បន្ទាប់ពីដំណើរការប្រកួតប្រជែងអស់រយៈពេល២ថ្ងៃ គឺថ្ងៃទី២១ និង ថ្ងៃទី២២ ខែកុម្ភៈ ឆ្នាំ២០២០កន្លងមក ការប្រកួតកីឡាទូកប្រពៃណីខ្នាតអន្តរជាតិ ទូកនាគ ទូកកានូ-កាយ៉ាក់ និង ទូករ៉ូអ៊ីង ជ្រើសរើសជើងឯកភូមិភាគបឹងទន្លេសាប ពានរង្វាន់សម្តេចក្រឡាហោម ស ខេង លើកទី២ ឆ្នាំ២០២០ ដែលរៀបចំឡើងសហព័ន្ធកីឡាទូកកានូនិងរ៉ូអ៊ីងកម្ពុជា សហការជាមួយរដ្ឋបាលខេត្តសៀមរាប ត្រូវបានបិទបញ្ចប់ហើយ កាលពីល្ងាចថ្ងៃទី២២ ខែកុម្ភៈ ឆ្នាំ២០២០ ម្សិលមិញនេះ ក្រោមអធិបតីភាពឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម អនុប្រធានទី១ សហព័ន្ធកីឡាទូកកានូ និងរ៉ូអ៊ីងកម្ពុជា តំណាងខ្ពង់ខ្ពស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានសហព័ន្ធកីឡាទូកកានូ និងរ៉ូអ៊ីងកម្ពុជា និង ឯកឧត្តម ទៀ សីហា អភិបាលខេត្តសៀមរាប ។
បើតាមរបសោការណ៍របស់លោក ជា ប៊ុនហេង ប្រធានគណៈកម្មការរៀបចំការប្រកួត បានឲ្យដឹងថា ៖ ការប្រកួតនេះ មានវិញ្ញាសាប្រកួតទូកប្រពៃណីខ្នាតអន្តរជាតិ ទូកនាគ ចម្ងាយ ១.០០០ម៉ែត្រ និង ចម្ងាយ ៥០០ម៉ែត្រ ផ្នែកបុរស , វិញ្ញាសាទូកកានូ-កាយ៉ាក់ ចម្ងាយ ៥០០ម៉ែត្រ និងវិញ្ញាសាទូករ៉ូអ៊ីង ចម្ងាយ ៥០០ម៉ែត្រ ដោយមានកីឡាករ កីឡាការិនី សរុបចំនួន៨០នាក់ មកពីសមាគមទូកប្រពៃណីខ្នាតអន្តរជាតិ ទូកនាគ ទូកកានូ-កាយ៉ាក់ និងទូករ៉ូអ៊ីង នៃភូមិភាគបឹងទន្លេសាប ចំនួន៤ខេត្ត គឺ ខេត្តសៀមរាប , បន្ទាយមានជ័យ , កំពង់ឆ្នាំង និងខេត្តពោធិសាត់ ដោយអវត្តមានចំនួន២ខេត្ត គឺខេត្តបាត់ដំបង និង ខេត្តប៉ៃលិន ។
លោក ជា ប៊ុនហេង បានបញ្ជាក់ទៀតថា ការរៀបចំព្រឹត្តិការណ៍នេះ គឺដើម្បីបំផុស និងលើកកម្ពស់ប្រភេទកីឡាទូកប្រពៃណីខ្នាតអន្តរជាតិ ទូកនាគ ទូកកានូ-កាយ៉ាក់ និងរ៉ូអ៊ីង ឲ្យមានសកម្មភាពនៅទូទាំងប្រទេស និងឆ្ពោះទៅកីឡាស៊ីហ្គេម លើកទី៣២ ឆ្នាំ២០២៣ ដែលមានកម្ពុជាធ្វើជាម្ចាស់ផ្ទះ ហើយផ្អែកតាមលទ្ធផលនៃការប្រកួតនេះ គឺសមាគមកីឡាទូកប្រពៃណីខ្នាតអន្តរជាតិ ទូកនាគ របស់ខេត្តសៀមរាប ទទួលបានជ័យលាភី លើកពានរង្វាន់សម្តេចក្រឡាហោម ស ខេង ទាំងវិញ្ញាសា ១.០០០ម៉ែត្រ និង ៥០០ម៉ែត្រ , ខេត្តបន្ទាយមានជ័យជាប់ចំណាត់ថ្នាក់លេខ២ និង ខេត្តកំពង់ឆ្នាំង ជាប់ចំណាត់ថ្នាក់លេខ៣ ។
ព័ត៌មានជាតិ ថ្មីៗ
ឯកឧត្តម ទៀ សីហា អភិបាលខេត្តសៀមរាប មានប្រសាសន៍ថា តាមរយៈនៃព្រឹត្តិការណ៍នេះ គឺជាការបង្ហាញនូវសក្តានុពលទេសចរណ៍ក្រៅពីប្រាសាទរបស់ស្រុកបន្ទាយស្រី គឺរមណីយដ្ឋានបឹងឈូកដ៏ទាក់ទាញ ដែលមិនត្រឹមតែជារមណីយដ្ឋានសម្រាប់ការទស្សនាសម្រស់ធម្មជាតិ និង ជាកន្លែងជួបជុំគ្នារីករាយនាចុងសប្តាហ៍ប៉ុណ្ណោះទេ តែរមណីយដ្ឋានបឹងឈូកនេះ ពិតជាត្រូវបានសម្លឹងឃើញថា ជាគោលដៅនៃការវិនិយោគសម្រាប់វិស័យទេសចរណ៍ តាមរយៈនៃការដាក់ឲ្យមានសេវាកម្មកំសាន្តលើផ្ទៃទឹក ដូចជាទូកកានូ-កាយ៉ាក់ នេះជាដើម ដែលជាប្រភេទកីឡាពេញនិយមនៃភ្ញៀវបរទេស និងសម្រាប់ការសាកល្បងកំសាន្តរបស់ភ្ញៀវជាតិផងដែរ ។
ឯកឧត្តម ប៉ាន សូរស័ក្តិ តំណាងដ៏ខ្ពង់ខ្ពស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានសហព័ន្ធកីឡាទូកកានូ និងរ៉ូអ៊ីងកម្ពុជា មានប្រសាសន៍ថា បច្ចុប្បន្ននេះ ប្រភេទកីឡាទូកប្រពៃណីខ្នាតអន្តរជាតិ ទូកនាគ ទូកកានូ-កាយ៉ាក់ និងរ៉ូអ៊ីងនៅកម្ពុជា កំពុងទទួលបានការចាប់អារម្មណ៍ និងគាំទ្របណ្តើរៗពីមហាជន ចាប់តាំងពីសហព័ន្ធ បានកែទម្រង់រចនាសម្ព័ន្ធគ្រប់គ្រងរបស់ខ្លួន ជាពិសេសកាន់តែមានវឌ្ឍនភាពទាំងបរិមាណ និងគុណភាព ឆ្ពោះទៅព្រឹត្តិការណ៍ស៊ីហ្គេម លើកទី៣២ ឆ្នាំ២០២៣ ប៉ុន្តែចាំបាច់ត្រូវខិតខំបណ្តុះបណ្តាល និងបង្កើនបរិមាណកីឡាករ-កីឡាការិនីបន្ថែមទៀត នៅតាមបណ្តាសមាគមកីឡាទូកប្រពៃណីខ្នាតអន្តរជាតិ ទូកនាគ ទូកកានូ និងទូករ៉ូអ៊ីង ទូទាំងប្រទេស ដូច្នេះសមាគមកីឡាទូករាជធានី-ខេត្ត និងក្រសួងពាក់ព័ន្ធ ចាំបាច់ណាស់ត្រូវមានទូកផ្ទាល់ខ្លួន ដើម្បីងាយស្រួលក្នុងការហ្វឹកហាត់ ជាមួយនឹងការខិតខំស្វែងរកដៃគូសហការ និងក្រុមហ៊ុនឧបត្ថម្ភបន្ថែមទៀត ដើម្បីបង្កើតព្រឹត្តិការណ៍ប្រកួត ឱ្យបានកាន់តែច្រើនក្នុងមួយឆ្នាំៗ តាមដែលអាចធ្វើបាន ។
សូមបញ្ជាក់ថា ភូមិភាគទាំង០៥ ដែលសហព័ន្ធកីឡាទូកកានូ និងទូករ៉ូអ៉ីងកម្ពុជា គ្រោងរៀបចំការប្រកួតកីឡាទូកប្រពៃណីខ្នាតអន្តរជាតិ ទូកនាគ ទូកកានូ-កាយ៉ាក់ និង ទូករ៉ូអ៊ីងនេះ រួមមាន ៖
១. ភូមិភាគនារតី មានខេត្តតាកែវ , កំពត , កែប , ព្រះសីហនុ , កំពង់ស្ពឺ និង ខេត្តកោះកុង ការប្រកួតនិងវគ្គបណ្ដុះបណ្ដាល បានចាប់ដំណើរការពីថ្ងៃទី០៣ ដល់ថ្ងៃទី០៥ ខែកុម្ភៈ ឆ្នាំ២០២០ និងពិធីតាំងពិព័រណ៍ ចាប់ពីថ្ងៃទី ៣០ ខែមករា ដល់ថ្ងៃទី០៥ ខែកុម្ភ: ឆ្នាំ២០២០ នៅខេត្តតាកែវ ។
២. ភូមិភាគបឹងទន្លេសាប មានខេត្តពោធិសាត់ , កំពង់ឆ្នាំង , សៀមរាប , បន្ទាយមានជ័យ , បាត់ដំបង និង ខេត្តប៉ៃលិន ការប្រកួតនិងវគ្គបណ្ដុះបណ្ដាល បានចាប់ដំណើរការពីថ្ងៃទី២២ ដល់ថ្ងៃទី២៣ ខែកុម្ភៈ នៅតំបន់បឹងឈូក ក្នុងស្រុកបន្ទាយស្រី និងពិធីតាំងពិព័រណ៍ ចាប់ពីថ្ងៃទី១៧ ដល់ថ្ងៃទី២៣ ខែកុម្ភ: ឆ្នាំ២០២០ នៅក្នុងក្រុងសៀមរាប ។
៣. ភូមិភាគវាលរាប មានខេត្តកណ្ដាល , កំពង់ចាម , ត្បូងឃ្មុំ , កំពង់ធំ , ព្រៃវែង និង ខេត្តស្វាយរៀង ការប្រកួតនិងវគ្គបណ្ដុះបណ្ដាល នឹងចាប់ដំណើរការពីថ្ងៃទី១០ ដល់ថ្ងៃទី១២ ខែមីនា និងពិធីតាំងពិព័រណ៍ ចាប់ពីថ្ងៃទី០៦ ដល់ថ្ងៃទី១២ ខែមីនា ឆ្នាំ២០២០ នៅខេត្តកណ្ដាល ។
៤. ភូមិភាគឦសាន មានខេត្តក្រចេះ , ស្ទឹងត្រែង , ព្រះវិហារ , ឧត្ដរមានជ័យ , រតនគីរី និង ខេត្តមណ្ឌលគីរី ការប្រកួតនិងវគ្គបណ្ដុះបណ្ដាល នឹងចាប់ដំណើរការពីថ្ងៃទី០៥ ដល់ថ្ងៃទី០៧ ខែមេសា និងពិធីតាំងពិព័រណ៍ ចាប់ពីថ្ងៃទី០១ ដល់ថ្ងៃទី០៧ ខែមេសា ឆ្នាំ២០២០ នៅខេត្តក្រចេះ ។
៥. មណ្ឌលរាជធានីភ្នំពេញ មានក្រសួងមហាផ្ទៃ , ក្រសួងការពារជាតិ , ក្រសួងពាណិជ្ជកម្ម និង រាជធានីភ្នំពេញ ការប្រកួតនិងវគ្គបណ្ដុះបណ្ដាល នឹងចាប់ដំណើរការពីថ្ងៃទី២៩ ដល់ថ្ងៃទី៣១ ខែឧសភា និងពិធីតាំងពិព័រណ៍ ចាប់ពីថ្ងៃទី២៥ដល់ថ្ងៃទី៣១ ខែឧសភា ឆ្នាំ២០២០ នៅបឹងតាមោក រាជធានីភ្នំពេញ ៕
អត្ថបទ ៖ រូបថត ៖ លោក ងិន គឹមឡេង
កែសកម្រួលអត្ថបទ ៖ លោក លីវ សាន្ត
