ការប្រកួតកីឡាទូកប្រពៃណី ខ្នាតអន្តរជាតិ “ទូកនាគ” ទូកកានូ-កាយ៉ាក់ ជ្រើសរើសជើងឯកភូមិភាគបឹងទន្លេសាប ពានរង្វាន់សម្តេចក្រឡាហោម ស ខេង លើកទី២ បានបញ្ចប់ហើយនៅរសៀល ថ្ងៃទី២២ ខែកុម្ភៈ ឆ្នាំ២០២០ ដោយសមាគមកីឡាទូកប្រពៃណីខ្នាតអន្តរជាតិ ‘ទូកនាគ” ខេត្តសៀមរាប ទទួលបានជ័យលាភីលេខ១ ទាំងវិញ្ញាសា ១ ០០០ម៉ែត្រ និង ៥០០ម៉ែត្រ ខេត្តបន្ទាយមានជ័យជាប់ចំណាត់ថ្នាក់លេខ២ និងខេត្តកំពង់ឆ្នាំង ជាប់លេខ៣ ។
យោងតាមរបាយការណ៍របស់គណៈកម្មការរៀបចំការប្រកួត បង្ហាញថា រយៈពេល២ថ្ងៃ នៃការប្រកួតកីឡាទូកប្រពៃណីខ្នាតអន្តរជាតិ នៅរមណីយដ្ឋានបឹងឈូក នៃស្រុកបន្ទាយស្រី ខេត្តសៀមរាប ចាប់ថ្ងៃទី២១ និង ថ្ងៃទី២២ ខែកុម្ភៈ ឆ្នាំ២០២០ ដែលមានខេត្តចំនួន០៤ បានចូលរួមប្រកួត រួមមានខេត្តសៀមរាប បន្ទាយមានជ័យ កំពង់ឆ្នាំង និងខេត្តពោធិសាត់ និងមានប្រតិភូ គ្រូបង្វឹក កីឡាករ កីឡាការិនី សរុបចំនួន៨០នាក់។
របាយការណ៍ដដែលនេះ បញ្ជាក់ថា ការប្រកួតនេះ មានវិញ្ញាសាប្រកួតទូកប្រពៃណីខ្នាតអន្តរជាតិ “ទូកនាគ” ចម្ងាយ ១ ០០០ម៉ែត្រ និង ចម្ងាយ ៥០០ម៉ែត្រ ផ្នែកបុរស ។ ព្រឺត្តិការណ៍ប្រកួតកីឡាទូកនេះ ក៏មានកម្មវិធីប្រកួតដកស្រង់បច្ចេកទេសលើវិញ្ញាសា ទូកកានូ-កាយ៉ាក់ ចម្ងាយ ៥០០ម៉ែត្រ និងការប្រកួតដកស្រង់បច្ចេកទេស ប្រភេទកីឡាទូករ៉ូអ៊ីង ចម្ងាយ ៥០០ម៉ែត្រផងដែរ ។
យោងតាមលិខិតរបស់ សហព័ន្ធកីឡាទូកកានូ និងរ៉ូអ៊ីងកម្ពុជា បង្ហាញថា ការប្រកួតកីឡាទូកនេះ មានគោលបំណងបំផុស និងលើកកម្ពស់ប្រភេទកីឡាទូកប្រពៃណីខ្នាតអន្តរជាតិ “ទូកនាគ” ទូកកានូ-កាយ៉ាក់ និងរ៉ូអ៊ីង ឲ្យមានសកម្មភាពនៅទូទាំងប្រទេស ដើម្បីមានលទ្ធភាព សមត្ថភាព ចូលរួមកីឡាស៊ីហ្គេមលើកទី៣២ ឆ្នាំ២០២៣ ដែលមានកម្ពុជាធ្វើជាម្ចាស់ផ្ទះ។
គួរជម្រាបថា ការប្រកួតកីឡាទូកប្រពៃណី ខ្នាតអន្តរជាតិ ទូកនាគ ទូកកានូ-កាយ៉ាក់ ជ្រើសរើសជើងឯកភូមិភាគ ពានរង្វាន់សម្តេចក្រឡាហោម ស ខេង លើកទី២ ឆ្នាំ២០២០ បែងចែកជា៥ភូមិភាគ រួមមានភូមិភាគរាជធានីភ្នំពេញ ភូមិភាគវាលរាប ភូមិភាគនិរតី ភូមិភាគបឹងទន្លេសាប និងភូមិភាគឦសាន ។ មុនការរៀបចំនៅភូមិភាគបឹងទន្លេសាប សហព័ន្ធកីឡាទូកកានូ និងរ៉ូអ៊ីងកម្ពុជា បានរៀបចំរួចហើយនៅភូមិភាគវាលរាប និងភូមិភាគនិរតី ៕
អត្ថបទ និងរូបភាព: លោក ងិន គឹមឡេង
កែសម្រួលដោយ៖ លោក សេង ផល្លី
