នៅក្នុងកិច្ចប្រជុំបូកសរុបគណៈកម្មការរៀបចំព្រះរាជពិធីបុណ្យអុំទូក បណ្តែតប្រទីប និង សំពះព្រះខែ អកអំបុក នៅខេត្តសៀមរាប នាព្រឹកថ្ងៃទី ១៤ ខែវិច្ឆិកា ឆ្នាំ២០១៨នេះ លេខាធិការដ្ឋាន នៃគណៈកម្មការរៀបចំបុណ្យអុំទូកខេត្តសៀមរាប បានឲ្យដឹងថា ទូកដែលបានសុំដាក់ពាក្យចូលមកប្រកួតមានចំនួន៣១ទូក ដែលក្នុង១ទូក មានចំណុះ ២២នាក់ ក្នុងនោះមានទូកស្រី ០៥ទូក ព្រមទាំងមានប្រទីប មកពីបណ្តាមន្ទីរ អង្គភាព និង ក្រុមហ៊ុនផងដែរ សម្រាប់ការប្រណាំងទូក.ង ដែលមានរយៈពេល០២ថ្ងៃ ចាប់ពីថ្ងៃទី២១ និងទី២២ ខែវិច្ឆិកា ឆ្នាំ២០១៨នេះ នៅតាមដងស្ទឹងសៀមរាប ។
មានប្រសាសន៍ក្នុងឱកាសនោះ ឯកឧត្តមបណ្ឌិត ឃឹម ប៊ុនសុង អភិបាលខេត្តសៀមរាប បានឲ្យដឹងថា ការរៀបចំព្រះរាជពិធីបុណ្យអុំទូក បណ្តែតប្រទីប និង សំពះព្រះខែ អកអំបុកនេះ គឺធ្វើឡើងដើម្បីរំលឹក និង គោរពដល់វីរៈភាពនៃបុព្វបុរសទាហានជើងទឹកជំនាន់ដើម ដែលបានពលីជិវិតក្នុងការធ្វើសឹកសង្គ្រាមតាមផ្លូវទឹក ក្នុងការកម្ចាត់ពួកសត្រូវឈ្លានពាន ហើយទទួលបានជ័យជំនះជូនជាតិមាតុភូមិអង្គរនៃយើង ដូច្នេះ ដើម្បីឲ្យបងប្អូនប្រជាពលរដ្ឋទាំងក្នុង និង ក្រៅខេត្ត ព្រមទាំងភ្ញៀវទេសចរណ៍ បានទស្សនាកម្សាន្តសប្បាយនោះ សូមឲ្យថ្នាក់ដឹកនាំមន្ទីរ អង្គភាព អាជ្ញាធរក្រុង ស្រុក និង អ្នកពាក់ព័ន្ធទាំងអស់ ត្រូវធ្វើការយកចិត្តទុកដាក់ទៅលើការងារសន្តិសុខ , សណ្តាប់ធ្នាប់សាធារណៈ , ការសម្អាតអនាម័យ និងបរិស្ថាន ដោយសហការធ្វើការប្រមូលសំរាមឱ្យបានស្អាត ជាពិសេសត្រូវត្រួតពិនិត្យមើលឲ្យបានហ្មត់ចត់នូវប្រព័ន្ឋភ្លើងបំភ្លឺសាធារណៈ ។
ឯកឧត្តមបណ្ឌិត ឃឹម ប៊ុនសុង មានប្រសាសន៍បញ្ជាក់ទៀតថា ក្នុងគោលដៅលើកស្ទួយវប្បធម៌ ទំនៀបទម្លាប់ និងប្រពៃណីជាតិនោះ សូមឲ្យធ្វើការផ្សព្វផ្សាយឲ្យបានទូលំទូលាយ ដើម្បីទាក់ទាញអារម្មណ៍ដល់ភ្ញៀវទេសចរណ៍ជាតិ អន្តរជាតិ ដើម្បីឲ្យពួកគេចង់ចូលមកទស្សនាកម្សាន្ត នូវសម្បត្តិវប្បធម៌ខ្មែរយើង ដែលសម្បូរទៅដោយប្រាង្គប្រាសាទ រមណីដ្ឋានធម្មជាតិ នៅលើទឹកដីប្រវត្តិសាស្ត្រសៀមរាប ព្រោះថា ខេត្តសៀមរាបយើងនេះ បានក្លាយជាតំបន់គោលដៅនៃភ្ញៀវទេសចរណ៍ នៅលើពិភពលោក ព្រមទាំងទទួលបានការចាប់អារម្មណ៍ដ៏លើសលុបពីអ្នកធ្វើដំណើរ និង ទេសចរអន្តរជាតិរាប់លាននាក់ នៅលើគេហទំព័ររបស់ទីភ្នាក់ងារប្រឹក្សាយោបល់លើការធ្វើដំណើរ (TripAdvisor) ដោយសារតែប្រាសាទអង្គរវត្តរបស់កម្ពុជា បានទទួលចំណាត់ថ្នាក់លេខ១ ជាសំណង់ប្រវត្តិសាស្ត្រដ៏អស្ចារ្យបំផុតលើពិភពលោកសម្រាប់ឆ្នាំ២០១៨ ក្នុងចំណោមសំណង់បុរាណទាំង២៥ ដែលនេះជាការបញ្ជាក់ថា ពិភពលោក នៅតែសាទរចំពោះសំណង់អច្ឆរិយរបស់ខ្មែរ ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ប្រណាំងទូក.ង
