ពីរខែដើមឆ្នាំ២០២០នេះ ក្នុងប្រតិបត្តិការចុះពិនិត្យសុវត្ថិភាពចំណីអាហារ ចំនួន៤លើក នៅតាមទីផ្សារគោលដៅក្នុងខេត្តសៀមរាប ក្រុមការងារជំនាញរបស់សាខាកាំកុងត្រូលខេត្ត ពុំទាន់រកឃើញចំណីអាហារខូចគុណភាពដាក់លក់នៅតាមទីផ្សារឡើយទេ នេះបើរបាយការណ៍របស់ សាខាកាំកុងត្រូលខេត្តសៀមរាប នៅថ្ងៃទី២០ខែកុម្ភៈឆ្នាំ២០២០នេះ។
តាមការឲ្យដឹងពីលោក ព្រៅ ខេមរិទ្ធ ប្រធានសាខាកាំកុងត្រូលខេត្តសៀមរាប នៅថ្ងៃដដែលនេះ បង្ហាញថា ចំណីអាហារដែលក្រុមការងារតែងតែយកចិត្តទុកដាក់ត្រួពិនិត្យ រួមមាន ប្រហិត គុយទាវ មី នំបញ្ចុក មឹក បង្គារ ។ល។ ព្រមទាំងចំណីអាហារ និងគ្រឿងទេសកំប៉ុង និងកញ្ចប់មួយចំនួន ដែលអាចហួសកាលបរិច្ឆេទផងដែរ។
លោកបន្ថែមថា ទោះបីក្នុងប្រតិបត្តិការចុះពិនិត្យសុវត្ថិភាពចំណីអាហារ នៅតាមក្រុងស្រុក នៅដើមឆ្នាំ២០២០នេះ រកពុំឃើញនូវចំណីអាហារ ដែលបង្កឲ្យប៉ះពាល់សុខភាពអ្នកទទួលទានក៏ដោយ ក៏ក្រុមការងារ តែងតែធ្វើការផ្សព្វផ្សាយដល់អាជិវករ ក៏ដូចជាប្រជាពលរដ្ឋ ក្នុងខេត្តសៀមរាបទាំងអស់ ចៀសវាងដាក់លក់ចំណីអាហារខូចគុណទាំងនោះ និងពិនិត្យឲ្យបានច្បាស់មុនពេលយកទៅទទួលទាន។
ព័ត៌មានជាតិ ថ្មីៗ
ទន្ទឹមលោកក៏បានអំពាវនាដល់អាជិវករ និងប្រជាពលរដ្ឋទាំងអស់ រួមគ្នាទប់ស្កាត់ និងបញ្ឈប់ការប្រើប្រាស់សារធាតុគីមី ក្នុងចំណីអាហារ និងលក់ដូរទំនិញហួសកាលបរិច្ឆេទប្រើប្រាស់ ក្លែងបន្លំ ឬទំនិញខូចគុណភាព។ ជាមួយនេះ អ្នកដែលបានប្រព្រឹត្តអំពើខុសច្បាប់នេះ នឹងប្រឈមផ្តន្ទាទោសទណ្ឌទៅតាមច្បាប់ ក្នុងករណីធ្ងន់ធ្ងរ។
អត្ថបទ និងរូបភាព: លោក បូ សាវី
កែសម្រួលដោយ៖ លោក សេង ផល្លី
