ដើម្បីចូលរួមអបអរសាទរទិវាជាតិសុខភាពមាតា ទារក និងកុមារ នៅព្រឹកថ្ងៃទី ២១ ខែ កុម្ភៈ ឆ្នាំ ២០២០នេះ គណៈប្រតិភូ គណៈកម្មាធិការសាខាកាកបាទក្រហមកម្ពុជាខេត្តសៀមរាប ដឹកនាំដោយ លោកជំទាវ ទាង អេង ទៀ សីហា អនុប្រធានគណៈកម្មាធិការ សាខា និងលោកជំទាវជាសហការី អញ្ជើញចុះជួបសំណេះសំណាលសួរសុខទុក្ខ និងនាំយកអំណោយមនុស្សធម៌របស់សាខា ផ្ដល់ជូនមាតាទើបនឹងសម្រាលកូនតូច សរុបចំនួន៥៥នាក់ នៅមណ្ឌលសុខភាពចាន់សរ និង ពពេល ស្រុកសូទ្រនិគម ខេត្តសៀមរាប។
នៅក្នុងឱកាសជួបសំណេះសំណាលនេះដែរ លោកវេជ្ជបណ្ឌិត ក្រុស សារ៉ាត់ សមាជិកគណៈកម្មាធិការសាខាកាកបាទក្រហមខេត្តសៀមរាប បានអានសារលិខិតរបស់សម្តេចកត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និង ជាឥស្សរជនឆ្នើមថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្ត្រី និងកុមារ ក្នុងឱកាសទិវាជាតិសុខភាពមាតា ទារក និងកុមារ ២១ កុម្ភៈ ផ្ញើជូនដល់ស្ត្រីកម្ពុជាគ្រប់រូបផងដែរ ។
មានប្រសាសន៍សំណេះសំណាល នៅមណ្ឌលសុខភាពទាំងពីរ លោកជំទាវ ទាង អេង ទៀ សីហា បានធ្វើការកោតសរសើរពីកិច្ចខិតខំប្រឹងប្រែងរបស់ក្រុមគ្រូពេទ្យ ក្នុងការបម្រើសេវាព្យាបាលជំងឺជូនប្រជាពលរដ្ឋ សំខាន់លើការសម្រាលទារក នៅក្នុងមណ្ឌលសុខភាព។
ព័ត៌មានជាតិ ថ្មីៗ
ទន្ទឹមនោះ លោកជំទាវ នាំយកប្រសាសន៍ផ្តាំផ្ញើ សួរសុខទុក្ខពីសំណាក់ សម្ដេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ព្រមទាំងបានធ្វើការណែនាំ ស្ត្រីមានផ្ទៃពោះទាំងអស់ គប្បីទៅពិនិត្យសុខភាព ពិគ្រោះយោបល់ជាមួយគ្រូពេទ្យ នៅតាមមណ្ឌល សុខភាព ឬ មន្ទីរពេទ្យ ដែលនៅជិតលំនៅដ្ឋានរបស់ខ្លួន។ ក្នុងនោះដែរ ក្រោយសម្រាលទារក ទាំងមាតា និង ទារក ត្រូវទៅទទួលចាក់ថ្នាំបង្ការជំងឺទាំង១១ មុខ ទៅតាមការណែនាំការកំណត់របស់គ្រូពេទ្យឲ្យបានទៀងទាត់ ។
ឆ្លៀតក្នុងឱកាសនោះ លោកជំទាវ ក៏បានជម្រាបជូនអំពីស្ថានភាព ជំងឺឆ្លងប្រភេទថ្មី កូវីត១៩(COVID-19) នៅកម្ពុជា គឺពុំមិនទាន់មានករណីឆ្លងមកលើ ប្រជាពលរដ្ឋខ្មែរណាម្នាក់ឡើយ។ ដោយឡែក ចំពោះជនជាតិចិនដែលមានបានឆ្លងជំងឺនេះមួយករណី នៅខេត្តព្រះសីហនុ ត្រូវបានក្រុមគ្រូពេទ្យកម្ពុជា ធ្វើការព្យាបាលបានជាសះស្បើយ និងបានវិលត្រឡប់ទៅប្រទេសកំណើតវិញផងដែរ។
សូមជម្រាបថា អំណោយដែលបានប្រគល់ជូន ស្ត្រី ទើបនឹងសម្រាលកូនទាំង៥៥នាក់ ក្នុងឱកាសសនោះ ម្នាក់ៗទទួលបាន មុង១, ភួយ១, សារុង១, ក្រម៉ា១, កន្សែងពោះគោ១ , មី១កេស, ត្រីខ១យួរ, ទឹកដោះគោ ០២កំប៉ុង, ស្ករស០១គីឡូ, សាប៊ូក្រអូប ២ដុំ និងថវិកាចំនួន ៥ ម៉ឺនរៀល៕
អត្ថបទ និងរូបភាព: លោក ម៉ី សុខារិទ្ធ
កែសម្រួលដោយ៖ លោក សេង ផល្លី
