កាលពីថ្ងៃទី ២៧ ខែមករា ឆ្នាំ២០២០ សាខាកាកបាទក្រហមកម្ពុជា ខេត្តសៀមរាប បានធ្វើការផ្សព្វផ្សាយអំពីចលនាអន្តរជាតិកាកបាទក្រហម អឌ្ឍចន្ទក្រហម និងផ្សព្វផ្សាយពីវិធីកាត់បន្ថយហានិភ័យ នៃការឆ្លងជំងឺរលាកសួត បង្កដោយមេរោគកូរ៉ូណាវីរុសប្រភេទថ្មី ជូនដល់គរុសិស្ស នៃសាលាគរុកោសល្យ និងវិក្រឹតការខេត្តសៀមរាប សរុបចំនួន ១៦៦នាក់ ។
លោកស៊ុ សំអន នាយកសាខាកាកបាទក្រហមកម្ពុជា ខេត្តសៀមរាប បានមានប្រសាសន៍ថា វគ្គផ្សព្វផ្សាយនេះ អនុវត្តន៍ ឡើងក្នុងគោលបំណងផ្ដល់នូវការយល់ដឹងបន្ថែម អំពីចលនាអន្តរជាតិកាកបាទក្រហម អឌ្ឍចន្ទក្រហម ឱ្យបានកាន់តែទូលំទូលាយ ជូនដល់គរុសិស្សឆ្នាំទី២ ដែលនឹងត្រូវក្លាយជាលោកគ្រូ អ្នកគ្រូ ហើយត្រូវចេញទៅបំពេញភារកិច្ចរបស់ខ្លួននៅក្នុងសហគមន៍វិញ។
ឆ្លៀតក្នុងឱកាសនោះ លោកនាយក បង្ហាញពី ស្ថានភាពបច្ចុប្បន្ន នៃជំងឺរលាកសួត បង្កដោយមេរោគកូរ៉ូណាវីរុសប្រភេទថ្មី ដែលពិភពលោកកំពុងតែព្រួយបារម្ភ ក៏ដូចជាវិធីបង្ការមួយចំនួន ដើម្បីកាត់បន្ថយហានិភ័យនៃការឆ្លងជំងឺនេះ រួមមាន៖
– លាងសម្អាតដៃជាមួយសាប៊ូជាប្រចាំ
– ខ្ទប់មាត់ និងច្រមុះនៅពេល ក្អក កណ្ដាស់ ឬត្រូវពាក់ម៉ាស់ជាចាំបាច់
– ចម្អិនម្ហូបអាហារ (សាច់ ឬស៊ុត) ឱ្យបានឆ្អិនល្អ
– ត្រូវប្រុងប្រយ័ត្នខ្ពស់ចំពោះអ្នកដែលមានជំងឺផ្ដាសសាយ
– ចៀសវាងការប៉ះពាល់សត្វព្រៃ ឬសត្វស្រុកដោយមិនបានការពារ។
ព័ត៌មានជាតិ ថ្មីៗ
លោកនាយក បានអំពាវនាវ ដល់គរុសិស្សដែលទទួលបានចំណេះដឹងនាពេលនេះ សូមធ្វើការផ្សព្វផ្សាយ បន្តទៀតឱ្យបានកាន់តែទូលំទូលាយ នៅក្នុងសហគមន៍របស់ខ្លួនបន្ថែមទៀត។
អត្ថបទ និង រូបភាព ៖ គឿន វេត
កែសម្រួលអត្ថបទ ៖ លោក សេង ផល្លី
