លោកបណ្ឌិត មាស បូរ៉ា សាកលវិទ្យាធិការនៃសាកលវិទ្យាល័យឯកទេសសនៃកម្ពុជា ដែលហៅកាត់ថា CUS មានប្រសាសន៍ថា ការបណ្តុះបណ្តាល គឺជាការបង្រៀនសិស្ស-និស្សិតឲ្យមានវិជ្ជាជីវៈ មានលក្ខណៈសមស្របបំផុតសម្រាប់ឯកទេស មុខតំណែង ឬ មុខរបរ ដើម្បីឲ្យមានសមត្ថភាពប្រជែងឈ្នះក្នុងការងារនិងមុខរបរទាំងនោះ ដូច្នេះបាវចនាសម្រាប់ការបណ្តុះបណ្តាល គឺបណ្តុះបណ្តាល ដើម្បីភាពជោគជ័យក្នុងការងារនិងមុខរបរ ហើយសិស្ស-និស្សិត គឺជាអនាគតនៃមូលធនមនុស្ស ហើយការជ្រើសរើសសាលាចូលរៀនដែលមានគុណភាព ការព្យាយាមរៀនសូត្រលើមុខវិជ្ជាដែលខ្លួនស្រឡាញ់ពេញចិត្ត ស្របតាមទីផ្សារការងារនិងលទ្ធភាពគ្រួសារ បង្កើតជំនាញពិតប្រាដ ដើម្បីជ្រើសរើសការងារច្បាស់លាស់ វាគឺជាជំហានដំបូង សម្រាប់ជោគជ័យនៃជីវិតសិក្សា លើផ្លូវនៃការកសាងអនាគត ។
លោកបណ្ឌិតមានប្រសាសន៍ទៀតថា ការកសាងសមត្ថភាពវិជ្ជាជីវៈ បុគ្គលិកលក្ខណៈសម្បត្តិកាន់តែខ្ពស់ ការដុសខាត់បញ្ញាញាណឲ្យកាន់តែភ្លឺថ្លា មុះមុតតាមរយៈនៃការសិក្សាស្រាវជ្រាវ ដកពិសោធន៍និងការអនុវត្តផ្ទាល់ គឺជាចម្លើយដ៏ស័ក្តិសិទ្ធិបំផុត ដើម្បីសម្រេចគោលបំណង ចម្រាញ់យកមាសផ្ទាល់ខ្លួន មកប្រើប្រាស់ឲ្យបានច្រើនបំផុត ដូច្នេះ ការសម្រេចចិត្តបន្តការសិក្សា វាគឺជាការបោះជំហានឆ្ពោះទៅកាន់អនាគតដ៏ភ្លឺថ្លារបស់សិស្ស-និស្សិតខ្លួនឯង និង សង្គមជាតិ ហើយការព្យាយាមសិក្សារៀនសូត្រ វាជាឋាមពលនៃការជំនះឧបស័គ្គ សម្រេចបានជោគជ័យក្នុងជីវិតសិក្សា ឆ្ពោះទៅកាន់អនាគតដែលបានកំណត់ទុក ។
លោកបណ្ឌិត មាស បូរ៉ា មានប្រសាសន៍បន្ថែមទៀតថា នៅក្នុងសង្គមជាតិបច្ចុប្បន្ននេះ រាជរដ្ឋាភិបាលកម្ពុជា បានបង្កឱកាស និងអំណោយផលជាច្រើនសម្រាប់សិស្ស-និស្សិត បានក្លាយជាទំពាំងស្នងឬស្សី ដោយផ្តល់តម្លៃទៅលើការសិក្សា ដែលជាសក្តានុពលនៃការកសាងធនធានមនុស្ស ចូលរួមអភិវឌ្ឍជាតិ ដូចប្រសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានលើកឡើងនៅក្នុងវេទិកាកសាងធនធានមនុស្សជាញឹកញាប់ ដោយសង្កត់ធ្ងន់ថា មាសដែលមាននៅក្នុងខួរក្បាលមនុស្ស គឺជាមាសដែលមាន មិនចេះរីងស្ងួត ហើយអ្នកណាក៏មាន កាន់តែប្រើកាន់តែកើតច្រើន ។
លោកបណ្ឌិត មាស បូរ៉ា មានប្រសាសន៍យ៉ាងនេះ នៅក្នុងអង្គសន្និសីទសាកលវិទ្យាល័យឯកទេសសនៃកម្ពុជា ឆ្នាំ២០១៨ នៅចំពោះមុខសិស្សប្រមាណជាង២០០នាក់ ដែលត្រៀមខ្លួនក្លាយជានិស្សិតឆ្នាំទី១ នៃសាកលវិទ្យាល័យ ឯកទេសនៃកម្ពុជា សាខាខេត្តសៀមរាប ស្ដីអំពីការទទួលនូវការអប់រំសតិបញ្ញា ស្វែងយល់អំពីការកសាងផែនការក្នុងជីវិតសិក្សារបស់ខ្លួន ដើម្បីអនាគតការងារ ក្រោមប្រធានបទ សិក្សានៅឧត្តមសិក្សាគឺជាការកសាងសមត្ថភាពនិងលក្ខណៈសម្បត្តិការងារ – វិធីសាស្ត្រក្នុងការស្វែងរកការងារដែលមានប្រាក់ខែខ្ពស់- និង ការអភិវឌ្ឍការងារ ដែលបានប្រារព្ធធ្វើឡើងកាលពីពេលថ្មីៗកន្លងទៅនេះ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
