កាលពីថ្ងៃទី១០ ខែវិច្ឆិកា ឆ្នាំ២០១៨ នេះ អាជីវករលក់ដូរនៅផ្សារសម្តេចតេជោ ហ៊ុន សែន ដើមក្រឡាញ់ ដែលមានឈ្មោះជាម្ចាស់តូបជិត៤៦០តូប ស្មើនឹង១៥មុខរបរ បានព្រមព្រៀងទទួលយកដំណោះស្រាយចុងក្រោយ ដែលសាលាក្រុងសៀមរាប គណៈកម្មការផ្សារ និងអង្គភាពពាក់ព័ន្ធថ្នាក់ខេត្ត បានឯកភាពគ្នារៀបចំជូន តាមរយៈនៃការចាប់ឆ្នោតដោយយុត្តិធម៌ ដែលការចាប់ឆ្នោតនេះ បានធ្វើឡើងនៅសាលាក្រុងសៀមរាប ។
លោក សុខ តុញ ប្រធានគណកម្មការសម្របសម្រួល រៀបចំការចាប់ឆ្នោត បានឲ្យដឹងថា បងប្អូនអាជីវករ អ្នកលក់ដូរ មានប្រមាណជា ៩៩ភាគរយ បានមកចូលរួមការចាប់ឆ្នោតនេះ លើកលែងតែអ្នកនៅឆ្ងាយ ឬមានធុរកិច្ចរវល់តែប៉ុណ្ណោះ ហើយក្រោយពីការព្រមព្រៀងទទួលយកការចាប់ឆ្នោត ផ្សារសម្តេចតេជោ ហ៊ុន សែន ដើមក្រឡាញ់នេះ នឹងត្រូវបានរៀបចំឲ្យក្លាយជាផ្សារគំរូ នៅក្នុងខេត្តសៀមរាប ។
លោក សុខ តុញ បានឲ្យដឹងទៀតថា នៅក្នុងរយៈពេលមិនតិចជាង៣ឆ្នាំ ក្រោយការសាងសង់រួច ដោយពុំមានការឯកភាពគ្នា លើការបែង ចែកកំណត់ប្រភេទទីតាំងមុខរបរលក់ដូរនោះ គណៈកម្មការផ្សារបានឯកភាពគ្នាជាមួយអាជ្ញាក្រុង អនុញ្ញាតឲ្យបងប្អូនអាជីវករយកចំណតរថយន្តមុខផ្សារ និងតាមដងផ្លូវជិតផ្សារនោះ លក់ដូរជាបណ្តោះអាសន្ន ប៉ុន្តែ ក្រោយពីបងប្អូនចូលទៅកាន់តូបលក់ដូររបស់ខ្លួន នឹងមានរៀបចំទីលានចំណតរថយន្តមុខផ្សារ និងដងផ្លូវលក់ដូរបណ្តោះអាសន្ននោះឡើងវិញ ឲ្យមានបរិស្ថាន និង សោភ័ណភាព ។
សូមបញ្ជាក់ថា ផ្សារសម្តេចតេជោ ហ៊ុន សែន ដើមក្រឡាញ់នេះ កសាងដោយកម្លាំងកងវិស្វកម្មសម្តេចអគ្គមហាសេនាបតីតេជោ ហ៊ុន សែន សៀមរាប ដែលមានវត្តមាន ឯកឧត្តមឧកញ៉ា តំណាងរាស្រ្ត សៀង ណាំ ជាប្រធាន ៕
អត្ថបទ និង រូបថត : លោក ហិន គឹមឡេង
កែសម្រួលអត្ថបទ : លោក លីវ សាន្ត
#មន្ទីរព័ត៌មានខេត្តសៀមរាប
#ផ្សារសម្តេចតេជោហ៊ុនសែនដើមក្រឡាញ់
