មន្ត្រីរាជរដ្ឋាភិបាលកម្ពុជាអះអាងថាការប្រែប្រួលអាកាសធាតុធ្វើឲ្យប៉ះពាល់ដល់កិច្ចខិតខំប្រឹងប្រែងនៃការកាត់បន្ថយភាពក្រីក្រ និង ជាកត្តារាំងស្ទះដល់ការអភិវឌ្ឍសេដ្ឋកិច្ចជាតិ

ថ្លែងនៅក្នុងសិក្ខាសាលាចែករំលែកចំណេះដឹង ស្ដីពីការពង្រឹងភាពធន់នឹងអាកាសធាតុ របស់សហគមន៍មូលដ្ឋាននៅកម្ពុជា ដែលបានប្រារព្ធឡើងនៅខេត្តសៀមរាប ឯកឧត្តម ទិន ពន្លក អគ្គលេខាធិការ នៃក្រុមប្រឹក្សាជាតិអភិវឌ្ឍដោយចិរភាព បានមានប្រសាសន៍ថា មានរបាយការណ៍ជាច្រើន ដែលបានបង្ហាញអំពីផលប៉ះពាល់អវិជ្ជមាន ដែលបណ្តាលមកពីការប្រែប្រួលអាកាសធាតុនៅកម្ពុជា ហើយតម្លៃបាត់បង់សរុបដោយគ្រោះទឹកជំនន់នៅក្នុងឆ្នាំ២០១១ មានចំនួន ៦៣៤លានដុល្លារអាម៉េរិក និង ចំនួន៣៥៦លានដុល្លារអាម៉េរិកទៀតនៅក្នុងឆ្នាំ ២០១៣ រួមជាមួយនឹងតម្លៃបាត់បង់ក្នុងផលិតភាពការងារដោយសារកំដៅខ្លាំង ត្រូវបានព្យាករណ៍ក្នុងប្រមាណ ៣ភាគរយ នៃផលិតផលក្នុងស្រុកសរុបនៅឆ្នាំ២០១០ ដែលបញ្ហានេះ គឺជាផលលំបាក នៃការប្រែប្រួលអាកាសធាតុ វាប៉ះពាល់ដល់ការអភិវឌ្ឍដោយចិរភាព ប៉ះពាល់ដល់កិច្ចខិតខំប្រឹងប្រែងកាត់បន្ថយភាពក្រីក្រ និងការអភិវឌ្ឍសេដ្ឋកិច្ចជាតិ ។

ឯកឧត្តមមានប្រសាសន៍ទៀតថា យោងតាមការសិក្សារបស់ក្រសួងសេដ្ឋកិច្ចនិងហិរញ្ញវត្ថុ និង ក្រុមប្រឹក្សាជាតិអភិវឌ្ឍដោយចិរភាព បានរកឃើញថា ក្រោមសេណារីយ៉ូចម្បង សីតុណ្ហភាពសកលនឹងរក្សាកំណើននៅក្រោម២អង្សាសេ នៅឆ្នាំ២១០០ ហើយបើសិនជាកម្ពុជារក្សាការវិនិយោគកម្រិតបច្ចុប្បន្ន លើសកម្មភាពបន្សាំទៅនឹងការប្រែប្រួលអាកាសធាតុនោះ ផលប៉ះពាល់ពីការប្រែប្រួលអាកាសធាតុ នឹងកាត់បន្ថយផលិតផលក្នុងស្រុក ចំនួន ២,៥ភាគរយ នៅឆ្នាំ២០៣០ និង ចំនួន៩,៨ភាគរយ នៅឆ្នាំ២០៥០ ដូច្នេះ សិក្ខាសាលានេះ គឺជាវេទិកាមួយដ៏មានតម្លៃ សម្រាប់ស្វែងយល់ពីការអនុវត្ត វិធានការឆ្លើយតបនានានៅថ្នាក់មូលដ្ឋាន និង ពិភាក្សាចែករំលែកចំណេះដឹង ស្តីពីវិធីសាស្ត្រសមស្រប ស្វែងយល់អំពីបញ្ហាប្រឈមនៅថ្នាក់មូលដ្ឋាន កំណត់នូវឧបករណ៍ជំនួយនានា និង រៀនសូត្រពីករណីជោគជ័យទាក់ទងលើការងារបន្សាំទៅនឹងអាកាសធាតុថ្មី ដើម្បីកាត់បន្ថយហានីភ័យគ្រោះមហន្តរាយ ។

គួររំលឹកថា ថ្មីៗនេះ ក្រុមការងារអន្តររដ្ឋាភិបាល ស្តីពីការប្រែប្រួលអាកាសធាតុ បានបញ្ជាក់ម្តងទៀតថា សកម្មភាពរបស់មនុស្ស បានបង្កឲ្យសីតុណ្ហភាពមធ្យមពិភពលោកកើន១អង្សាសេ ដោយធៀបទៅនឹងសីតុណ្ហភាពសម័យមុនបដិវត្តឧស្សាហកម្ម ហើយនឹងបន្តកើនដល់១.៥អង្សាសេ រវាងឆ្នាំ២០៣០ និង ២០៥០ ហើយការកំហិតសីតុណ្ហភាពពិភពលោកត្រឹម ១.៥ អង្សាសេ គឺតម្រូវឲ្យមានការផ្លាស់ប្តូរយ៉ាងរហ័ស ស៊ីជម្រៅ នូវគ្រប់ទិដ្ឋភាពទាំងអស់នៃសង្គម ខណៈដែលរាជរដ្ឋាភិបាលកម្ពុជា បានយកចិត្តទុកដាក់យ៉ាងខ្លាំង លើការឆ្លើយតបនឹងបញ្ហាប្រែប្រួលអាកាសធាតុ ដោយបានប្រកាសឲ្យប្រើប្រាស់ ផែនការយុទ្ធសាស្ត្រឆ្លើយតបនឹងការប្រែប្រួលអាកាសធាតុកម្ពុជា បានបង្កើតយន្តការចាំបាច់នានានិងអនុវត្តកម្មវិធីជាតិជាច្រើន ក្នុងន័យកាត់បន្ថយហានីភ័យអាកាសធាតុនៅក្នុងប្រទេស និងរួមចំណែកដល់កិច្ចខិតខំប្រឹងប្រែង ជាសាកលផងដែរ ៕