នៅថ្ងៃទី ២៦ ខែវិច្ឆិកា ឆ្នាំ២០១៩នេះ ឯកឧត្តម ជា ម៉ានិត រដ្ឋលេខាធិការ និងជានាយខុទ្ទកាល័យ ក្រសួងប្រៃសណីយ៍ និងទូរគមនាគមន៍ តំណាង ឯកឧត្ដម ត្រាំ អ៊ីវ តឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានអញ្ជើញជាអធិបតីក្នុងសន្និសីទ ដៃគូប្រចាំតំបន់អាស៊ីប៉ាស៊ីហ្វិច ឆ្នាំ២០១៩ របស់ក្រុមហ៊ុន អារិនណិត (Aarenet APAC partner conference 2019)។
តាមរយៈបទបង្ហាញក្នុងសន្និសីទនោះ អារិនណិត គឺជាក្រុមហ៊ុន ផ្នែកបច្ចេកវិទ្យាទូរគមនាគមន៍ ដែលមានទីស្នាក់កណ្ដាលនៅប្រទេសស្វីស និងផ្ដល់សេវាដល់អតិថិជននៅតំបន់អឺរ៉ុប និងអាស៊ីប៉ាស៊ីហ្វិក។
មានប្រសាសន៍នាឱកាសនោះ ឯកឧត្តម ជា ម៉ានិត បានបង្ហាញថា ក្រោមការដឹកនាំ របស់របស់រាជរដ្ឋាភិបាល ដែលមាន សម្តេចតេជោ ហ៊ុន សែន នាយករដ្ឋមន្ត្រី កម្ពុជាបានទទួលនូវសន្តិភាព និងការអភិវឌ្ឍជាបន្តបន្ទាប់ លើគ្រប់វិស័យ ជាពិសេសឧស្សាហកម្មបច្ចេកវិទ្យាព័ត៌មានវិទ្យា បានដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចសង្គម ស្ថាប័នសហគ្រាស និងសហគមន៍។ សន្និសិទដៃគូរបស់របស់ក្រុមហ៊ុន អារិនណិត នាពេលនេះ បានបង្ហាញពីការសម្លឹងឃើញ នៃភាពរីកចម្រើនឆ្ពោះទៅមុខ នៃវិស័យបច្ចេកវិទ្យាព័ត៌មានវិទ្យានៅក្នុងប្រទេសកម្ពុជា ដែលស្របនឹងយុទ្ធសាស្ដ្ររបស់រដ្ឋាភិបាលកម្ពុជាក្នុងអាណត្តិទី ៦នេះ។ ក្នុងនោះរាជរដ្ឋាភិបាល ក៏បានរៀបចំគោលនយោបាយលើកស្ទួយ និងអភិវឌ្ឍឆ្ពោះទៅរករដ្ឋាភិបាលអេឡិចត្រូនិក សេដ្ឋកិច្ចឌីជីថល ទីក្រុងឆ្លាត និងភូមិឌីជីថលផងដែរ។
ឯកឧត្តមរដ្ឋលេខាធិការ ក៏បានបញ្ជាក់ផងដែរ ទោះបីការអភិវឌ្ឍវិស័យបច្ចេកវិទ្យាព័ត៌មានវិទ្យា របស់រាជរដ្ឋាភិបាល កំពុងតែដំណើរការក៏ពិតមែន ប៉ុន្តែសមិទ្ធផលមួយចំនួន បានចេញជារូបរាងនៅក្នុងវិស័យអាទិភាពមួយចំនួន ដើម្បីធ្វើការវាយតម្លៃ និងសិក្សាបន្ថែមទៀត ឧទាហរណ៍ដូចជា ការប្រើប្រាស់អ៊ីនធឺណេតល្បឿនលឿន និងបានដាក់ឲ្យប្រព័ន្ធវ៉ាយហ្វាយ(WiFi)ឥតគិតថ្លៃ ជូនសិស្សសាលាបឋមសិក្សាខេត្តកំពង់ឆ្នាំង និងខេត្តកំពង់ស្ពឺ ឲ្យងាយស្រួលក្នុងការសិក្សារៀនសូត្រតាមរយៈអ៊ីនធើណេត។ លើសពីនេះ ឯកឧត្តមរដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានជំរុញកិច្ចសហប្រតិបត្តិការ ជាមួយដៃគូយុទ្ធសាស្ត្រ ដែលមានដូចជាជប៉ុន កូរ៉េ ចិន និងជាពិសេសប្រទេសម៉ាឡេស៊ី នាពេលថ្មីៗនេះ ដោយក្រុមហ៊ុន Aarenet នេះផ្ទាល់ បាននាំយកប្រព័ន្ធ SIP trunk និង Unified Cloud Communication (UCC) មកកាន់ប្រទេសកម្ពុជា។
ក្រុមហ៊ុនទូរគមនាគមន៍ម៉ាឡេស៊ី សម្លឹងឃើញឱកាស និងភាពរីកចម្រើនលើវិស័យព័ត៌មានវិទ្យា
ក្រុមហ៊ុនទូរគមនាគមន៍ម៉ាឡេស៊ី សម្លឹងឃើញឱកាស និងភាពរីកចម្រើនលើវិស័យព័ត៌មានវិទ្យា នៅកម្ពុជា#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Tuesday, November 26, 2019
អត្ថបទ និង រូបភាព ៖ លោក ហាំ ម៉េងហួត
កែសម្រួលអត្ថបទ ៖ លោក សេង ផល្លី
