កាលពីវេលាម៉ោង១រសៀល ថ្ងៃទី១៣ ខែវិច្ឆិកា ឆ្នាំ២០១៨ម្សិលមិញនេះ កម្លាំងនគរបាលប្រឆាំងបទល្មើសសេដ្ឋកិច្ចខេត្តសៀមរាប បានចុះបង្ក្រាបទីតាំងលក់គ្រឿងក្រអូបយីហោ សុខ បញ្ញាពេជ្រ ពីបទបើកគ្មានច្បាប់ទម្លាប់ និងលក់ផលិតផលក្លែងក្លាយ ជាប្រភេទឡេលាយ មានទីតាំងនៅតាមបណ្តោយផ្លូវជាតិលេខ៦ខាងលិចផ្សារលើធំថ្មី ក្នុងភូមិដកពោធិ៍ សង្កាត់ស្លក្រាម ក្រុងសៀមរាប ដែលមានម្ចាស់ឈ្មោះ ជា ដារ៉េត ភេទប្រុស អាយុ៣៥ឆ្នាំ ។
លោកវរសេនីយ៍ឯក សឿន សេន នាយការិយាល័យប្រឆាំងបទល្មើសសេដ្ឋកិច្ច នៃស្នងការនគរបាលខេត្តសៀមរាប បានឲ្យដឹងថា ការចុះបង្ក្រាបនេះ គឺក្រោមការដឹកនាំផ្ទាល់ពីសំណាក់លោកជួន សុបញ្ញា ព្រះរាជអាជ្ញារង អមសាលាដំបូងខេត្តសៀមរាប និង កម្លាំងនគរបាលសេដ្ឋកិច្ចខេត្ត សហការជាមួយមន្ទីរសុខាភិបាលខេត្តសៀមរាប ព្រមទាំងអាជ្ញាធរមូលដ្ឋានផងដែរ ហើយការចុះបង្ក្រាបទីតាំងលក់គ្រឿងក្រអូបយីហោ សុខ បញ្ញាពេជ្រនេះ គឺយើងបានស្រាវជ្រាវរកឃើញការបើកគ្មានច្បាប់ទម្លាប់ និងលក់ផលិតផលក្លែងក្លាយ ដោយដកហូតវត្ថុតាងបាន រួមមាន ៖ ឡេលាយ គ្មានច្បាប់ទម្លាប់ ចំនួន ១១មុខ ស្មើនឹង១៧០៦ប្រអប់។
លោក សឿន សេន បញ្ជាក់ទៀតថា ចំពោះម្ចាស់ទីតាំង ត្រូវកម្លាំងលោកបាននាំខ្លួនទៅសាកសួរនៅស្នងការខេត្តបន្ថែមទៀត ដើម្បីស្រាវជ្រាវរកអ្នកផលិតឡេក្លែងក្លាយទាំងនេះយកផ្តន្ទាទោសតាមផ្លួវច្បាប់ ព្រោះម្ចាស់ទីតាំងខាងលើនេះបានឆ្លើយសារភាពថា លោកគ្រាន់តែទិញយកមកលក់ហើយមិនដឹងពីផ្លូវច្បាប់ ហើយចំពោះករណីនេះ សមត្ថកិច្ចនៅមិនទាន់ដឹងថា ត្រូវឃាត់ខ្លួនឬយ៉ាងណានោះទេ ពោលគឺអាស្រ័យលើលោក ជួន សុបញ្ញា ព្រះរាជអាជ្ញារង អមសាលាដំបូងខេត្តសៀមរាប ជាអ្នកសម្រេច ថាត្រូវឃាត់ខ្លួនឬក៏ផាកពិន័យ ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ផលិតផលក្លែងក្លាយ
