នៅព្រឹកថ្ងៃទី១៤ ខែកុម្ភៈ ឆ្នាំ២០២០នេះ ឯកឧត្តមប្រធានស្តីទីក្រុមប្រឹក្សាខេត្តសៀមរាប បានអញ្ជើញជាអធិបតីក្នុងពិធី បុណ្យកាត់ឫសសីមាព្រះវិហារថ្មី និងសម្ពោធសមិទ្ធផលនានា ក្នុងវត្តសុវណ្ណមុនីសោភ័ណ ហៅវត្តស្ពានត្នោត ភូមិស្ពានត្នោត២ ឃុំស្ពានត្នោត ស្រុកជីក្រែង ខេត្តសៀមរាប។
តាមរបាយការណ៍ របស់គណៈកម្មការវត្ត ព្រះវិហារវត្តស្ពានត្នោតនេះ ត្រូវបានកសាងថ្មីទាំងស្រុង ក្នុងរយៈពេលពេលជាង២ឆ្នាំប៉ុណ្ណោះ ដោយចំណាយបច្ច័យអស់ជាង ២៥ម៉ឺនដុល្លាអាមេរិក ដែលបានមកពីកម្លាំងសទ្ធានៃពុទ្ធបរិស័ទចំណុះជើងវត្ត និងពុទ្ធសាសនូបត្ថម្ភជិតឆ្ងាយក្នុងស្រុកផងដែរ ។
តាមរយៈរបាយការណ៍ សាងសង់ព្រះវិហារថ្មី របស់គណៈកម្មការវត្តស្ពានត្នោត ឯកឧត្តម អ៊ាន ឃុន ប្រធានស្តីទីក្រុមប្រឹក្សាខេត្តសៀមរាប បានកោតសរសើរថា ការកសាងមួយក្នុងល្បឿនយ៉ាងឆាប់រហ័ស បើប្រៀបធៀបទៅនឹងការកសាងព្រះវិហារ នៃបណ្តាអារាមព្រះពុទ្ធដទៃទៀត ក្នុងខេត្តសៀមរាប ។
ឯកឧត្តម ប្រធានស្តីទីក្រុមប្រឹក្សាខេត្ត ក៏បានឆ្លុះបង្ហាញឲ្យដឹងដែរថា ការរីកចម្រើនលើវិស័យពុទ្ធចក្រក្រោយឆ្នាំ១៩៧៩ ឬក៏អាចនិយាយបានថា ក្រោយពីរបបកម្ពុជាប្រជាធិបតេយ្យប្រល័យពូជសាសន៍ ប៉ុល ពត បំផ្លិចបំផ្លាញប្រទេសជាតិដល់ឬសគល់នោះ វិស័យពុទ្ធចក្រ ក្នុងសម័យកាលព្រះរាជាណាចក្រកម្ពុជាទី២ ដែលមានសម្ដេចតេជោ ជានាយករដ្ឋមន្ត្រី គឺមានសន្ទុះជឿនលឿនខ្លាំង ។ កត្តាជីវភាពរបស់ប្រជាជន និងការគោរពបូជាដោយជំនឿរបស់ពុទ្ធបរិស័ទ ក៏ជាកត្តាសំខាន់ផងដែរ លើវឌ្ឍនភាពនៃវិស័យពុទ្ធចក្រ ។ ឯកឧត្តមថា ពីសង្គមចាស់ ការកសាងព្រះវិហារនីមួយៗ ត្រូវចំណាយពេលវេលារាប់តំណរនៃចៅអធិការ តែសម័យបច្ចប្បន្ន ក្នុងជំនាន់ចៅអធិការតែមួយអង្គ អាចនឹងសម្រេចបាន នូវការកសាងព្រះវិហារថ្មី ។ នេះជាការអះអាងដោយយោងតាមតថភាពសង្គម ។
ខេត្តសៀមរាប វិស័យពុទ្ធសាសនា មានការរីកចម្រើនទាំងផ្នែកហេដ្ឋារចនាសម្ព័ន្ធរូបវន្ត វិស័យគ្រប់គ្រង ការផ្សព្វផ្សាយធម៌វិន័យ ក៏ដូចជាវិស័យពុទ្ធិកសិក្សា ។ រាជរដ្ឋាភិបាល បានផ្តល់តួនាទីយ៉ាងសំខាន់ដល់ព្រះពុទ្ធសាសនា ហើយបានចារិកទុកក្នុងរដ្ឋធម្មនុញ្ញរបស់ជាតិ ថា «ព្រះពុទ្ធសាសនា ជាសាសនារបស់រដ្ឋ» ។
នៅក្នុងពិធីនោះដែរ គណៈអធិបតី និងក្រុមការងាររួមដំណើរ បានចូលបច្ច័យក្នុងពិធីបុណ្យបញ្ចុះខណ្ឌសីមាព្រះវិហារវត្តស្ពានត្នោតនេះ ចំនួន ១០លាន និង ៨៧ម៉ឺនរៀល ៕
គួរជម្រាបថា បច្ចុប្បន្ននេះ ក្នុងទូទាំងខេត្តសៀមរាប មានទីអារាមព្រះពុទ្ធសាសនាចំនួន ២៤៩វត្ត និង ១៩ អាស្រម មានព្រះសង្ឃគង់នៅក្នុងពុទ្ធមណ្ឌលទាំងនោះប្រមាណជាង ៤,០០០ អង្គ ។
អត្ថបទ និង រូបភាព៖ ងិន គឹមឡេង
កែសម្រួល៖ សេង ផល្លី
