នៅព្រឹកថ្ងៃទី៣០ ខែមករា ឆ្នាំ២០២០នេះ លេខាធិការដ្ឋានរៀបចំការបោះឆ្នោតខេត្តសៀមរាប បានបើកវគ្គបណ្តុះបណ្តាលស្តីពី ការស្រង់ស្ថិតិប្រជាពលរដ្ឋប៉ាន់ស្មាន អ្នកចុះឈ្មោះបោះឆ្នោត ឆ្នាំ ២០២០ ក្រោមអធិបតិភាព លោក ពៅ ពិសិដ្ឋ អភិបាលរងខេត្ត តំណាងដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប និងឯកឧត្តម កុយ សង សមាជិកក្រុមប្រឹក្សាខេត្ត លោក នឹម វ៉ាន់សំ ប្រធានលេខាធិការដ្ឋានរៀបចំការបោះឆ្នោត និងមានការអញ្ជើញចូលរួមពីសំណាក់ សហការី នៃលេខាធិការដ្ឋាន រៀបចំការបោះឆ្នោតខេត្ត លោកស្នងការរងនគរបាលខេត្ត លោកលោកស្រីប្រធានអនុប្រធានមន្ទីរ អភិបាលក្រុងស្រុក ទាំង១២ លោកអធិការនគរបាលក្រុង ស្រុក ចៅសង្កាត់ និងអង្គភាពពាក់ព័ន្ធសរុបចំនួន ៤៥០នាក់ ។
ក្នុងឱកាសនោះ លោក ពៅ ពិសិដ្ឋ មានប្រសាសន៍ថា វគ្គបណ្តុះបណ្តាលនេះ គឺមានគោលបំណង ពង្រឹងសមត្ថភាពមន្ត្រី និងប្រសិទ្ធិភាពការងារ ហើយស្វែងយល់ពីគោលបំណងនៃការធ្វើស្ថិតិប្រជាពលរដ្ឋប៉ាន់ស្មាន ។ ជាពិសេស ការបំពេញតារាងស្រង់ស្ថិតិនីមួយៗអោយបានត្រឹមត្រូវដើម្បីបង្ហាញពីនីតិវិធីនៃការស្រង់ស្ថិតិប្រជាពលេដ្ឋប៉ាន់ស្មាន និងចែករំលែកវំណេះដឹង បទពិសោធន៍ទាក់ទងនឹងការងារកន្លងមក ។
លោក ពៅ ពិសិដ្ឋ បន្តថា ការស្រង់ស្ថិតិប្រជាពលរដ្ឋប៉ាន់ស្មានអ្នកចុះឈ្មោះបោះឆ្នោត គឺជាការអនុវត្តការងាររៀបចំត្រៀមបម្រើឱ្យការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ ដែល គ.ជ.ប តែងតែធ្វើជាទៀងទាត់ ដោយមានកិច្ចសហការអនុវត្តផ្ទាល់ពីអាជ្ញាធរឃុំ-សង្កាត់ និងការសម្របសម្រួលពីអាជ្ញាធររាជធានី-ខេត្ត ក្រុង-ស្រុក-ខណ្ឌ ។ ក្នុងនោះការងាររៀបចំត្រៀមនេះ គឺជាមុខងារជាភ្នាក់ងាររបស់ឃុំ-សង្កាត់ ដែលឃុំ-សង្កាត់មានតួនាទីត្រូវអនុវត្តតាមច្បាប់ស្តីពីការបោះឆ្នោត បទបញ្ជា និងនីតិវិធី សេចក្តីណែនាំរួមរវាង គ.ជ.ប និងក្រសួងមហាផ្ទៃ និងលិខិតបទដ្ឋានគតិយុត្ត ដើម្បីផ្តល់ការគាំទ្រដល់ គ.ជ.ប ក្នុងការងាររៀបចំបញ្ជីបោះឆ្នោត ដែលធានាបាននូវភាពត្រឹមត្រូវពេញលេញ និងមានបច្ចុប្បន្នភាព។
លោកបន្ថែមថា ទន្ទឹមនឹងការងារស្រង់ស្ថិតិនេះ លេខាធិការដ្ឋានរៀបចំការបោះឆ្នោតខេត្ត មានភារកិច្ចមួយទៀត គឺការចែកលិខិតអញ្ជើញអ្នកបោះឆ្នោត ដែលប្រើប្រាស់ទិន្នន័យអត្តសញ្ញាណប័ណ្ណសញ្ជាតិខ្មែរប្រភេទចាស់ និងឯកសារបញ្ជាក់អត្តសញ្ញាណបម្រើការចុះឈ្មោះបោះឆ្នោត ឱ្យមកធ្វើបច្ចុប្បន្នភាពទិន្នន័យក្នុងបញ្ជីបោះឆ្នោត ជាមួយក្រុមចុះឈ្មោះបោះឆ្នោត និងការចែកលិខិតអញ្ជើញជូនអ្នកមានឈ្មោះក្នុងបញ្ជីបោះឆ្នោតទូទៅ អំពីទិន្នន័យផ្សេងៗក្នុងបញ្ជីបោះឆ្នោត ដើម្បីឱ្យប្រជាពលរដ្ឋទាំងនោះងាយស្រួលក្នុងការពិនិត្យផ្ទៀងផ្ទាត់ និងស្នើសុំកែតម្រូវក្នុងករណីមានកំហុសឆ្គង ដែលការងារនេះក៏ត្រូវមានការចូលរួមសហការអនុវត្តផ្ទាល់ដោយមេភូមិ និងអាជ្ញាធរឃុំ-សង្កាត់ ។
ជាមួយគ្នានោះ លោក នឹម វ៉ាន់សំ ប្រធានលេខាធិការដ្ឋានរៀបចំការបោះឆ្នោតខេត្តសៀមរាប បានឱ្យដឹងដែរថា ការពិនិត្យបញ្ជីឈ្មោះ និងការចុះឈ្មោះបោះឆ្នោតនៅតាមឃុំ-សង្កាត់ទូទាំងប្រទេស នឹងត្រូវអនុវត្តចាប់ពីថ្ងៃទី០១-២៣ ខែឧសភា ឆ្នាំ២០២០ ហើយ គ.ជ.ប បានកំណត់អាយុ១៨ឆ្នាំ ត្រូវគិតដល់ថ្ងៃទី៣១ ខែកក្កដា ឆ្នាំ២០២០ មានន័យថា កើតមុន ឬត្រឹមថ្ងៃទី០១ ខែសីហា ឆ្នាំ២០០២ ៕
អត្ថបទ និង រូបភាព៖ ហាំ ម៉េងហួត
