ថ្មីៗនេះ អាជ្ញាធរជាតិអប្សរា បន្តកម្មវិធីអប់រំបេតិកភណ្ឌក្នុងតំបន់អង្គរ នៅសាលាបឋមសិក្សាបន្ទាយសំរ៉ែ ដែលជាសាលាគោលដៅទី២ ដោយធ្វើការចែករំលែកចំណេះដឹង ពីអ្នកជំនាញបុរាណវិទ្យានៃអាជ្ញាធរជាតិអប្សរា ទាំងផ្នែកប្រវត្តិសាស្ត្រ វប្បធម៌ប្រពៃណី ជំនឿ សាសនា បរិស្ថាន និងតួនាទីរបស់កុមារ ក្នុងការរួមចំណែកថែរក្សានិងស្គាល់ពីកេរតំណែលដែលមានក្នុងតំបន់ខ្លួនរស់នៅ ក្នុងបំណងចូលរួមចំណែកជាមួយវិស័យអប់រំ បញ្ជ្រាបចំណេះដឹងផ្នែកបេតិកភណ្ឌ បរិស្ថាន និងបំនិននៃការអាន ដល់កុមារដែលរស់នៅក្នុងតំបន់អង្គរ។
លោក ខៀវ ច័ន្ទ មន្ត្រីជំនាញបុរាណវិទ្យានៃមជ្ឈមណ្ឌលអន្តរជាតិស្រាវជ្រាវនិងតម្កល់ឯកសារអង្គរ និង;វាគ្មិននៃកម្មវិធី បានឱ្យដឹងថា ការបណ្តុះឱ្យកុមារស្គាល់ពីប្រវត្តិសាស្ត្រ ពីមរតកដែលខ្លួនមាន ធ្វើឱ្យពួកគេចេះស្រឡាញ់ យល់ពីតម្លៃ និងចូលរួមការពារ ខណៈដែលនៅតាមបណ្តាប្រទេសជិតខាង និងប្រទេសជឿនលឿន ក្នុងប្រព័ន្ធអប់រំគេបានបញ្ចូលមេរៀននេះឱ្យកុមារស្គាល់ពីតូចៗ ហើយគេធ្វើយូរហើយដែរ តែប្រទេសយើងមិនទាន់បានធ្វើពេញដៃជើងនៅឡើយ ហើយបច្ចុប្បន្ននេះ អាជ្ញាធរជាតិអប្សរា ក៏កំពុងធ្វើសៀវភៅបេតិកភណ្ឌភាគទី៣ ដែលមានកម្រិតខ្ពស់ជាងមុនឱ្យសិស្សស្គាល់ពីអ្វីទៅជាអង្គរ និងអនុវត្តកម្មវិធីអប់រំបេតិកភណ្ឌសហការជាមួយអង្គការគាំពារកេរមរតកដល់សិស្សនៅអនុវិទ្យាល័យស្រះស្រង់ ដើម្បីបង្ខិតសិស្សកម្ពុជាកុំឱ្យមានគំលាត អំពីការយល់ដឹងពីបេតិកភណ្ឌខ្លួនឆ្ងាយពីបរទេសពេក។
មានប្រសាសន៍ក្នុងឱកាសនោះ អ្នកស្រី កាន កែម នាយិការងនៃសាលាបឋមសិក្សាបន្ទាយសំរ៉ែ បានថ្លែងអំណរគុណដល់អាជ្ញាធរជាតិអប្សរា ដែលបានបង្កើតកម្មវិធីនេះឡើង ដែលជាប្រយោជន៍ដល់សិស្សានុសិស្ស ឱ្យពួកគេបានដឹងនិងស្គាល់ពីបេតិកភណ្ឌនៅកន្លែងដែលពួកគេរស់នៅ ពិសេសអាចប្រតិបត្តិខ្លួនបានល្អ ក្នុងការរួមចំណែកថែរក្សា ការពារពេលពួកគេទៅលេងតាមប្រាសាទផង ខណៈកន្លងមក កម្មវិធីបែបនេះមិនមានទេ តែសាលាធ្លាប់ធ្វើម្តងកាលពេលលោកគ្រូអ្នកគ្រូធ្វើតែងសេចក្តីអំពីប្រាសាទ ហើយនាំសិស្សទៅសង្កេតដល់បុរាណដ្ឋានផ្ទាល់ ដូច្នេះបើមានកម្មវិធីបែបនេះច្រើន សិស្សានុសិស្សនឹងបានស្វែងយល់ដឹងច្រើនពីតំបន់បេតិកភណ្ឌដែលខ្លួនរស់នៅ ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#អាជ្ញាធរជាតិអប្សរា
