ឯកឧត្តម ទិន ពន្លក អគ្គលេខាធិការក្រុមប្រឹក្សាជាតិអភិវឌ្ឍដោយចិរភាព មានប្រសាសន៍ថា នៅក្នុងយុទ្ធសាស្ត្រចតុកោណដំណាក់កាលទី៤ នៃរាជរដ្ឋាភិបាលកម្ពុជាអណត្តិទី៦ បានកំណត់ថា បញ្ហាប្រែប្រួលអាកាសធាតុ គឺជាកត្តារាំងស្ទះដល់ជាអភិវឌ្ឍជាតិ ខណៈដែលយុទ្ធសាស្ត្រចតុកោណដំណាក់កាលទី៤នេះ បានកំណត់បញ្ហាប្រែប្រួលអាកាសធាតុ ស្តីការអភិវឌ្ឍប្រកបដោយចិរភាពនិងបរិយាប័ន្ន និង ស្តីពីការធានាចិរភាពបរិស្ថាន ការរៀបចំខ្លួនឆ្លើយតប ការប្រែប្រួលអាកាសធាតុ នៅក្នុងមុំទី៤ ។
ឯកឧត្តម មានប្រសាសន៍ទៀតថា ដើម្បីអនុវត្តន៍យុទ្ធសាស្ត្រនេះ រាជរដ្ឋាភិបាលកម្ពុជា ផ្តោតជាទិភាពដើម្បីអនុវត្តបន្ត ផែនការយុទ្ធសាស្ត្រជាតិ ស្តីពីការអភិវឌ្ឍបៃតង សម្រាប់២០១៣ដល់ឆ្នាំ២០៣០ , ផែនការយុទ្ធសាស្ត្រឆ្លើយតបទៅនឹងការប្រែប្រួលអាកាសធាតុកម្ពុជា សម្រាប់ឆ្នាំ២០១៨ដល់ឆ្នាំ២០២៣ , យុទ្ធសាស្ត្រនិងផែនការសកម្មភាពបរិស្ថានជាតិ សម្រាប់ឆ្នាំ២០១៦ ដល់ឆ្នាំ២០២៣ និង ផែនការយុទ្ធសាស្ត្ររ៉េដបូក ការប្រើប្រាស់មូលនិធិបរិស្ថានឲ្យមានប្រសិទ្ធភាព ដើម្បីធានាការអភិវឌ្ឍសេដ្ឋកិច្ច បំភាយកាបូនតិច ធន់នឹងការប្រែប្រួលអាកាសធាតុ ។
ឯកឧត្តម ទិន ពន្លក អគ្គលេខាធិការក្រុមប្រឹក្សាជាតិអភិវឌ្ឍដោយចិរភាព មានប្រសាសន៍យ៉ាងដូច្នេះ នៅក្នុងកិច្ចប្រជុំលើកទី៣ របស់ក្រុមបច្ចេកទេសប្រែប្រួលអាកាសធាតុ នាព្រឹកថ្ងៃទី១២ ខែវិច្ឆិកា ឆ្នាំ២០១៨ នៅក្រុងសៀមរាប ដែល សហការរៀបចំដោយក្រសួងបរិស្ថាន និង គាំទ្រដោយកម្មវិធីសម្ព័ន្ធភាពប្រែប្រួលអាកាសធាតុកម្ពុជា ។
កិច្ចប្រជុំនេះត្រូវបានពិនិត្យ និង អនុម័តលើកំណត់ហេតុនៃកិច្ចប្រជុំលើកទី២ របស់ក្រុមការងារបច្ចេកទេសប្រែប្រួលអាកាសធាតុ ដែលបានធ្វើឡើងនៅខេត្តបាត់ដំបង កាលពីក្នុងអំឡុងខែមិថុនា ឆ្នាំ២០១៨ កន្លងទៅ និង ត្រូវបានពិភាក្សាផងដែរ ស្តីអំពីការដោះស្រាយបញ្ហាប្រែប្រួលអាកាសធាតុ ក្នុងផែនការយុទ្ធសាស្ត្រអភិវឌ្ឍជាតិ និង ពិនិត្យមើលបច្ចុប្បន្នភាព លើកិច្ចខិតខំប្រឹងប្រែង ដើម្បីបញ្ជ្រាបបញ្ហាប្រែប្រួលអាកាសធាតុ ទៅក្នុងផែនការយុទ្ធសាស្ត្រអភិវឌ្ឍជាតិ ២០១៩-២០២៣ ដោយរាប់បញ្ចូលទាំងការផ្តល់នូវគោលការណ៍បច្ចេកទេស ជូនដល់ក្រសួងវិស័យ សម្រាប់រៀបចំធាតុចូលក្នុងផែនការយុទ្ធសាស្ត្រអភិវឌ្ឍជាតិ និង ផែនការយុទ្ធសាស្ត្រអភិវឌ្ឍតាមវិស័យ ។
គួររំលឹកដែរថា នៅក្នុងកិច្ចប្រជុំលើកទី២ របស់ក្រុមការងារបច្ចេកទេសប្រែប្រួលអាកាសធាតុ កាលពីអំឡុងខែមិថុនា ឆ្នាំ២០១៨នៅខេត្តបាត់ដំបងកន្លងមកនេះ កិច្ចប្រជុំបានកំណត់អភិក្រមសម្រាប់ការរៀបចំរបាយការណ៍វឌ្ឍនភាព នៃ ការអនុវត្តផែនការសកម្មភាពការប្រែប្រួលអាកាសធាតុ ( CCAPs ) និងបច្ចុប្បន្នភាពនៃការធ្វើសុក្រឹតភាពសូចនាករ គោលដៅអភិវឌ្ឍដោយចិរភាពទី ១៣ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#បរិស្ថាន
