នៅវេលាម៉ោងប្រមាណ ២រសៀលថ្ងៃទី២០ ខែកុម្ភៈឆ្នាំ២០២០ មានករណីអគ្គីភ័យមួយបាន ឆាបឆេះផ្ទះឈើមួយខ្នង ទាំងស្រុង ស្ថិតនៅជិតវត្តកេសសារ៉ារាម ក្បែរសណ្ឋាគារសុខាអង្គរ ក្នុងភូមិតាភុលសង្កាត់ស្វាយដង្គំ ក្រុងសៀមរាប។
ក្នុងករណីអគ្គីភ័យនៅកណ្ដាលក្រុងសៀមរាបនេះ លោក លី សំរិទ្ធ និងលោក ពិន ប្រាកដ អភិបាលរងខេត្ត រួមនិងមន្ត្រីជាន់ខ្ពស់សាលាខេត្ត ក៏បានចុះទៅពិនិត្យហេតុការណ៍នេះ ដោយផ្ទាល់ផងដែរ។
ព័ត៌មានជាតិ ថ្មីៗ
តាមការឲ្យដឹងពីសមត្ថកិច្ចនៅកន្លែងកើតហេតុ ផ្ទះឈើមួយខ្នងសង់ផ្ទាល់ដី ប្រក់ដំបូលស័ង្កសីនោះ ត្រូវភ្លើងឆេះទាំងស្រុង ព្រមទាំងខូចទ្រព្យសម្បត្តិមួយចំនួនធំទៀត។ ករណីអគ្គីភ័យនេះ ពុំបណ្ដាលឲ្យឆេះរាលដាលទៅផ្ទះអ្នកជិតខាងក្បែរនោះឡើយ ដោយសារសមត្ថកិច្ច បានពន្លត់ទាន់ពេល។
លោកឧត្តមសេនីយ៍ត្រី ភឹង សម្បត្តិ ស្នងការរងទទួលការរិយាល័យបង្ការ និងពន្លត់អគ្គិភ័យនៃស្នងការដ្ឋានខេត្តសៀមរាបបានឲ្យដឹងថា ដោយសារផ្លូវចូលផ្ទះរងគ្រោះមានលក្ខណៈតូចចង្អៀតពេក ធ្វើឲ្យសមត្ថកិច្ចពិបាកធ្វើដំណើរទៅជួយពន្លត់ ទើបបណ្តាលឲ្យផ្ទះរងគ្រោះឆេះទាំងស្រុង។ សម្ភារៈ ដែលត្រូវភ្លើងឆេះរួមមាន៖ ផ្ទះឈើទំហំ៨ម៉ែត្រគុណ១០ម៉ែត្រទាំងស្រុង រថយន្តកាមរីឆ្លាមរបស់អ្នកជិតខាងយកទៅផ្ញើ ០១គ្រឿង ទូរទស្សន៍២គ្រឿង ទូរទឹកកក ១គ្រឿង រួមនឹងសម្ភារៈឯកសារសំខាន់ៗមួយចំនួនទៀត។
លោកស្នងការរងបញ្ជាក់ថា ករណីនេះសមត្ថកិច្ចប្រើប្រាស់រថយន្តពន្លត់អគ្គីភ័យ ចំនួន៤គ្រឿង និងប្រើប្រាស់ទឹកអស់៤រថយន្ត និងពន្លត់ភ្លើងបានទាំងស្រុង នៅវេលាម៉ោង៣រសៀលថ្ងៃដដែល។ បច្ចុប្បន្ន សមត្ថកិច្ច កំពុងធ្វើការស្រាយជ្រាវរកមូលហេតុដែលបង្កឲ្យមានអគ្គិភ័យនេះឡើង។
លោកស្នងការរង ក៏បានសំណូមពរ ដល់ពលរដ្ឋទូទៅ មេត្តាកុំសាងសង់ផ្ទះ និងរបងរំលោភចូលចំណីផ្លូវ ដែលបណ្ដាលធ្វើឲ្យផ្លូវចូលទៅ កាន់លំនៅដ្ឋានរួមតូច បណ្ដាលឲ្យពេលមានគ្រោះអាសន្នម្តងៗ សមត្ថកិច្ចពិបាកក្នុងការជួយសង្គ្រោះ៕
អត្ថបទ និងរូបភាព: លោក គឿន វេត និង លោក ថាច់ ពិសុទ្ធ
កែសម្រួលដោយ៖ លោក សេង ផល្លី
