លោក សុខ ថុល ឋានន្តរសកិ្តវរៈមន្ត្រីថ្នាក់លេខ១ នាយករងរដ្ឋបាលសាលាខេត្ត ត្រូវបានប្រកាសតែងតាំងឱ្យកាន់មុខតំណែងជានាយករដ្ឋបាលសាលាខេត្ត សៀមរាប ជំនួសលោក នួន ពុទ្ឋារ៉ា ដែលត្រូវផ្ទេរភារកិច្ចទៅកាន់តំណែងជា អភិបាលក្រុងសៀមរាប ដែលពិធីនេះបានប្រារព្ឋធ្វឡើងកាលពីព្រឹកថ្ងៃទី១៤ ខែ វិច្ឆិកា ឆ្នាំ២០១៨ នៅរដ្ឋបាលសាលាខេត្តសៀមរាប ក្រោមអធិបតីភាពរបស់ឯកឧត្តមបណ្ឌិត ឃឹម ប៊ុនសុង អភិបាលខេត្តសៀមរាប ។
ឯកឧត្តមបណ្ឌិត ឃឹម ប៊ុនសុង មានប្រសាសន៍ថា ការប្រកាសតែងតាំង លោក សុខ ថុល ជានាយករដ្ឋបាលសាលាខេត្តនៅពេលនេះ ក៏មានការជឿជាក់ យ៉ាងច្បាស់ពីរាជរដ្ឋាភិបាល ក្រសួងមហាផ្ទៃ និង អាជ្ញាធរខេត្ត ដែលជាការលើកទឹកចិត្តដល់មន្ត្រី ឲ្យបន្តខិតខំបំពេញភារកិច្ច ក្នុងការបម្រើជាតិមាតុភូមិ ប៉ុន្តែប្រការសំខាន់នេះ សុំឲ្យនាយករដ្ឋបាលថ្មី ធ្វើយ៉ាងណាត្រូវខិតខំ ប្រឹងប្រែងយកចិត្តទុកដាក់ក្នុងការអនុវត្តន៍នូវតួនាទីភារកិច្ចរបស់ខ្លួន ដោយឈរ លើជំហរទទួលខុសត្រូវលើការងារ រក្សាសាមគ្គីឯកភាពផ្ទៃក្នុង ដាស់តឿនក្រើនរំលឹកគ្នាទៅវិញទៅមក ដោយប្រកាន់ខ្ជាប់ នូវគោលការណ៍គ្រឹះទាំង៤សម្រាប់មន្ត្រី មុខងារសាធារណៈ គឺឆន្ទៈម្ចាស់ការ ភក្ដីភាព មនសិការវិជ្ជាជីវៈ និង វប្បធម៌សេវាសាធារណៈ និងត្រូវបន្តសហការល្អគ្រប់ជាមួយបណ្តាក្រសួង ស្ថាប័ន អង្គភាព នានា គោរពនិងអនុវត្តន៍តាមរដ្ឋធម្មនុញ្ញ ច្បាប់ និងលិខិតបទដ្ឋានគតិយុត្តិនានា របស់រាជរដ្ឋាភិបាលកម្ពុជា ក្រសួងមហាផ្ទៃ និង សេចក្តីណែនាំរដ្ឋបាលខេត្ត ឱ្យមានប្រសិទ្ឋភាពខ្ពស់ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ប្រកាសនាយករដ្ឋបាលសាលាខេត្ត
ព័ត៌មានជាតិ ថ្មីៗ
