នៅព្រឹកថ្ងៃទី០៧ ខែកុម្ភៈ ឆ្នាំ២០២០ នៅវិទ្យាល័យ ២៨ មករា ស្រុកស្រីស្នំ ខេត្តសៀមរាប មានរៀបចំវេទិកាសាធារណៈស្ដីពី ការត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា។
វេទិកានេះ ក្រោមអធិបតីភាព ឯកឧត្តមបណ្ឌិត ស៊ាន បូរ៉ាត រដ្ឋលេខាធិការក្រសួងអប់រំយុវជន និងកីឡា និងជាប្រធានក្រុមការងាររបស់រាជរដ្ឋាភិបាល ចុះមូលដ្ឋានស្រុកស្រីស្នំខេត្តសៀមរាប និងមានវត្តមានចូលរួមពីសំណាក់ ឯកឧត្តម លោក លោកស្រីអនុប្រធាន សមាជិកក្រុមការងារថ្នាក់ជាតិ លោកអភិបាលស្រុក អាជ្ញាធរស្រុក លោកគ្រូ អ្នកគ្រូនិងសិស្សានុសិស្សសរុប ៦៤២នាក់ ក្នុងនោះស្រី ៤៤៩នាក់។
តាមរយៈរបាយការរបស់លោក ហ៊ន់ ឫទ្ធិ អភិបាលស្រុកស្រីស្នំ បង្ហាញថា ក្នុងឆ្នាំសិក្សា២០១៩-២០២០ នៅទូទាំងស្រុកស្រីស្នំ មានសាលារៀបចាប់ពីកម្រិតបឋមសិក្សា រហូតដល់កម្រិតវិទ្យាល័យសរុប ៣៤សាលា។ ក្នុងនោះ វិទ្យាល័យ ២៨មករា មានអគារអន្តេរវិសិកដ្ឋាន ៤បន្ទប់ សម្រាប់ អ្នកគ្រូ និង សិស្សស្នាក់នៅ រួមនិងបន្ទប់ពិសោធន៍កំពុងសាងសង់ចំនួន ៣បន្ទប់ផងដែរ។
ព័ត៌មានជាតិ ថ្មីៗ
មានប្រសាសន៍បើកវេទិកា ឯកឧត្តមបណ្ឌិត ស៊ាន បូរ៉ាត បានលើកឡើង ពីកត្តារីកចម្រើនក្នុងស្រុកស្រីស្នំនាពេលបច្ចុប្បន្ននេះ ជាពិសេសវិស័យអប់រំ ដែលកំពុងរីកដុះដាលគួរឲ្យកត់សម្គាល់ទាំងក្នុងទីប្រជុំជន រហូតដល់ជនបទ។
ឯកឧត្តម រំលឹកថា កាលពីសម័យខ្មែរក្រហម កម្ពុជាគឺជាប្រទេសមានផ្ទះ តែគ្មានមនុស្សរស់នៅ ជាសម័យដែលអ្នកចេះដឹងត្រូវគេយកទៅសម្លាប់។ ដើម្បីរំដោះយកជីវិតប្រជាពលរដ្ឋកម្ពុជាទូទាំងប្រទេស ពីការកាប់សម្លាប់ដ៏យង់ឃ្នង សម្ដេចតេជោ ហ៊ុន សែន បានខិតខំតស៊ូ មិនគិតពីអាយុជីវិត លះបង់ក្រុមគ្រួសារ រហូតទទួលបានជ័យជម្នះ លើរបបខ្មែរក្រហម។ ដូច្នេះ ថ្ងៃ ៧ មករា គឺជានិមិត្តរូប នៃសន្តិភាព ជ័យជម្នះ និងការអភិវឌ្ឍរបស់ព្រះរាជាណាចក្រកម្ពុជាមកដល់សព្វថ្ងៃ ក្នុងកាលៈទេសៈណាក៏ដោយ យើងមិនត្រូវឲ្យជនណាម្នាក់ មកបំផ្លាញសន្តិភាពរបស់ប្រជាពលរដ្ឋ និងការអភិវឌ្ឍរបស់កម្ពុជាឡើយ។
ក្នុងឱកាសនោះដែរ អង្គវេទិកាក៏បានផ្ដល់ឱកាសដល់អ្នកចូលរួមលើកជាសំណួរ និងសំណូមពរ ដែលបញ្ហាប្រឈមនានា ដើម្បីធ្វើការដោះស្រាយជូនប្រជាពលរដ្ឋ នៅក្នុងមូលដ្ឋានស្រុកស្រីស្នំនេះផងដែរ។ ជារួម សំណួរ និងសំណូមពរ អំពីបញ្ហាការកែតម្រូវអត្រានុកូលដ្ឋាន បញ្ហាការដុតវាលស្រែចំការ ការនាំចូលទំនិញខុសច្បាប់ បញ្ហាគ្រឿងញៀន និងផ្លូវដីហុយនៅតាមសាលា ត្រូវបានអង្គវេទិកា បកស្រាយ និងដោះស្រាយនៅនឹងកន្លែង ដោយឡែកសំណើសុំអគារសិក្សា និងការកសាងសមិទ្ធផលនានាក្នុងសាលា ឯកឧត្តមប្រធានបានណែនាំដល់គណៈអភិបាលស្រុករៀបចំសំណើរ ដើម្បីដាក់ជូនប្រមុខរាជរដ្ឋាភិបាល ធ្វើការសម្រេច។
រូបភាព : លោក ខេង ឧត្តម
អត្ថបទ : លោក សេង ផល្លី
