ការប្រកួតកីឡាទូកប្រពៃណី ខ្នាតអន្តរជាតិ ទូកនាគ ទូកកានូ-កាយ៉ាក់ ជ្រើសរើសជើងឯកភូមិភាគបឹងទន្លេសាប ពានរង្វាន់សម្តេចក្រឡាហោម ស ខេង លើកទី២ ឆ្នាំ ២០២០ បានចាប់ផ្ដើមការប្រកួតហើយ នៅរសៀលថ្ងៃទី២១ ខែកុម្ភៈ ឆ្នាំ២០២០នេះ ស្ថិតនៅរមណីយដ្ឋានបឹងឈូក ឃុំខ្នារសណ្ដាយ ស្រុកបន្ទាយស្រី ខេត្តសៀមរាប។
ការប្រកួតកីឡាទូកប្រពៃណីខ្នាតអន្តរជាតិ សម្រាប់ភូមិភាគបឹងទន្លេសាបនេះ មានរយៈពេល១ថ្ងៃកន្លះ ដែលនឹងបញ្ចប់នៅរសៀលថ្ងៃទី២២ ខែកុម្ភៈ ឆ្នាំ២០២០។ សម្រាប់ភូមិភាគបឹងទន្លេសាប មានខេត្តចំនួន០៦ ចូលរួមប្រកួត រួមមាន ខេត្តពោធិ៍សាត់ កំពង់ឆ្នាំង បន្ទាយមានជ័យ បាត់ដំបង ប៉ៃលិន និងខេត្តសៀមរាប។
វិញ្ញាសារសម្រាប់ការប្រកួតនេះ ចែកជា៣វិញ្ញាសារ គឺ ប្រភេទូកបុរស ចម្ងាយ១០០០ម៉ែត្រ ប្រភេទូកនារី ចម្ងាយ៥០០ម៉ែត្រ និងប្រភេទូកចម្រុះបុរស-នារី ចម្ងាយ៥០០ម៉ែត្រ។
យោងតាមលិខិតរបស់ សហព័ន្ធកីឡាទូកកានូ និងរ៉ូអ៊ីងកម្ពុជា បង្ហាញថា ការប្រកួតកីឡាទូកនេះ គឺដើម្បីបំផុស និងលើកកម្ពស់ប្រភេទកីឡាទូកប្រពៃណីខ្នាតអន្តរជាតិ “ទូកនាគ” ទូកកានូ-កាយ៉ាក់ និងរ៉ូអ៊ីង ឲ្យមានសកម្មភាពនៅទូទាំងប្រទេស ដើម្បីមានលទ្ធភាព សមត្ថភាព ចូលរួមកីឡាស៊ីហ្គេមលើកទី៣២ ឆ្នាំ២០២៣ ដែលមានកម្ពុជាធ្វើជាម្ចាស់ផ្ទះ។
សូមជម្រាបថា ការប្រកួតកីឡាទូកប្រពៃណី ខ្នាតអន្តរជាតិ ទូកនាគ ទូកកានូ -កាយ៉ាក់ បែងចែកជា៥ភូមិភាគ រួមមាន ភូមិភាគរាជធានីភ្នំពេញ ភូមិភាគវាលរាប ភូមិភាគនិរតី ភូមិភាគបឹងទន្លេសាប និងភូមិភាគឦសាន។
គួររំលឹកថា ការប្រកួតកីឡាទូកប្រពៃណី ខ្នាតអន្តរជាតិ ទូកនាគ ទូកកានូ -កាយ៉ាក់ ជ្រើសរើសជើងឯកភូមិភាគបឹងទន្លេសាប ពានរង្វាន់សម្តេចក្រឡាហោម ស ខេង លើកទី១ ឆ្នាំ ២០១៩ ប្រារព្ធនៅខេត្តពោធិ៍សាត់។
អត្ថបទ៖ លោក សេង ផល្លី
រូបភាព: មន្ត្រីមន្ទីរព័ត៌មាន
