ក្នុងចំណោមទេសចរសរុបជាង ៤លាននាក់ មកកម្សាន្តខេត្តសៀមរាប ភ្ញៀវទេសចរចិនឈរនៅលេខរៀងទី១ ក្នុងរយៈពេល ៩ខែដើមឆ្នាំ ២០១៨នេះ។ ចំនួននេះកើនឡើងជាង ៨ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៧ នេះបើតាមរបាយការណ៍របស់មន្ទីរទេសចរណ៍ខេត្តសៀមរាប។
យោងតាមរបាយការណ៍ដដែល ដែលបង្ហាញដោយប្រធានមន្ទីរទេសចរណ៍ខេត្តសៀមរាប ចេញផ្សាយនៅថ្ងៃទី៣០ តុលានេះ ក្នុងចំណោមទេសចរសរុបចំនួន ៤,៤៥០,៧៣២នាក់ ដែលបានមកកម្សាន្តក្នុងខេត្តសៀមរាប ចំនួនភ្ញៀវទេសចរអន្ដរជាតិមានចំនួនជិត ២លាននាក់ គឺកើនឡើង ជាង៨ភាគរយ ធៀបនឹងរយៈពេលដូចគ្នាកាលពីឆ្នាំ២០១៧។ ទន្ទឹមនឹងនោះ ភ្ញៀវទេសចរចិន មានចំនួនច្រើនជាងគេសរុបជាង ៨៣ម៉ឺននាក់ ឈរនៅលំដាប់កំពូល នៃភ្ញៀវទេសចរអន្តរជាតិដែលមកទស្សនាក្នុងខេត្តសៀមរាបផងដែរ។
ក្នុងនោះដែរ ភ្ញៀវទេសចរជនជាតិកូរ៉េ ឈរនៅលេខរៀងទី២ បន្ទាប់ពីចិន ដែលមានចំនួនសរុបជាង ១៤ម៉ឺននាក់ អាមេរិកជាង ១១ម៉ឹននាក់ អង់គ្លេសជាង ៩៨ពាន់នាក់ ជប៉ុនជាង ៨៨ពាន់នាក់ បារាំងជាង ៧៥ពាន់នាក់ អូស្រា្ដលី ជាង ៥៤ពាន់នាក់ វៀតណាមជាង ៥៣ពាន់នាក់ អាល្លឺម៉ង់ជាង ៤៩ពាន់នាក់ និងទេសចរថៃមានជាង ៤៦ពាន់នាក់។
ដោយឡែក ក្នុងចំណោមភ្ញៀវទេសចរអន្តរជាតិសរុប ទេសចរដែលថយចុះមានដូចជា កូរ៉េ អង់គ្លេស ជប៉ុន អូស្ដ្រាលី និង វៀតណាម ក្រៅពីនោះក៏មានកំណើនភ្ញៀវទេសចរអន្តរជាតិមួយចំនួនកើនឡើងតិចតួចដូចជាអាល្លឺម៉ង់ និងថៃជាដើម៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក សេង ផល្លី
