ចាប់ពីថ្ងៃទី២០ ខែកុម្ភៈ ឆ្នាំ២០២០នេះ អាជ្ញាធរជាតិអប្សរា សហការជាមួយរដ្ឋបាលក្រុងសៀមរាប បាននិងកំពុងអនុវត្តន៍គម្រោងប្រព័ន្ធរំដោះទឹក និងកែលម្អផ្លូវមុខប្រាសាទអង្គរវត្ត។ គម្រោងនេះ នឹងផ្អាកចរាចរណ៍ផ្លូវកណ្តាលទិសខាងលិច មុខប្រាសាទអង្គរវត្តជាបណ្ដោះអាសន្ន និងដកដើមឈើមួយចំនួន ដើម្បីរៀបចំជាវាលស្មៅបៃតងនាពេលអនាគត។
គម្រោងប្រព័ន្ធរំដោះទឹក និងកែលម្អផ្លូវមុខប្រាសាទអង្គរវត្តនេះ នឹងបង្ហូរទឹកភ្លៀង ដែលអាចបង្កឲ្យជន់លិចបរិវេណមួយចំនួន ផ្នែកខាងលិច មុខប្រាសាទអង្គរវត្ត ទៅក្នុងប្រឡាយក្នុងក្រុងសៀមរាប។ ទន្ទឹមនឹងនេះ អាជ្ញាធរជាតិអប្សរា ក៏នឹងរៀបចំឲ្យមានផ្លូវ និងចំណតយានយន្តសមរម្យ សម្រាប់អាជីវករនៅជុំវិញត្រពាំងសេះផងដែរ។
មានប្រសាសន៍ ក្នុងឱកាសចុះពិនិត្យគម្រោងកាលពីម្សិលមិញ ជាមួយ លោក នួន ពុទ្ធារ៉ា អភិបាលក្រុងសៀមរាប តំណាងអភិបាលខេត្តសៀមរាប ឯកឧត្ដម ហង់ ពៅ អគ្គនាយកអាជ្ញាធរជាតិអប្សរា បង្ហាញថា ការរៀបចំគម្រោងនេះ ដើម្បីរួមចំណែកធ្វើឲ្យហេដ្ឋារចនាសម្ព័ន្ធ និងសម្បទាទេសចរណ៍ ទេសភាព បរិស្ថាន នៅបរិវេណខាងមុខ ផ្នែកខាងលិចប្រាសាទអង្គរវត្តមានភាពល្អប្រសើរ ព្រមទាំងលើកតម្លៃរមណីយដ្ឋានអង្គរឱ្យសមជាព្រលឹងជាតិខ្មែរ និងសក្តិសមជាសម្បត្តិបេតិកភណ្ឌពិភពលោកផងដែរ។
ព័ត៌មានជាតិ ថ្មីៗ
អត្ថបទ និងរូបភាព: លោក បូ សាវី
កែសម្រួលដោយ៖ លោក សេង ផល្លី
