កាលពីព្រឹកថ្ងៃទី១២ ខែវិច្ឆិកា ឆ្នាំ២០១៨នេះ មជ្ឈមណ្ឌលតំបន់អាស៊ានសម្រាប់សកម្មភាពមីន ដែលមានការិយាល័យកណ្តាលនៅក្នុងរាជធានីភ្នំពេញ បានរៀបចំសិក្ខាសាលាថ្នាក់តំបន់មួយនៅក្នុងខេត្តសៀមរាប មានរយៈពេល៣ថ្ងៃ គឺចាប់ថ្ងៃទី១២ ដល់១៤ ខែវិច្ឆិកា ស្តីពីការពង្រឹងចំណេះដឹងផ្នែកសកម្មភាពមីន និងលើកកម្ពស់ឲ្យមានការរៀបចំវេទិ កាសម្រាប់ការចែករំលែកចំណេះដឹងផ្នែកសកម្មភាពមីន បន្ថែមទៀតនាពេលអនាគត សម្រាប់ប្រទេសសមាជិកអាស៊ាន ដោយមានការចូលរួមពីភ្ញៀវជាតិ និងអន្តរជាតិ មកពីប្រទេសសមាជិកអាស៊ានទាំង១០ , សាកលវិទ្យាល័យមួយចំនួនក្នុងប្រទេសមាជិកអាស៊ាន , ដៃគូអភិវឌ្ឍន៍ និងអង្គការផ្នែកសកម្មភាពមីននានា ចំនួនសរុបប្រមាណ១០០នាក់ ក្រោមការឧបត្ថម្ភ និង គាំទ្រពីរដ្ឋាភិបាលកាណាដា ។
លោក លី បញ្ញារិទ្ធិ៍ នាយកប្រតិបត្តិរបស់មជ្ឈមណ្ឌលតំបន់អាស៊ានសម្រាប់សកម្មភាពមីនកម្ពុជា បានមានប្រសាសន៍ថា សិក្ខាសាលានេះ នឹងមានការពិភាក្សាលើប្រធានបទសំខាន់មួយចំនួនដូចជា យុទ្ធសាស្ត្រក្នុងការពង្រឹងនូវជំនួយដល់ជនពិការដោយសារមីន និងវិធីសាស្ត្រក្នុងការអប់រំយល់ដឹងដើម្បីកាត់បន្ថយគ្រោះថ្នាក់ដោយសារមីន ព្រមទាំងលើកឡើងផងដែរនូវ ផលប៉ះពាល់ជាវិជ្ជមាននៃការបោសសម្អាតមីន និងការជួយដល់ជនពិការ លើការអភិវឌ្ឍន៍សង្គម និងសេដ្ឋកិច្ចរបស់ប្រទេសមួយ និង ក្នុងប្រទេសសមាជិកអាស៊ានដែលរងផលប៉ះពាល់ដោយសារមីនមួយចំនួន ដើម្បីចូលរួមចំណែកដល់ការសម្រេចបាននូវគោលដៅអភិវឌ្ឍន៍ប្រកបដោយចីរភាព របស់អង្គការសហប្រជាជាតិ ជាពិសេសបង្ហាញពីសុវត្ថិភាព និងប្រសិទ្ធភាពក្នុងការប្រើប្រាស់បច្ចេកវិទ្យាដូចជា សុនខ និងកណ្តុរ ក្នុងប្រតិបត្តិការបោសសម្អាតមីន ។
គួររំលឹកថា ក្រៅពីប្រធានបទសំខាន់ៗ ស្តីពីសកម្មភាពមីនក្នុងតំបន់អាស៊ាន កិច្ចពិភាក្សានឹងបង្ហាញពីសារៈសំខាន់នៃក្របខ័ណ្ឌសហប្រតិបត្តិការអន្តរជាតិនានាក្នុងការបង្កើនភាពជាដៃគូលើឆាកអន្តរជាតិក្នុងការដោះស្រាយបញ្ហាមីនជាសកល ដោយរួមទាំងទៅធ្វើទស្សនកិច្ចសិក្សានៅសារៈមន្ទីរសន្តិភាព របស់មជ្ឈមណ្ឌលសកម្មភាពកំចាត់មីនកម្ពុជាក្នុងខេត្តសៀមរាប ដើម្បីស្វែងយល់ពីប្រវត្តិរបស់ប្រទេសកម្ពុជា ពាក់ព័ន្ធនឹងមីន និងកិច្ចប្រឹងប្រែងរបស់ប្រទេសមួយនេះក្នុងការកាត់បន្ថយផលប៉ះពាល់ដោយសារមីន ៕
អត្ថបទ និង រូបថត ៖ លោក យូ វង្ស និង លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
