នៅថ្ងៃទី១១ ខែវិច្ឆិកា ឆ្នាំ២០១៨ម្សិលមិញនេះ ព្រះសង្ឃនិងសប្បុរសជន សហការជាមួយអាជ្ញាធរមូលដ្ឋាន គណៈគ្រប់គ្រងសាលា និង សប្បុរសជន ក្នុងកម្មវិធីមរតកព្រះពុទ្ឋសាសនានិងសង្គម ដឹកនាំដោយ ព្រះតេជគុណ រតនឃោសកោ សោម សេរីឬទ្ឋី បាននិមន្តនិងអញ្ជើញ នាំយកសម្ភារសិក្សារួមមានសៀវភៅប៊ិច ចែកជូនដល់សិស្សានុសិស្សចំនួន២៥០នាក់ មកពីកម្រងសាលាបឋមសិក្សាអូប្រាំព្យាម រួមមាន សាលាបឋមសិក្សាចំរេះ និងសាលាបឋមសិក្សាត្រពាំងខ្ទះ ដែលស្ថិតនៅក្នុងឃុំស្វាយលើ ស្រុកស្វាយលើ ព្រមទាំងបានឧបត្ថម្ភជាថវិកាមួយចំនួនដល់លោកគ្រូអ្នកគ្រូ ផងដែរ ។
ព្រះតេជគុណ សោម សេរីឬទ្ឋី មានថេរដិកាថា ថ្វីត្បិតព្រះសង្ឃពុំមានធនធានថវិកាផ្ទាល់ខ្លួន ដែលរស់ដោយពឹងអាស្រ័យលើប្រជាពុទ្ឋបរិស័ទក្តី តែដោយសារចង់ឱ្យកូនចៅជំនាន់ក្រោយទទួលបានការសិក្សាមានចំណេះដឹងពិតប្រាកដ និងស្គាល់ពីបុណ្យបាប គុណទោស ចេះគោរពប្រតិបត្តិម្តាយឪពុក ចាស់ព្រឹទ្ឋាចារ្យ លោកគ្រូអ្នកគ្រូ ទើបព្រះអង្គ រួមជាមួយព្រះសង្ឃមួយចំនួន តែងតែបាននាំយកសម្ភារសិក្សាទោះតិចក្តីច្រើនក្តី ដើម្បីផ្សារភ្ជាប់រវាងព្រះសង្ឃនិង សិស្សានុសិស្ស ក្នុងន័យជួយលើកកម្ពស់វិស័យអប់រំ និងលើកទឹកចិត្តដល់សិស្សានុសិស្ស ឱ្យយកចិត្តទុកដាក់សិក្សារៀនសូត្រ ក៏ដូចជាដើម្បីបណ្តុះគុណធម៌ អប់រំសីលធម៌ ចរិយាធម៌ដល់សិស្សានុសិស្ស ដែលជារឿយៗតែងតែចុះទៅតាមសាលារៀន និងផ្តល់សម្ភារសិក្សាដល់សិស្ស ជាបន្តបន្ទាប់នៅតាមសាលារៀនជាច្រើននៅទីជនបទក្នុងខេត្តសៀមរាប ក្រោមការជួយឧបត្ថម្ភគាំទ្រថវិកា ពីសប្បុរសជនជិតឆ្ងាយ ។
លោកស្រី ជូច័ន្ទ សតិកា នាយិកាកម្រងសាលាបឋមសិក្សាអូប្រាំព្យាម មានប្រសាសន៍ថា សាលាបឋមសិក្សាត្រពាំងខ្ទះ កើតឡើងនៅឆ្នាំ២០១១ ជាឧបសម្ព័ន្ឋរបស់របស់សាលាបឋមសិក្សាអូប្រាំព្យាម ដែលបច្ចុប្បន្ន សាលាបឋមសិក្សាត្រពាំងខ្ទះ មានសិស្សទាំងប្រុសស្រីចំនួន១២១នាក់ កំពុងសិក្សាថ្នាក់ទី១ដល់ទី៦ មានគ្រូបង្រៀនចំនួន៤នាក់ ក្នុងនោះគ្រូក្របខ័ណ្ឌមួយនាក់ និងកិច្ចសន្យា៣នាក់ ហើយសាលាកំពុងជូបនូវកង្វះអគារសិក្សា ដោយសារកំណើនសិស្សមានចំនួនកើនឡើង ហើយអគារសិក្សាចាស់ទ្រុឌទ្រោមផងដែរ ។
លោកស្រីបញ្ជាក់ទៀតថា ក្នុងម៉ោងសិក្សា សិស្សអវត្តមានមានចំនួនច្រើន ដែលក្នុងមួយសប្តាហ៍អវត្តមានពី៤ទៅ៥នាក់ ដោយសារផ្ទះសម្បែងនៅឆ្ងាយ និងកង្វះមធ្យោបាយធ្វើដំណើរពីផ្ទះមកកាន់សាលា ប៉ុន្តែទោះជាយ៉ាងនេះក្ដី ដោយសារការខិតខំប្រឹងប្រែងបង្ហាត់បង្រៀនរបស់លោកគ្រូអ្នកគ្រូ យើងអាចស្ទង់បានថា សមត្ថភាពសិស្សានុសិស្សចាប់និងទទួលបានចំណេះដឹងប្រមាណជា៧០ភាគរយ ដូច្នេះតាមរយៈនេះ សូមសំណូមពរដល់មាតាបិតា អាណាព្យាបាលសិស្ស និងសិស្សានុសិស្សខ្លួនឯងផង ត្រូវយកចិត្តទុកដាក់ ជួយជំរុញលើកទឹកចិត្តផ្តល់ដំបូន្មានល្អៗ តាមដានការសិក្សានិងផ្តល់ឱកាសឱ្យអស់លទ្ឋភាពឱ្យកូនបានមកសិក្សាឱ្យបានពេញលេញតាមកាលវិភាគ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#សាលារៀន
