នៅរសៀលថ្ងៃទី២១ ខែកុម្ភៈ ឆ្នាំ២០២០នេះ នៅសាលាស្រុកស្រីស្នំ ស្ថិតនៅឃុំជ្រោយនាងងួន ស្រុកស្រីស្នំ ខេត្តសៀមរាប មានរៀបចំប្រារព្ធបុណ្យផ្កាប្រាក់សាមគ្គី ដើម្បីប្រមូលថវិកាចូលរួមកសាងហេដ្ឋារចនាសម្ព័ន្ធនៅតាមបណ្ដាឃុំនានា និងរៀបចំតារាងបាលទាត់នៅក្នុងវិទ្យាល័យ ២៨ មករា ស្រុកស្រីស្នំ។
ពិធីបុណ្យនេះ មានការផ្ដូចផ្ដើមពី ឯកឧត្តមបណ្ឌិត ស៊ាន បូរ៉ាត ប្រធានក្រុមការងាររាជរដ្ឋាភិបាល ចុះមូលដ្ឋានស្រុកស្រីស្នំ ឯកឧត្តម លន់ សុធី ប្រធានក្រុមការងារថ្នាក់កណ្តាលចុះជួយស្រុកស្រីស្នំ មន្ត្រីរាជការ កងកម្លាំងប្រដាប់អាវុធ ព្រមទាំងប្រជាពលរដ្ឋ លោកគ្រូ អ្នកគ្រូ សិស្សានុសិស្ស នៅទូទាំងស្រុកស្រីស្នំ។
តាមរយៈពិធីបុណ្យផ្កាប្រាក់សាមគ្គីនេះដែរ គឺជាជំនឿរបស់ពុទ្ធសាសនិកខ្មែរ ដែលតែងតែជឿជាក់លើព្រះពុទ្ធសាសនា ក្នុងការចែករំលែកធនធានផ្ទាល់ខ្លួន ដើម្បីចូលរួមកសាងសមិទ្ធផលនានា ដែលជាប្រយោជន៍ដល់អ្នកដទៃ ដែលជាកុសលនាពេលទៅមុខ។ ជំនឿ និងទម្លាប់ដ៏សប្បុរសទាំងអស់នេះ គឺជាគម្រូសាមគ្គីភាព ជួយគ្នាទៅវិញទៅមក ដែលក្រុមការងាររាជរដ្ឋាភិបាល ចុះមូលដ្ឋានស្រុក និងក្រុមការងារថ្នាក់កណ្តាលចុះជួយស្រុកស្រីស្នំ ព្រមទាំងអាជ្ញាធរមូលដ្ឋាន ចង់ឃើញប្រជាពលរដ្ឋបន្តអនុវត្តន៍យូរអង្វែងតទៅមុខ។
ព័ត៌មានជាតិ ថ្មីៗ
បន្ទាប់ពីបញ្ចប់ពិធីបុណ្យ នៅថ្ងៃទី២២ ខែកុម្ភៈ ឆ្នាំ២០២០ ថវិកាដែលប្រមូលបាន មួយផ្នែក នឹងប្រគល់ជូនដល់លោកនាយក វិទ្យាល័យ ២៨ មករា ស្រុកស្រីស្នំ ដើម្បីរៀបចំតារាងបាល់ទាត់ និងមួយផ្នែកទៀត ពិនិត្យមើលលទ្ធភាព ដើម្បីកសាងហេដ្ឋារចនាសម្ព័ន្ធនៅតាមបណ្ដាឃុំនានា នៅក្នុងស្រុក ដែលបម្រើដល់ការរស់នៅ ប្រកបរបររបស់ប្រជាពលរដ្ឋនៅក្នុងស្រុកស្រីស្នំ។
អត្ថបទ៖ លោក សេង ផល្លី
រូបភាព: មន្ត្រីមន្ទីរព័ត៌មាន
