ក្នុងឱកាសនៃការរៀបចំការប្រណាំងទូកអុំលក្ខណៈប្រពៃណី នៅវត្តមហានទី រតនារាម ហៅវត្តស្វាយរមៀត ក្នុងរយៈពេល ២ថ្ងៃ គឺនៅថ្ងៃទី០៨ និងថ្ងៃទី០៩ ខែវិច្ឆិកា ឆ្នាំ២០១៨នេះ ទូកឈ្មោះក្រឡាហោមសែនជ័យបារមីភូមិប្រិយ៍ថ្មី ទទួលបានចំណាត់ថ្នាក់លេខ១ , ចំណាត់ថ្នាក់លេខ២ បានទៅលើទូកឈ្មោះ កំផែងមានជ័យបារមីគោកស្រម៉ និង ចំណាត់ថ្នាក់លេខ៣ បានទៅលើទូកឈ្មោះ មច្ឆាមានជ័យបារមីស្ទឹងព្រះស្រុក ខណៈចំណាត់ថ្នាក់លេខ៤ គឺទូកឈ្មោះ កងទ័ពជើងអាកាសសែនជ័យបារមីវត្តស្វាយរមៀត ។
ទូកដែលបានចូលរួមក្នុងការប្រណាំងនេះ មានចំនួន២៨ទូក ដោយទូកនិមួយៗចំណុះចំនួន០៦នាក់ ខណៈទូកជាប់ចំណាត់ថា្នក់លេខ១ ទទួលបានពានជ័យលាភី១ ទង់ជ័យលាភី១ មេដាយមាស៣គ្រឿងនិងទឹកប្រាក់៤០ម៉ឺនរៀល , ចំណាត់ថ្នាក់លេខ២ ទទួលបានទង់ជ័យលាភី១ មេដាយប្រាក់៣គ្រឿងនិងប្រាក់រង្វាន់ ៣៥ម៉ឺនរៀល និង ចំណាត់ថ្នាក់លេខ៣ ទទួលបានទង់ជ័យលាភី១ មេដាយសំរឹទ្ធ៣គ្រឿងនិងប្រាក់រង្វាន់៣០ម៉ឺនរៀល ហើយទូកដែលមិនបានទទួលជ័យលាភីចំនួន២៥ទូកទៀត ទទួលបានរង្វាន់លើកទឹកចិត្ត ក្នុងចំណុះទូកនីមួយៗ ទឹកប្រាក់ ២០ម៉ឺនរៀល រួមទាំងទឹកសុទ្ធ និង មីកញ្ចប់មួយចំនួនទៀត ។
បើតាមការបញ្ជាក់ពីគណៈកម្មការរៀបចំការប្រណាំងទូកនេះ បានឲ្យដឹងថា ទូកដែលទទួលបានចំណាត់ថ្នាក់ពីលេខ១ ដល់លេខ៤ នឹងត្រូវបានទៅចូលរួមជាគូកិត្តិយសនៅក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក តាមបណ្ដោយដងស្ទឹងសៀមរាប នៅថ្ងៃទី២១ និងថ្ងៃទី២២ ខែវិច្ឆិកា ឆ្នាំ២០១៨ខាងមុខនេះ ដែលរៀបចំឡើងដោយរដ្ឋបាលខេត្តសៀមរាប ។
សូមបញ្ជាក់ថា នេះជាឆ្នាំទី៤ហើយ សម្រាប់ការប្រណាំងទូកអុំលក្ខណៈប្រពៃណី នៅវត្តបារាយណ៍មហានទី រតនារាម ហៅវត្តស្វាយរមៀត ស្ថិតក្នុងសង្កាត់ទឹកវិល ក្រុងសៀមរាប ដែលផ្ដួចផ្ដើមឡើងដោយ ព្រះតេជគុណព្រះចៅអធិការវត្ត ដោយ មានការគាំទ្រពីគណៈកម្មការវត្ត អាជ្ញាធរមូលដ្ឋាន រួមទាំងកម្លាំងសមត្ថកិច្ច ក្រោមការចូលរួមឧបត្ថម្ភគាំទ្រថវិកាពីសប្បុរសជនជាពាណិជ្ជករ អាជីវករ និងប្រជាពលរដ្ឋជាច្រើនរូប ដោយមានអ្នកចូលរួមទស្សនាប្រមាណ៧ពាន់នាក់ ។
ព្រះតេជគុណ នឿម វុទ្ឋី ប្រធានគណៈកម្មការរៀបចំការប្រកួត និងជាព្រះគ្រូចៅអធិការវត្តស្វាយរមៀត មានថេរដិកាថា ការរៀបចំការប្រកួត ធ្វើឡើងក្នុងគោលបំណងរឹតចំណងអភិរក្សនិងថែរក្សាប្រពៃណីពីដូនតា និងបង្កើនសាមគ្គីភាពឱ្យកាន់តែជិតស្និតថែមទៀត រវាងវត្តអារាមនិងពុទ្ឋបរិស័ទ ជាពិសេស រំលឹកនឹកគុណដល់កងទ័ពជើងទឹកដែលបានទទួលជោគជ័យលើខ្មាំងសត្រូវឈា្ននពានមកលើទឹកដីខ្មែរ។
ថ្លែងបិទកម្មវិធីប្រណាំងទូកនេះ លោកឧត្តមសេនីយ៍ត្រី ហួត សុធី ស្នងការរង នៃស្នងការដ្ឋាននគរបាលខេត្តសៀមរាប បានចាត់ទុកការរៀបចំឱ្យមានពិធីប្រណាំងទូករយៈពេលពីរថ្ងៃ នេះ ជាចលករសំខាន់មួយ ជួយអូសទាញអ្នកទេសចរណ៍ជាតិ និងអន្តរជាតិ ឱ្យចាប់ចិត្តជាមួយនឹងពិធីប្រពៃណី ទំនៀមទម្លាប់ខ្មែរដែលមានតាំងពីយូរលង់ណាស់មកហើយ ស្របទៅតាមភូមិសាស្ត្រខេត្តនេះ សម្បូរទៅដោយប្រាង្គប្រាសាទសម្បត្តិវប្បធម៌ និងអង្គរវត្តជាសម្បត្តិបេតិកភណ្ឌពិភពលោកផង ។
លោក ហួត សុធី មានប្រសាសន៍ទៀតថា ទាំងនេះកើតឡើងបាន ក៏អាស្រ័យដោយស្ថានភាពបរិយាកាសសុខសុវត្ថិភាព សន្តិសុខ សណ្តាប់ធ្នាប់របៀបរៀបរយល្អ ក្រោមការដឹកនាំដ៏ឈ្លាសវៃនិងប៉ិនប្រសព្វ របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានធ្វើឲ្យប្រទេសជាតិ មានការរីកចម្រើនឥតឈប់ឈរពីមួយថ្ងៃទៅមួយថ្ងៃ ៕
អត្ថបទ និង រូបថត ៖ លោក យូ វង្ស និងលោក ងិន គឹមឡេង
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#អុំទូក
