លោក ពិន ប្រាកដ អភិបាលរងខេត្តសៀមរាប បានមានប្រសាសន៍ ថា ក្នុងឆ្នាំ២០១៩កន្លងមកនេះ គោលនយោបាយជាតិគាំពារសង្គមនៅក្នុងខេត្តសៀមរាប ត្រូវបានអនុវត្តក្រោមកម្មវិធីផ្តល់អាហារតាម សាលារៀនដោយប្រើប្រាស់កសិផលក្នុងសហគមន៍ គ្របដណ្តប់ លើស្រុកចំនួន៣ គឺស្រុកពួក , ស្រុកអង្គរធំ និងស្រុកប្រាសាទបាគង ក្នុងនោះសាលារៀនចំនួន២៨ បានផ្តល់អាហារពេលព្រឹក និងសាលារៀនចំនួន០៣ផ្សេងទៀត បានផ្តល់អាហារថ្ងៃត្រង់ដល់សិស្ស ហើយកម្មវិធីនេះ ក៏បានឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ ឆ្នាំ ត្រូវបានអនុវត្តគ្របដណ្តប់ទៅលើមណ្ឌលសុខភាពទូទាំងខេត្ត និងមន្ទីរពេទ្យបង្អែកខេត្តសៀមរាប រីឯមន្រ្តីរាជការទាំងអស់ក៏ត្រូវបានទទួលការថែទាំសុខភាព តាមរយៈបេឡាជាតិរបបសន្តិសុខសង្គម ដែលហៅកាត់ថា ប.ស.ស. និង ប្រជាជនក្រីក្រ ក៏ទទួលបានការថែទាំសុខភាពតាមរយៈមូលនិធិសមធម៌ ផងដែរ ។
លោក ពិន ប្រាកដ មានប្រសាសន៍យ៉ាងដូច្នេះ ក្នុងឱកាសអញ្ជើញជាអធិបតីរួមជាមួយឯកឧត្តមបណ្ឌិត ចន ណារិទ្ធ អគ្គលេខាធិការក្រុមប្រឹក្សាជាតិគាំពារសង្គម ក្នុងពិធីបើកសិក្ខាសាលាថ្នាក់ជាតិស្តីពី ក្របខ័ណ្ឌគោលនយោបាយជាតិគាំពារសង្គម ២០១៦-២០២៥ ដែលបានរៀបចំឡើងនៅខេត្តសៀមរាប នាព្រឹកថ្ងៃទី១៨ ខែកុម្ភៈ ឆ្នាំ២០២០ ដោយមានការចូលរួមពីតំណាងអង្គការជាដៃគូអភិវឌ្ឍ ដូចជា GIZ , USAID និងមានសិក្ខាកាមប្រមាណជាជិត១០០នាក់ ជាមន្រ្តីនៃបណ្តាមន្ទីរ-អង្គភាពពាក់ព័ន្ធ មកពីចំនួន៥ខេត្ត រួមមានខេត្តសៀមរាប , កំពង់ធំ , ព្រះវិហារ , បន្ទាយមានជ័យ និង ខេត្តបាត់ដំបង ។
លោកអភិបាលរងខេត្តសៀមរាប មានប្រសាសន៍បន្ថែមថា តាម រយៈគោលនយោបាយជាតិគាំពារសង្គម ប្រជាជនកម្ពុជា ជាពិសេសប្រជាជនក្រីក្រ និងងាយរងគ្រោះ ទទួលបានការគាំពារក្រោមរូបភាពផ្សេងៗ ដូចជាការបង្កើតមជ្ឈមណ្ឌលកុមារកំព្រា , ការគាំពារសុខភាពមាតា និងទារក , ការឧបត្ថម្ភដល់ប្រជាជនក្រីក្រ ដែលសម្រាកព្យាបាល ឬសម្រាលកូន និងការផ្តល់ការអប់រំតាំងពីកម្រិត បឋមដល់កម្រិតមធ្យមសិក្សាដោយឥតគិតថ្លៃ ក៏ដូចជារបបថែទាំសុខភាព និងហានិភ័យការងារ ព្រមទាំងការគាំពារដល់ជនពិការជាដើម ដូច្នេះតាមរយៈនៃសិក្ខាសាលានេះ សូមលើកទឹកចិត្តឱ្យមានការចូលរួម និងពិភាក្សា យ៉ាងផុសផុល ព្រោះថា ក្របខ័ណ្ឌគោលនយោបាយជាតិគាំពារសង្គម ត្រូវបានចាត់ទុកជាផែនទីបង្ហាញផ្លូវសម្រាប់ក្រសួង-ស្ថាប័នពាក់ព័ន្ធក្នុងការរៀបចំ និងបំពេញការងារទៅតាមមុខងារ និងភារកិច្ចឱ្យកាន់តែមានប្រសិទ្ធភាពខ្ពស់ ។
ពាក់ព័ន្ធនឹងបញ្ហានេះដែរ ឯកឧត្តមបណ្ឌិត ចន ណារិទ្ធ អគ្គលេខាធិការក្រុមប្រឹក្សាជាតិគាំពារសង្គម បានបញ្ជាក់ថា រាជរដ្ឋាភិបាលកម្ពុជា បានទទួលស្គាល់យ៉ាងមុតមាំលើតួនាទី នៃការអភិវឌ្ឍប្រព័ន្ធគាំពារសង្គម ក្នុងការប្រែក្លាយកម្ពុជាពីប្រទេសដែលមានចំណូលមធ្យមកម្រិតទាប ទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ ២០៣០ និងទៅជាប្រទេសមានចំណូលខ្ពស់នៅឆ្នាំ ២០៥០ ដោយសារតែប្រព័ន្ធគាំពារសង្គម ត្រូវបានកំណត់ជាគោលដៅយុទ្ធសាស្រ្ត កាត់បន្ថយភាពងាយរងគ្រោះផ្នែកសេដ្ឋកិច្ច និងហិរញ្ញវត្ថុរបស់ប្រជាជន ព្រមទាំងកាត់បន្ថយភាពក្រីក្រជាអតិបរមា ។
ឯកឧត្តមបណ្ឌិត ចន ណារិទ្ធ មានប្រសាសន៍បន្ថែមថា ក្របខ័ណ្ឌ គោលនយោបាយជាតិគាំពារសង្គម ឆ្នាំ២០១៦-២០២៥ គឺជាឯកសារគោលដែលឆ្លុះបញ្ចាំងអំពីប្រព័ន្ធគាំពារសង្គមនៅកម្ពុជា ដែលត្រូវរៀបចំឡើងដើម្បីកំណត់ជាគោលដៅយុទ្ធសាស្រ្តសម្រាប់អភិវឌ្ឍន៍កម្មវិធីដែលផ្តល់កិច្ចគាំពារ កាត់បន្ថយភាពងាយរងគ្រោះផ្នែកសេដ្ឋកិច្ច និងហិរញ្ញវត្ថុរបស់ប្រជាជន លើកកម្ពស់សុខុមាលភាព សាមគ្គីភាពសង្គម ព្រមទាំងកាត់បន្ថយភាពក្រីក្រជាអតិ បរមា ហើយចក្ខុវិស័យរយៈពេលវែងសម្រាប់ការអភិវឌ្ឍ និងកសាងប្រព័ន្ធនេះ គឺប្រកបដោយបរិយាប័ន្ន ប្រសិទ្ធភាព និងចីរភាពហិរញ្ញវត្ថុ ដែលចាត់ទុកថា ជាឧបករណ៍បម្រើដល់ការកាត់បន្ថយ និងទប់ស្កាត់ភាពក្រីក្រ ភាពងាយរងគ្រោះ និងវិសមភាព ដូច្នេះអត្ថប្រយោជន៍ នៃការអនុវត្តនូវកម្មវិធីជាតិ និងរបបនានា ក្នុងប្រព័ន្ធគាំពារសង្គម គឺផ្តល់ឲ្យក្រុមប្រជាជនគោលដៅ គ្រប់ជ្រុងជ្រោយទៅតាមការគិតគូររបស់កម្មវិធីជាតិ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
