កាលពីថ្ងៃទី០៩ ខែកុម្ភៈ ឆ្នាំ២០២០នេះ លោកជំទាវ ទាង អេង ទៀ សីហា អនុប្រធានគណៈកម្មាធិការសាខាខេត្ត រួមជាមួយនឹងសហការីនៃសាខាកាកបាទក្រហមខេត្តសៀមរាប បានអញ្ជើញជួបសំណេះសំណាលសួរសុខទុក្ខ និងនាំយកអំណោយមនុស្សធម៌ ជូនដល់គ្រួសារជនពិការ និងគ្រួសារចាស់ជរាងាយរងគ្រោះ ចំនួន ៣១គ្រួសារ មកពីបណ្ដាឃុំនៃស្រុកអង្គរធំ ។
មានប្រសាសន៍នាឱកាសនោះលោកជំទាវ ទាង អេង ទៀ សីហា បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងឯកឧត្តម ទៀ សីហា ប្រធានគណៈកម្មាធិការសាខា ដោយកន្លងមកសម្ដេច និងឯកឧត្តមតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ។ ហើយការជួបសំណោះសំណាល់ក្នុងពេលនេះ វាជាការបង្ហាញឲ្យឃើញពីការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដូចដែលពាក្យស្លោកបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា -មិនទុកនរណាម្នាក់ចោល” ។
ក្នុងនោះដែរលោកជំទាវ អនុប្រធានគណៈកម្មាធិការសាខា ក៏បានធ្វើការណែនាំពីស្ថានភាព បច្ចុប្បន្ននៃការឆ្លងមេរោគ កូរ៉ូណា វីរុសថ្មី ដែលពិភពលោកកំពុងមានការព្រួយបារម្ភ និងវិធីបង្ការ ៥យ៉ាង របស់ក្រសួងសុខាភិបាលដែលក្នុងនោះមានដូចជា៖ ១.លាងដៃជាមួយសាប៊ូ និងទឹកស្អាត ,២. ខ្ទប់មាត់ និងច្រមុះនៅពេលក្អក ឬកណ្តាស់ដោយកន្សែង ក្រមា ឬក្រដាស ,៣. ជៀសវាងប៉ះពាល់ជិតស្និទ្ធជាមួយអ្នកដែលមានគ្រុនក្ដៅ ក្អក ឬផ្តាសាយ ,៤. បរិភោគសាច់ និងស៊ុតដែលចម្អិនឆ្អិនល្អ និងទី៥. ជៀសវាងប៉ះពាល់សត្វព្រៃរស់ ឬកន្លែងចិញ្ចឹមសត្វដោយគ្មាន ពាក់សម្ភារការពារខ្លួន ។
គួរបញ្ជាក់ថា អំណោយមនុស្សធម៌ដែលបានផ្ដល់នាឱកាសនោះដែរ គឺក្នុង ១គ្រួសារទទួលបាន ៖ មុង១ ភួយ១ សារុង១ ក្រមា១ មី១កេស ត្រីខ១យួរ អង្ករ៣០គីឡូក្រាម និងថវិកាមួយចំនួនផងដែរ ៕
អត្ថបទ និង រូបភាព៖ យូ វង្ស
កែសម្រួល៖ អ៊ុន ណារាជ្យ
