នៅព្រឹកថ្ងៃទី១០ ខែកុម្ភៈ ឆ្នាំ២០២០នេះ នៅរដ្ឋបាលក្រុងសៀមរាប មានការធ្វើសមាហរណកម្មមន្ត្រីសរុប១៣០នាក់ ទៅជាមន្ត្រីរដ្ឋបាលក្រុងសៀមរាបតែមួយ ក្នុងពិធីប្រកាសដាក់ឲ្យដំណើរការ រចនាសម្ព័ន្ធថ្មី នៃរដ្ឋបាលក្រុងសៀមរាប ក្រោមអធិបតីភាពឯកឧត្តម ទៀ សីហា អភិបាលខេត្តសៀមរាប លោកអភិបាលក្រុង និងអញ្ជើញចូលរួមពីសំណាក់ លោកនាយករដ្ឋបាលសាលាខេត្ត ថ្នាក់ដឹកនាំ មន្ត្រីមន្ទីរ អង្គភាព ជុំវិញខេត្តសរុប២៩២រូប ក្នុងនោះ៨២រូប។
តាមរបាយការណ៍របស់លោក នួន ពុទ្ធារ៉ា អភិបាលក្រុងសៀមរាប បានបង្ហាញថា ការដាក់ឲ្យដំណើរការ រចនាសម្ព័ន្ធថ្មី នៃរដ្ឋបាលក្រុងនេះ គឺអនុវត្តន៍តាមអនុក្រឹត្យលេខ១៨២អនក្រ.បក ចុះថ្ងៃទី០២ ខែធ្នូ ឆ្នាំ២០១៩ ស្តីអំពីមុខងារ និងរចនាសម្ព័ន្ធរដ្ឋបាលក្រុង។ ក្នុងនោះ គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ហៅកាត់ថា គ.ជ.អ.ប បានធ្វើកំណែទម្រង់ផ្នែករដ្ឋបាល ដោយបញ្ចូលមន្ត្រីការិយាល័យចំណុះរបស់រដ្ឋបាលក្រុងចំនួន ៣៣នាក់ក្នុងនោះស្រី៣៣នាក់ និងមន្ត្រីការិយាល័យជំនាញជុំក្រុងចំនួន៧០នាក់ ក្នុងនោះស្រី២៧នាក់ និងមន្ត្រីកិច្ចសន្យាចំនួន២៧នាក់ សរុប១៣០នាក់ ទៅជាមន្ត្រីរដ្ឋបាលក្រុងសៀមរាបតែមួយ។
មានប្រសាសន៍ ក្នុងពិធីនេះ ឯកឧត្តម ទៀ សីហា លើកឡើងថា ក្នុងបរិបទប្រទេសកម្ពុជា ការអនុវត្តគោលនយោបាយវិមជ្ឈការ និងវិសហមជ្ឈការ មានគោលបំណងសំខាន់ៗចំនួន៣ រួមមាន៖ ទី១៖ ពង្រឹង និងពង្រីកលទ្ធិប្រជាធិបតេយ្យ សេរី ពហុបក្ស ឲ្យចាក់គ្រឹះរហូតដល់មូលដ្ឋានតាមរយៈការបោះឆ្នោតបង្កើតក្រុមប្រឹក្សារាជធានី ខេត្ត ក្រុង ស្រុក ខណ្ឌ ឃុំ សង្កាត់ ដែលជាតំណាងរបស់ប្រជាពលរដ្ឋឋ។ ទី២៖ លើកកម្ពស់គុណភាព ប្រសិទ្ធភាពនៃការផ្តល់សេវាសាធារណៈ និងការអភិវឌ្ឍមូលដ្ឋាន តាមរយៈ ការផ្លាស់ប្តូរប្រព័ន្ធ និងរចនាសម្ព័ន្ធគ្រប់គ្រងរដ្ឋបាលនៅថ្នាក់មូលដ្ឋាន សំដៅផ្ទេរសិទ្ធិអំណាច មុខងារ និងធនធានទៅឲ្យរដ្ឋបាលថ្នាក់ក្រោមជាតិ ដើម្បីឲ្យមានការទទួលខុសត្រូវច្បាស់លាស់ក្នុងការផ្តល់សេវាសាធារណៈ និងការអភិវឌ្ឍមូលដ្ឋាន ឆ្លើយតបទៅនឹងតម្រូវការ និងដោះស្រាយនូវបញ្ហាប្រឈមនានា របស់ប្រជាពលរដ្ឋនៅតាមមូលដ្ឋានរបស់ខ្លួន ។ ទី៣៖ លើកកម្ពស់ការចូលរួម និងភាពជាម្ចាស់របស់ប្រជាពលរដ្ឋ នៅមូលដ្ឋាន ក្នុងការធ្វើសេចក្តីសម្រេចពាក់ព័ន្ធនឹងការគ្រប់គ្រង ដឹកនាំ និងអភិវឌ្ឍមូលដ្ឋានរបស់ខ្លួន សំដៅចូលរួមកាត់បន្ថយភាពក្រីក្រ និងលើកកម្ពស់គុណភាពជីវិតរបស់ប្រជាពលរដ្ឋ។
ព័ត៌មានជាតិ ថ្មីៗ
ឯកឧត្តមអភិបាលខេត្ត បានលើកឡើងផងដែរថា ការដាក់ឲ្យដំណើរការ រចនាសម្ព័ន្ធថ្មីនៃរដ្ឋបាលក្រុងសៀមរាបនាពេលនេះ គឺជាសមិទ្ធផលជាប្រវត្តិសាស្ត្រ ដើម្បីធ្វើឲ្យប្រព័ន្ធគ្រប់គ្រងរដ្ឋបាលនៅថ្នាក់ក្រោមជាតិកាន់តែមានភាពរឹងមាំ តាមគោលការណ៍នៃរដ្ឋបាលឯកភាពដ៏ពេញលេញ ក្នុងការបង្កើត ជំរុញ និងធ្វើឲ្យមានចីរភាពដល់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ស្របតាមច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ និងគោលនយោបាយកំណែទម្រង់វិមជ្ឈការ និងវិសហមជ្ឈការ។ មួយវិញទៀត ដើម្បីជាតំណាងឲ្យរាជរដ្ឋាភិបាល និងក្រសួង ស្ថាប័ន នៅថ្នាក់រដ្ឋបាលក្រុង ក្នុងការសម្របសម្រួល ដឹកនាំគ្រប់សកម្មភាព ឬកិច្ចការងារដែលស្ថិតក្នុងដែនសមត្ថកិច្ចរបស់ខ្លួន។
សូមបញ្ជាក់ថា ក្រុងស្រុកទាំង១២ ក្នុងខេត្តសៀមរាប នឹងរៀបចំពិធីប្រកាសដាក់ឲ្យដំណើរការ រចនាសម្ព័ន្ធថ្មី នៃរដ្ឋបាលក្រុង-ស្រុកឲ្យបានរួចរាល់ទាំងស្រុង នៅក្នុងរយៈពេល៤ថ្ងៃ គឺចាប់ពីថ្ងៃទី១០ ដល់ថ្ងៃទី១៣ ខែកុម្ភៈ ឆ្នាំ២០២០។
អត្ថបទ និង រូបភាព៖ សេង ផល្លី
