មានប្រសាសន៍ក្នុងឱកាសបើកសិក្ខាសាលា ឆ្លុះបញ្ចាំងលទ្ធផល ការ ងារ នៃការអនុវត្តផែនការសកម្មភាពឆ្នាំ២០១៩ និងទិសដៅអនុវត្តបន្តឆ្នាំ២០២០ របស់គណៈកម្មាធិការពិគ្រោះយោបល់កិច្ចការស្ត្រី និងកុមារខេត្តសៀមរាប កាលពីព្រឹកថ្ងៃទី០៦ ខែកុម្ភៈ ឆ្នាំ២០២០នេះ ឯកឧត្ដមទៀ សីហា អភិបាលខេត្តសៀមរាប បានបញ្ជាក់ថា សិក្ខាសាលានាថ្ងៃនេះ នឹងឆ្លុះបញ្ចាំងពីវឌ្ឍនភាព និងការបោះជំហាន ទៅមុខប្រកបដោយភាពម៉ឺងមាត់ និងម្ចាស់ការក្នុងការអនុវត្តតួនាទី ភារកិច្ចរបស់គណៈកម្មាធិការពិគ្រោះយោបល់កិច្ចការស្ត្រី និងកុមារខេត្តសៀមរាប ដើម្បីសម្របសម្រួល និងផ្តល់យោបល់ដល់ក្រុមប្រឹក្សាខេត្ត គណៈអភិបាលខេត្តចាប់តាំងពីអាណត្តិទី១ រហូតដល់បច្ចុប្បន្ន ហើយសកម្មភាពទាំងនេះ ក៏បានរួមចំណែកក្នុងអនុវត្តគោលនយោបាយកំណែទម្រង់សំខាន់ៗ របស់រាជរដ្ឋាភិបាលកម្ពុជាមានជាអាទិ៍ ៖ កំណែទម្រង់វិមជ្ឈការ និងវិសហមជ្ឈការ កំណែទម្រង់ការគ្រប់គ្រងហិរញ្ញវត្ថុសាធារណៈ និងកំណែទម្រង់រដ្ឋបាល សាធារណៈសម្រាប់ធានាជោគជ័យនៃការអនុវត្ត កម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលសម្រាប់នីតិកាលទី៦ ។
ឯកឧត្ដមអភិបាលខេត្តសៀមរាប មានប្រសាសន៍បន្ថែមថា ក្នុងរយៈពេលពេញមួយឆ្នាំកន្លងមក មន្ត្រីជំនាញ និងអ្នកពាក់ព័ន្ធទាំងអស់ បានខិតខំប្រឹងប្រែងអស់ពីកម្លាំងកាយចិត្ត ក្នុងការអនុវត្តតួនាទីភារកិច្ចរបស់ខ្លួន ដើម្បីលើកកម្ពស់ការយល់ដឹងពីតម្រូវការរបស់ស្រ្តី យុវវ័យ កុមារ និងជនងាយរងគ្រោះ ព្រមទាំងបង្កើនភាពអង់អាចដល់ស្រ្តីក្នុងក្របខ័ណ្ឌ នៃរដ្ឋបាលថ្នាក់ក្រោមជាតិ ដែលទទួលបានជោគជ័យ និងមានប្រសិទ្ធភាពល្អ អាស្រ័យដោយមានការគាំទ្រ សហការយ៉ាង ជិតស្និទ្ធរបស់ស្ថាប័នពាក់ព័ន្ធ ដៃគូអភិវឌ្ឍន៍ និងអង្គការសង្គមស៊ីវិលផងដែរ ប៉ុន្តែដើម្បីអនុវត្តមុខងារទាំងនេះប្រកបដោយ ប្រសិទ្ធភាព និង កសាងនូវភាពជឿកជាក់ក្នុងការអនុវត្ត សូមសំណូមពរឲ្យអ្នកពាក់ព័ន្ធទាំងអស់ ត្រូវយកចិត្តទុកដាក់បន្តទៀត ចូលរួមអនុវត្តទាំងអស់គ្នាដោយស្មារតីទទួលខុសត្រូវខ្ពស់ និងមានឆន្ទៈម្ចាស់ការរៀងៗខ្លួន ក្នុងលើកកម្ពស់សមភាពយេនឌ័រ ស្ត្រី យុវវ័យ កុមារ និង ជនងាយរងគ្រោះនៅមូលដ្ឋាន ។
ឯកឧត្តម ទៀ សីហា មានប្រសាសន៍បន្ថែមទៀតថា ក្នុងឆ្នាំ២០២០ នេះ រាជរដ្ឋាភិបាលកម្ពុជា ក៏បានជំរុញ និងផ្ទេរមុខងារបន្ថែមទៀតមករដ្ឋបាលថ្នាក់ក្រោមជាតិ និងបានធ្វើសមាហរណកម្មមន្រ្តីបុគ្គលិក ដែលកំពុងបំរើការងារនៅតាមរដ្ឋបាលក្រុង ស្រុក ខណ្ឌ និងការិយាល័យជំនាញនានា នៅក្នុងថ្នាក់ក្រុង ស្រុក ខណ្ឌ ទៅក្នុងរចនាសម្ព័ន្ធថ្មីនៃរដ្ឋបាលក្រុង ស្រុក ខណ្ឌ ដើម្បីធានានូវប្រសិទ្ធភាព និរន្តរភាពការងារ និងធានាបាន នូវអត្ថប្រយោជន៍នានារបស់បុគ្គលិកបន្ទាប់ពីពេលធ្វើសមាហរណកម្ម ហើយរចនាសម្ព័ន្ធនេះក៏នឹងប្រកាសចូលកាន់តំណែងនាពេលខាងមុខនេះ។
លោកជំទាវ ស៊ិន ណម ប្រធានគណៈកម្មាធិការពិគ្រោះយោបល់កិច្ចការស្ត្រី និងកុមារខេត្តសៀមរាប បានបញ្ជាក់ថាសិក្ខាសាលានេះនឹងផ្ដល់នូវបទពិសោធន៍ល្អៗ ដល់សិក្ខាកាមក្នុងការយកទៅអនុវត្តឆ្នាំបន្ត ហើយក៏ជាកម្លាំងចលករជំរុញឲ្យមានការអភិវឌ្ឍនៅថ្នាក់ក្រោមជាតិ និងកាន់តែលើកកម្ពស់សមភាព យេនឌ័រ ស្ត្រី យុវវ័យ កុមារ និង ជនងាយរងគ្រោះនៅមូលដ្ឋាន ពិសេសនឹងផ្តល់ឱកាសឲ្យអ្នកចូលរួមទាំងអស់ មានទំនាក់ទំនង និងសហការគ្នាក្លាយជាធ្លុងមួយក្នុងការលើកកម្ពស់ព្រមទាំងជំរុញការបញ្ជ្រាបយេនឌ័រ និងបង្កើនភាពអង់អាចដល់ស្រ្តី ដើម្បីឲ្យស្របតាមផែនការយុទ្ធសាស្រ្ត នារីរតនៈរបស់ក្រសួង កិច្ចការនារី ៕
អត្ថបទ ៖ លោក ឈិត សាវី
រូបថត ៖ រដ្ឋបាលខេត្តសៀមរាប
កែសម្រួលអត្ថបទ : លោក លីវ សាន្ត
