បច្ច័យចំនួនជាង ២២លាន៩៧ម៉ឺនរៀល និង ១.០៥០ដុល្លារអាម៉េរិក រួមជាមួយនឹងសម្ភារបរិក្ខាជាបរិវារ នៃកឋិនសាមគ្គីមួយដែលផ្ដួចផ្ដើមដឹកនាំដោយព្រះតេជគុណ រតនឃោសកោ សោម សេរីឬទ្ឋី គង់នៅរាជធានីភ្នំពេញ រួមជាមួយព្រះសង្ឃ និងប្រជាពុទ្ឋបរិស័ទជិតឆ្ងាយ មួយចំនួនមកពីខេត្តព្រះវិហារ ខេត្តកំពង់ឆ្នាំង និងខេត្តសៀមរាប ព្រមទាំងប្រជាពុទ្ឋបរិស័ទនៅមូលដ្ឋាននោះផង ត្រូវបានវេរប្រគេនដល់ព្រះសង្ឃ គង់នៅក្នុងទីសំណាក់សង្ឃប្រាសាទសង្កែសឹង្ហ ស្ថិតក្នុងឃុំស្វាយលើ ស្រុកស្វាយលើ កាលពីថ្ងៃទី១១ ខែវិច្ឆិកា ឆ្នាំ២០១៨នេះ ដើម្បីបែងចែកទុកសាងសង់ហេដ្ឋារចនាសម្ព័ន្ឋសម្រាប់ជាសម្បត្តិគរុភ័ណ្ឌវត្ត សម្រាប់អភិវឌ្ឍន៍ប្រែក្លាយទីសំណាក់សង្ឃនេះ ឱ្យក្លាយទៅជាវត្តពេញច្បាប់ ស្របតាមសំណូមពរ និងសេចក្តីត្រូវការរបស់ប្រជាពុទ្ឋបរិស័ទនៅមូលដ្ឋានជិតនោះ ដែលបានស្នើសុំកាលពីពេលកន្លងមក។
លោកអ៊ំ ហ៊ុយ ស៊ីថា ជាគណៈកម្មការអាចារ្យប្រចាំនៅទីសំណាក់សង្ឃប្រាសាទសង្កែសឹង្ហ បានឲ្យដឹងថា បានជាហៅថាទីសំណាក់សង្ឃ ព្រោះទីនេះមិនទាន់ក្លាយជាវត្តពេញសិទ្ឋិនៅឡើយទេ ដោយកាលពីពេលកន្លងមក ព្រះសង្ឃ គណៈកម្មការ និងប្រជាពុទ្ឋបរិស័ទ បានសំណូមពរសុំបង្កើតវត្តមួយ មានឈ្មោះថា វត្តប្រាសាទសង្កែសឹង្ហ ហើយសំណើសុំនោះ បានស្នើទៅដល់អាជ្ញាធរភូមិឃុំ ស្រុក ការិយាល័យធម្មការស្រុក និងទៅក្រសួងខាងលើៗរួចរាល់ហើយ ប៉ុន្តែអាជ្ញាធរមូលដ្ឋាន បានឯកភាពថា ឱ្យសាងសង់ត្រឹមជាសំណាក់សង្ឃសិន ព្រោះខ្លាចខ្វះលទ្ឋភាពមិនអាចបង្កើតជាវត្តបាន ត្រូវចោលពាក់កណ្តាលទី វារឹតតែនាំបញ្ហាស្មុគ្រស្មាញ ដូច្នេះត្រូវរង់ចាំមើលដំណើរការអភិវឌ្ឍឱ្យលេចចេញរូបរាងជាដុំកំភួនសិន ទើបជួយរៀបចំឯកសារបង្កើតជាវត្តពេញលក្ខណៈស្របតាមច្បាប់និងលិខិតបទដ្ឋានផ្សេងៗ។
ព្រះតេជគុណ ឆន្ទៈរក្ខិត្តោ សំ ង៉ែត តំណាងដឹកនាំសង្ឃ គង់ចាំនៅទីសំណាក់សង្ឃ មានថេរដិកាថា ការស្នើសុំកសាងវត្តនេះគឺធ្វើទៅតាមសំណើរសុំរបស់ប្រជាពលរដ្ឋនៅមូលដ្ឋាននេះ ដែលមានចំនួនជិត៨០០គ្រួសារ ដោយពួកគាត់បញ្ជាក់ថា នៅពេលមានបុណ្យទានម្តងៗ ពួកគាត់ត្រូវធ្វើដំណើរទៅកាន់វត្តផ្សេងៗ មានចម្ងាយឆ្ងាយប្រមាណជា៨ទៅ១២គីឡូម៉ែត្រ ជាពិសេសមនុស្សចាស់គាត់ខ្វះលទ្ឋភាព និងពិបាកក្នុងការធ្វើដំណើរ ដើម្បីទៅសមាទានសីល និងធ្វើបុណ្យទានផ្សេងៗ ។
ព្រះតេជគុណ សំ ង៉ែត មានថេរដិកាទៀតថា តាមរយៈបច្ច័យបានពីសទ្ឋាប្រជាពលរដ្ឋនៅមូលដ្ឋាន បានចាប់ផ្តើមអភិវឌ្ឍន៍បន្តិចម្តងៗ ដោយចាក់ដីទីធ្លា កសាងប្រព័ន្ឋផ្លូវ សាងសង់សាលាឆាន់ សាឡុំ អណ្តូងទឹក បន្ទប់ទឹក និង កុដិសង់ពីឈើប្រក់ក្បឿងចំនួន១៥ នៅក្នុងខែកុម្ភៈឆ្នាំ២០១៨ និង ទីតាំងទីសំណាក់សង្ឃនេះ មានទទឹង១១០ ម៉ែត្រនិងបណ្តោយ១៥៧ម៉ែត្រ ជាដីបម្រុងទុក និងបានការស្រុះស្រួលពីពុទ្ឋបរិស័ទ ទិញដីបន្ថែម ហើយបើតាមការសង្កេតជាក់ស្តែង គ្រាន់តែក្នុងរយៈពេល៨ខែកន្លងមកនេះ ទីសំណាក់នេះ ទទួលបាននូវសមិទ្ឋផលជាច្រើន ហេតុនេះព្រះអង្គសង្ឃឹមរំពឹងទុកថា យ៉ាងយូរបីឆ្នាំ ទីនេះនឹងក្លាយជាវត្តអារាមពេញសិទ្ឋិជាក់ជាមិនខាន ខណៈបច្ចុប្បន្នអារាមបណ្តោះអាសន្ននេះ មានភិក្ខុ៥អង្គ និងសាមណេរ១១អង្គ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
