ដើម្បីចូលរួមថែរក្សាសុខុមាលភាពប្រជាពលរដ្ឋកម្ពុជា ជាពិសេសក្នុងខេត្តសៀមរាប មុនឱកាសបុណ្យចូលឆ្នាំប្រពៃណីចិន នៅថ្ងៃទី២០ និងទី២១ ខែមករា ឆ្នាំ២០២០នេះ សាខាកាំកុងត្រូលខេត្តសៀមរាប ធ្វើការចុះពិនិត្យ ស្វែងរកចំណីអាហារខូចគុណភាព និងហួសកាលបរិច្ឆេទ នៅតាមទីផ្សារចំនួន៣ ក្នុងក្រុងសៀមរាប ។
ជាលទ្ធផល កាលពីថ្ងៃទី២០ ខែមករា ឆ្នាំ២០២០ មន្ត្រីសាខាកាំកុងត្រូលខេត្តសៀមរាប បានចុះត្រួតពិនិត្យចំណីអាហារនៅផ្សារក្រោម ស្ថិតក្នុងភូមិវិហារចិន សង្កាត់ស្វាយដង្គំ ក្រុងសៀមរាប ដោយដកហូតបាន សាច់ក្រកធ្វើពីសាច់មាន់ និងប្រហិតឈីស ១៦កញ្ចប់ ទម្ងន់ ៨គីឡូក្រាម ដែលផុតកំណត់កាលបរិច្ឆេទ និងខូចគុណភាព។ ចំណែកឯ អាជីវករ ត្រូវបានមន្ត្រីជំនាញ ធ្វើកិច្ចសន្យាបញ្ឈប់ការលក់ចំណីអាហារផុតកំណត់កាលបរិច្ឆេទ និងខូចគុណភាព និងពុំមានផាកពិន័យឡើយ។
ដោយឡែក នៅថ្ងៃទី២១ ខែមករា ឆ្នាំ២០២០ មន្ត្រីសាខាកាំកុងត្រូលខេត្តសៀមរាប បានចុះពិនិត្យនៅផ្សារទំនើបអាស៊ី និងផ្សារទំនើប ថៃ ហួត។ ជាលទ្ធផល ផ្សារទំនើបទាំង២នេះ ពុំមានដាក់លក់នូវចំណីអាហារ ផុតកំណត់កាលបរិច្ឆេទ និងខូចគុណភាពឡើយ។ ក្នុងឱកាសចុះត្រួតពិនិត្យនោះ មន្ត្រីសាខាកាំកុងត្រូលខេត្តសៀមរាប បានណែនាំដល់អ្នកគ្រប់គ្រងនៅតាមផ្សារទំនើបទាំងពីរនេះ ក៏ដូចជាហាងលក់ភេសជ្ជៈដទៃទៀត ក្នុងខេត្តសៀមរាប ត្រូវដាក់តម្លៃឥវ៉ាន់គ្រប់ប្រភេទជាប្រាក់រៀល ជំនួសប្រាក់ដុល្លារ ដែលជាគោលការណ៍ច្បាប់របស់រាជរដ្ឋាភិបាលកម្ពុជា ក្នុងការលើកកម្ពស់ ប្រាក់រៀល។
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក សេង ផល្លី
