កាលពីថ្ងៃទី២០ ខែមករា ឆ្នាំ២០២០ សមត្ថកិច្ច នៃស្នងការដ្ឋាននគរបាលខេត្តសៀមរាប បានបញ្ជូនជនសង្ស័យចំនួន ៨នាក់ ទៅកាន់សាលាដំបូងខេត្តសៀមរាប ពាក់ព័ន្ធនឹងករណីរក្សាទុក ជួញដូរ ចាត់ចែង និងប្រើប្រាស់ សារធាតុញៀនខុសច្បាប់។
ជនសង្ស័យទាំង ០៨នាក់នោះ មានអាយុចាប់១៨ឆ្នាំ រហូតដល់ ៣៣ឆ្នាំ ត្រូវបានឃាត់ខ្លួនកាលពីថ្ងៃទី១៩ ខែមករា ឆ្នាំ២០២០ ស្ថិតក្នុងភូមិសាស្ត្រស្រុកសូទ្រនិគម ដោយកម្លាំងអធិការដ្ឋាននគរបាលស្រុកសូទ្រនិគម សហការជាមួយកម្លាំងការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាប។ ក្នុងនោះ ឃាត់ខ្លួនបានក្នុងឃុំ កំពង់ឃ្លាំង ចំនួន ៤នាក់ ឃុំកៀនសង្កែ ចំនួន២នាក់ ឃុំដំដែក ចំនួន ១នាក់ និងឃុំខ្ចាស់ ចំនួន ១នាក់
សមត្ថកិច្ច បង្ហាញថា វត្ថុតាងដកហូតបានរួមមាន ម៉្សៅក្រាមពណ៌សថ្លា សរុបចំនួន ២២កញ្ចប់ ក្នុងនោះកញ្ចប់ធំចំនួន ១៧កញ្ចប់ និងកញ្ចប់តូចចំនួន ៥កញ្ចប់ ថ្នាំគ្រាប់យ៉ាម៉ាសញ្ញា W Y ពណ៌ក្រហមចំនួន ៧គ្រាប់ ទូរស័ព្ទដៃចំនួន ០១គ្រឿង ជញ្ជីងសម្រាប់ថ្លឹងសារធាតុញៀនចំនួន ០១ ឧបករណ៍ប្រើប្រាស់ និងសម្ភារវេចខ្ចប់មួយចំនួន ។
ព័ត៌មានជាតិ ថ្មីៗ
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក សេង ផល្លី
