កាលពីថ្ងៃទី១២ ខែមករា ឆ្នាំ២០២០ ម្សិលមិញនេះរដ្ឋបាលស្រុកបន្ទាយស្រី ខេត្តសៀមរាប បានចាប់ផ្ដើមយុទ្ធនាការ”ផ្ទះ១អំពូល១” របស់ខ្លួនហើយ ដែលស្ថិតនៅក្នុងឃុំព្រះដាក់។
ដំណើរការនៃការតម្លើងបង្គោលទម្រ និងអំពូលប្រើថាមពលពន្លឺព្រះអាទិត្យ នៅទីតាំងចំនួន ៥១៨ គ្រោងនឹងតម្លើង ឲ្យហើយរួចរាល់ នៅក្នុងខែមករានេះ។
លោក ឃឹម ហ្វីណង់ អភិបាលស្រុកបន្ទាយស្រីបានបញ្ជាក់ថា គម្រោងសាកល្បង ការតម្លើងអំពូល ចំនួន ៥១៨ ទីតាំង ដែលស្ថិតនៅតាមផ្ទះប្រជាពលរដ្ឋក្នុងឃុំព្រះដាក់នេះ គឺជាការវាយតម្លៃជារួម លើលទ្ធផលនៃភូមិសាកល្បងមួយនេះ មុននឹងបន្តអនុវត្តនៅក្នុងភូមិ និងឃុំដទៃទៀត។
លោកអភិបាលស្រុកបានបង្ហាញដែរថា ក្នុងការសាកល្បងនេះ មានបញ្ហាមួយចំនួនដូចជា ការកំណត់ទីតាំងដាក់អំពូល និងបច្ចេកទេសចាក់សុីម៉ង់ត៍ការពារជើងទម្រអំពូល នៅមានការខ្វះខាត និងគួរត្រូវបានកែលម្អ។ ប៉ុន្តែលោកថា លោកសប្បាយចិត្តពេលដែលអ្វីៗដំណើរការទៅដូចការរំពឹងទុក ដូចជាប្រភេទអំពូលភ្លឺគ្រប់គ្រាន់ ដងទម្រខ្ពស់ និងរឹងមាំសមល្មម ជាពិសេសប្រជាពលរដ្ឋមានការសាទរពេញចិត្តចំពោះយុទ្ធនាការនេះ។
លោកអភិបាលស្រុកបានបញ្ជាក់បន្ថែមថា ការតម្លើងអំពូល នៅទីតាំង៥១៨កន្លែងនេះ គឺជាការឧបត្ថម្ភពីក្រុមហ៊ុនស៊ីថែល (SEATEL)។ បើមិនមានអ្វីប្រែប្រួលទេ លោកសង្ឃឹមថា ស្រុកបន្ទាយស្រី នឹងឈានទៅដល់ការសម្រេចបានការតម្លើងអំពូល នៅតាមផ្ទះទាំង១ម៉ឺនខ្នង នៅទូទាំងស្រុកបន្ទាយស្រីក្នុងឆ្នាំ២០២០នេះ តាមការគ្រោងទុក។ ដោយឡែកលោកអភិបាលស្រុក នៅមិនទាន់បញ្ជាក់ច្បាស់នៅឡើយទេ ថាបន្ទាប់ពីបញ្ចប់គម្រោងសាកល្បងនេះ តើប្រជាពលរដ្ឋ នឹងទទួលបានការតម្លើងអំពូលដោយមិនគិតថ្លៃ ដូចគម្រោងសាកល្បងនេះ ឬក៏មានការធ្វើបដិភាគថវិកានោះទេ?
អត្ថបទ និង រូបភាព៖ គឿន វេត
កែសម្រួល ៖ សេង ផល្លី
