ដោយមានការគាំទ្រពីឯកឧត្ដមអគ្គនាយក នៃអគ្គនាយកដ្ឋានទូរទស្សន៍ជាតិកម្ពុជា នៃក្រសួងព័ត៌មាន មន្ទីរព័ត៌មានខេត្តសៀមរាប បានរៀបចំវគ្គបណ្ដុះបណ្ដាលផ្នែកអានព័ត៌មាន អត្ថាធិប្បាយព័ត៌មាន និង ពិធីករ ជូនដល់មន្ត្រីក្រោមឱវាទរបស់ខ្លួន នៅការិយាល័យវិទ្យុ និង ការិយាល័យទូរទស្សន៍ ក្នុងរយៈពេល២ថ្ងៃ គឺនៅថ្ងៃទី២២ និង ថ្ងៃទី២៣ ខែកុម្ភៈ ឆ្នាំ២០២០ ក្នុងគោលបំណងលើកកម្ពស់សមត្ថភាព និង ចំណេះដឹងនៃផ្នែកទាំងអស់ ស្របតាមស្តង់ដាមួយ នៃការអភិវឌ្ឍវិស័យព័ត៌មាន ក្នុងដំណាក់កាលប្រព័ន្ធបច្ចេកវិទ្យា៤.០ ។
មានប្រសាសន៍ក្នុងឱកាសបើកវគ្គបណ្ដុះបណ្ដាលនេះ លោក លីវ សុខុន ប្រធានមន្ទីរព័ត៌មានខេត្តសៀមរាប បានបញ្ជាក់ថា ដោយមានការគាំទ្រយ៉ាងពេញទំហឹងពីឯកឧត្ដម ឃឹម វុទ្ធី អគ្គនាយក នៃអគ្គនាយកដ្ឋានទូរទស្សន៍ជាតិកម្ពុជា ថ្ងៃនេះមន្ទីរព័ត៌មានខេត្តសៀមរាបយើង បានរៀបចំវគ្គបណ្ដុះបណ្ដាលផ្នែកអានព័ត៌មាន អត្ថាធិប្បាយព័ត៌មាន និង ពិធីករនេះឡើង ជូនដល់មន្ត្រីនៃការិយាល័យវិទ្យុ និង ការិយាល័យទូរទស្សន៍ សរុបចំនួន២០នាក់ ក្រោមការបង្ហាត់បង្ហាញពីគ្រូឧទ្ទេសជំនាញចំនួន០២រូប ដែលមានបទពិសោធន៍លើផ្នែកអានព័ត៌មាន អត្ថាធិប្បាយព័ត៌មាន និង ពិធីករ ជាច្រើនឆ្នាំ ខណៈបច្ចុប្បន្នកំពុងបម្រើការងារនៅអគ្គនាយកដ្ឋានទូរទស្សន៍ជាតិ ។
លោក លីវ សុខុន មានប្រសាសន៍ទៀតថា នេះជាវគ្គបណ្ដុះបណ្ដាលមួយ ពិតជាមានសារៈសំខាន់ខ្លាំងណាស់សម្រាប់មន្ត្រីនៃមន្ទីរព័ត៌មានខេត្តសៀមរាប ព្រោះថាកន្លងមក នៅមន្ទីរព័ត៌មានខេត្តសៀមរាប ពុំដែលមានវគ្គនេះឡើយ ហើយមន្ត្រីយើងក៏មិនដែលទទួលបានការបណ្ដុះបណ្ដាលជំនាញនេះដែរ ហើយវគ្គនេះដែរ ក៏ស្របទៅនឹងអនុសាសន៍ដ៏ខ្ពង់ខ្ពស់របស់ឯកឧត្ដម ខៀវ កាញារីទ្ធ រដ្ឋមន្ត្រីក្រសួងព័ត៌មាន និង សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានជំរុញ និង លើកទឹកចិត្តឲ្យមានការបើកវគ្គបណ្ដុះបណ្ដាលដល់មន្ត្រីគ្រប់លំដាប់ថ្នាក់ ដើម្បីបង្កើនសមត្ថភាពជំនាញវិជ្ជាជីវៈលើវិស័យព័ត៌មាន ដូច្នេះសង្ឃឹមថា តាមរយៈនៃវគ្គបណ្ដុះបណ្ដាលនេះ មន្ត្រីរបស់យើងនឹងទទួលបានចំណេះដឹងថ្មីៗបន្ថែមទៀត ស្របតាមស្តង់ដាវិជ្ជាជីវៈមួយយ៉ាងពិតប្រាកដ ដែលជាស្តង់ដារនៃទូរទស្សន៍ជាតិកម្ពុជា ។
លោកប្រធានមន្ទីរព័ត៌មានខេត្តសៀមរាប មានប្រសាសន៍បន្ថែមទៀតថា វគ្គបណ្ដុះបណ្ដាលដែលបានរៀបចំនៅពេលនេះ គឺជាផែន ការសកម្មភាពមួយ ក្នុងចំណោមផែនការសកម្មភាពការងារជាច្រើន របស់មន្ទីរព័ត៌មានខេត្តសៀមរាប សម្រាប់ឆ្នាំ២០២០ ក្នុងនោះ មន្ទីរមានគម្រោងបើកវគ្គសរសេរព័ត៌មានបឋម ដែលនឹងប្រព្រឹត្តទៅនៅចុងខែមីនា និង គ្រោងបើកវគ្គបំប៉នការសរសេរព័ត៌មាន ដែលនឹងប្រព្រឹត្តទៅនៅក្នុងខែមិថុនា ឆ្នាំ២០២០នេះ ហើយស្របពេលស្ថានការណ៍នៅក្នុងពិភពលោកបច្ចុប្បន្នកំពុងមានការរីកចម្រើនយ៉ាងខ្លាំងលើផ្នែកព័ត៌មាន ជាពិសេស នៅប្រទេសកម្ពុជាយើង ក៏បាននឹងកំពុងយកចិត្តទុកដាក់ និង ចាប់អារម្មណ៍យ៉ាងខ្លាំងផងដែរ ។
ក្នុងឱកាសនោះដែរ តាមរយៈគ្រូឧទ្ទេសជំនាញចំនួន០២រូប នៃអគ្គនាយកដ្ឋានទូរទស្សន៍ជាតិកម្ពុជា លោក លីវ សុខុន ប្រធានមន្ទីរព័ត៌មានខេត្តសៀមរាប បានថ្លែងអំណរគុណយ៉ាងជ្រាលជ្រៅចំពោះឯកឧត្ដម ឃឹម វុទ្ធី អគ្គនាយកទូរទស្សន៍ជាតិកម្ពុជា ដែលរយៈកាលកន្លងមក តែងតែបានបញ្ជូនមន្ត្រីជំនាញបច្ចេទេស មកជួយបង្ហាត់បង្ហាញជំនាញបច្ចេទេសទូរទស្សន៍ដល់មន្ត្រីនៃការិយាល័យទូរទស្សន៍ តាមការស្នើសុំរបស់មន្ទីរ ដែលធ្វើឲ្យដំណើរការផ្សាយរបស់ទូរទស្សន៍ជាតិខេត្តសៀមរាប ប្រព្រឹត្តទៅដោយរលូន និង ទទួលបានការគាំទ្រជាខ្លាំងពីសំណាក់ទស្សនិកជន ហើយលោកក៏បានក្រើនរំលឹកដល់មន្ត្រីទាំងអស់ដែលមានវត្តមាននៅក្នុងវគ្គនេះ សូមឲ្យយកចិត្តទុកដាក់តាមការណែនាំ និង បង្ហាត់បង្ហាញពីគ្រូឧទ្ទេស ជាពិសេសបើមានចម្ងល់ត្រូវតែហ៊ានសួរ ដើម្បីបង្កើននូវចំណេះដឹងខ្លួនឯងផង និង ដើម្បីជាមូលដ្ឋានគ្រឹះមួយ យកទៅបំពេញការងារភារៈកិច្ចរបស់ខ្លួនទទួលបានលទ្ឋផលល្អនាពេលខាងមុខ ធ្វើឲ្យវិស័យព័ត៌មាននៅក្នុងខេត្តសៀមរាប កាន់តែមានការរីកចម្រើន និង ទទួលបានការគាំទ្រកាន់តែខ្លាំងឡើងពីសំណាក់ប្រជាពលរដ្ឋយើង ។
មានប្រសាសន៍ក្នុងឱកាសនោះដែរ លោក អ៊ូ សំណាង អនុប្រធាននាយកដ្ឋានព័ត៌មានក្នុង និងក្រៅប្រទេស នៃអគ្គនាយកដ្ឋានទូរទស្សន៍ជាតិកម្ពុជា និងជាគ្រូឧទ្ទេសនៃវគ្គបណ្ដុះបណ្ដាលនេះ បានសម្ដែងនូវការគាំទ្រចំពោះមន្ទីរព័ត៌មានខេត្តសៀមរាប ដែលបាន យកចិត្តទុករៀបចំឲ្យមានជាវគ្គបណ្ដុះបណ្ដាលនេះឡើង ព្រោះថានេះជាលើកទីមួយសម្រាប់មន្ទីរព័ត៌មានរាជធានី-ខេត្ត លើផ្នែកអានព័ត៌មាន អត្ថាធិប្បាយព័ត៌មាន និង ពិធីករ សម្រាប់មន្ត្រីក្រោមឱវាទរបស់ខ្លួន ហើយលោកនឹងបង្ហាត់បង្ហាញឲ្យអស់ពីសមត្ថភាពនូវចំណេះដឹងទាំងអស់ដែលលោកមាន ផ្ទេរជូនដល់សិក្ខាកាមដែលជាមន្ត្រីរួមអាជីពក្នុងក្របខ័ណ្ឌក្រសួងព័ត៌មាន ដើម្បីយកទៅបម្រើវិស័យព័ត៌មានឲ្យកាន់តែមានការរីកចម្រើនថែមទៀត ដូច្នេះសង្ឃឹមថា សិក្ខាកាមយើងទាំអអស់គ្នា នឹងយកចិត្តទុកដាក់ ក្រេបជញ្ជក់នូវចំណេះដឹងទាំងអស់នេះ និង ធ្វើការពិភាក្សាគ្នាឲ្យបានកាន់តែផុលផុស ដើម្បីអនាគតយើងធ្វើការប្រកបដោយវិជ្ជាជីវៈ ៕
អត្ថបទ ៖ លោក លីវ សាន្ត
រូបថត ៖ លោក ធន់ ពូថេ
