ផ្អែកតាមអនុក្រឹត្យលេខ ១០២៣ អនក្រ.តត ចុះថ្ងៃទី០២ ខែវិច្ឆិកា ឆ្នាំ២០១៨ ស្ដីពីការផ្ទេរភារកិច្ច និង តែងតាំងមន្ត្រីរាជការ ដែលចុះហត្ថលេខាដោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃទី១២ ខែវិច្ឆិកា ឆ្នាំ២០១៨ព្រឹកមិញនេះ លោក នួន ពុទ្ធារ៉ា អតីតនាយករដ្ឋបាលខេត្តសៀមរាប ត្រូវបានប្រកាសឲ្យចូលកាន់តំណែងជាអភិបាលក្រុងសៀមរាប ខណៈដែលលោក លោក សូរ ប្លាតុង អតីតអភិបាលក្រុងសៀមរាប ត្រូវបានផ្ទេរ និងប្រកាសឲ្យចូលកាន់តំណែងជាអភិបាលស្រុកប្រាសាទបាគង ជំនួសលោក ម៉ក់ សំភារ អតីតអភិបាលស្រុកប្រាសាទបាគង ដែលត្រូវបានចូលនិវត្តន៍ ដែឡពិធីនេះ បានប្រព្រឹត្តទៅក្រោមអធិបតីភាពឯកឧត្ដមបណ្ឌិត ឃឹម ប៊ុនសុង អភិបាលខេត្តសៀមរាប ។
ឯកឧត្ដមបណ្ឌិត ឃឹម ប៊ុនសុង មានប្រសាសន៍ថា ការផ្លាស់ប្ដូរលោក សូរ ប្លាតុង ពីក្រុងសៀមរាប ទៅស្រុកប្រាសាទបាគងនេះ មិនមែនលោកមានកំហុសក្នុងអាណត្តិលោកឡើយ ផ្ទុយទៅវិញ លោក សូរ ប្លាតុង បានបំពេញការងារយ៉ាងល្អ និងគួរយកគំរូតាម ខណៈដែលស្រុកប្រាសាទបាគងនេះ ជាក្រុងរណបរបស់ខេត្តសៀមរាប ហើយត្រូវការបុគ្គលដែលមានសមត្ថភាព និងបទពិសោធន៍ទៅគ្រប់គ្រង ដើម្បីចូលរួមអភិវឌ្ឍន៍តំបន់នេះឱ្យកាន់តែខ្លាំងឡើង ដូច្នេះតាមរយៈនេះ លោកសង្ឃឹមថា លោកអភិបាលស្រុកប្រាសាទបាគងថ្មីនេះ នឹងខិតខំយកចិត្តទុកដាក់កសាងប្លង់គោលប្រើប្រាស់ដីធ្លីឲ្យបានឆាប់រហ័ស សម្រាប់ប្រើប្រាស់នៅ ក្នុងកិច្ចសហប្រតិបត្តិការជាមួយក្រុងសៀមរាប ដែលបច្ចុប្បន្ននេះបានកសាងប្លង់គោលប្រើប្រាស់ដីរួចរាល់ហើយ ដែលនឹងត្រូវអនុវត្តនៅឆ្នាំ២០១៩ខាងមុខ និង ជំហានបន្ទាប់នៅក្នុងផែនការពង្រីកទីក្រុង ឲ្យក្លាយជាទីក្រុងទេសចរណ៍មួយដែលមានសោភ័ណ្ឌភាព ដូចនេះស្រុកប្រាសាទបាគង គឺស័ក្ដិសមជាទីបំផុត។
ជាការឆ្លើយតប លោក នួន ពុទ្ធារ៉ា អភិបាលក្រុងសៀមរាប និង លោកសូរ ប្លាតុង អភិបាលស្រុកប្រាសាទបាគង បានថ្លែងនូវការប្តេជ្ញាចិត្ត ចំពោះការងារថ្មីដែលថ្នាក់ដឹកនាំបានផ្តល់សេចក្តីទុកចិត្ត និងប្រគល់ឱ្យនៅពេលនេះ ហើយសន្យាខិតខំធ្វើកិច្ចការថ្មីនេះឱ្យបានល្អ តាមបទពិសោធន៍ការងារដែលធ្លាប់ឆ្លងកាត់រាប់មិនអស់ និងគ្រប់បែបបទ នាពេលកន្លងមក៕
អត្ថបទ និង រូបថត ៖ លោក ជា ស្រស់ និង លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ប្រកាសអភិបាលក្រុងសៀមរាប
