេសចរណ៍ និងធនធានមនុស្ស ក្នុងវិស័យទេសចរណ៍ឆ្លើយតបនឹងកំណើនភ្ញៀវទេសចរ ដោយត្រូវពង្រឹងគុណភាពសាលាបណ្តុះបណ្តាលជំនាញវិជ្ជាជីវៈទេសចរណ៍ ការបណ្តុះបណ្តាលផ្ទៃក្នុង និងជម្រុញការអនុវត្តស្តង់ដាអាស៊ានក្នុងវិស័យទេសចរណ៍។
ក្នុងកិច្ចប្រជុំលើកដំបូង នារសៀលថ្ងៃទី៣០ ខែតុលា ឆ្នាំ២០១៨ របស់គណៈកម្មការអន្តរក្រសួង នៅខេត្តសៀមរាបនេះ ក្រោមអធិបតីភាពរបស់ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ ជាប្រធានក្រុមគណៈកម្មការ, លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានអាជ្ញាធរជាតិអប្សរា ជាអនុប្រធានគណៈកម្មការ, ឯកឧត្តម ឃឹម ប៊ុនសុង អភិបាលខេត្តសៀមរាប ជាអនុប្រធានគណៈកម្មការ។
អត្ថបទ និង រូបថត ៖ លោក យូ វង្ស និង លោក ងិន គឹមឡេង
កែសម្រួលអត្ថបទ ៖ លោក សេង ផល្លី
