លោក លី សំរិទ្ធ អភិបាលរងខេត្តសៀមរាប បានឱ្យដឹងនៅព្រឹកថ្ងៃទី២៥ខែកុម្ភៈឆ្នាំ២០២០នេះថា អាជ្ញាធរខេត្តសៀមរាបបានកំពុងតែដំណើរការស្ថាបនានិងជួសជុលផ្លូវជាច្រើនខ្សែនៅក្នុងក្រុងសៀមរាប ដើម្បីបង្កភាពងាយស្រួលដល់ការធ្វើដំណើររបស់ប្រជាពលរដ្ឋក៍ដូចជាភ្ញៀវទេសចរ។ លោកថា ផ្លូវទាំងនេះ ជាគម្រោងថវិការបស់ថ្នាក់ជាតិ រដ្ឋបាលខេត្ត សាលាក្រុង និងសង្កាត់ ដែលនៅក្នុងទីប្រជុំជនមានស្ថាបនាជាផ្លូវចាក់បេតុង និងចាក់កៅស៊ូ ចំណែកផ្លូវនៅតាមភូមិជាយក្រុងគេធ្វើផ្លូវចាក់គ្រួសក្រហមសិន។
ក្រៅពីនេះ នៅក្នុងរមណីយដ្ឋានអង្គរអាជ្ញាធរជាតិអប្សរា ក៍បានកំពុងតែធ្វើការស្ថាបនា និងកែលំម្អផ្លូវជាច្រើនផងដែរ ដូចជាការជួសជុលផ្លូវរថយន្ត ការស្ថាបនាផ្លូវកង់ និងរៀបចំសណ្តាប់ធ្នាប់ ដាំស្មៅ ដើមឈើនៅមុខប្រាសាទអង្គរឱ្យមានភាពបៃតងជាដើម។
លោក លី សំរិទ្ធ បានបញ្ជាក់ថា ផ្លូវមួយចំនួនធំ និងធ្វើការស្ថាបនារួចរាល់នៅមុនចូលឆ្នាំប្រពៃណីខ្មែរ និងមួយចំនួនទៀត និងបញ្ចប់នៅក្រោយចូលឆ្នាំខ្មែរ ដូច្នេះនៅចុងឆ្នាំ២០២០នេះ ផ្លូវនៅក្រុងសៀមរាបស្ទើទាំងអស់និងស្អាត ងាយស្រួលដល់ការធ្វើដំណើរ ជាពិសេស គឺភ្ញៀវទេសចរដែលមកកម្សាន្តនៅខេត្តសៀមរាប នៅក្នុងឱកាសចូលឆ្នាំប្រពៃណីខ្មែរខាងមុខនេះនិងមានការពេញចិត្តចំពោះការធ្វើដំណើរដោយសេចក្តីសប្បាយរីករាយ។
ប្រជាពលរដ្ឋនៅក្នុងក្រុងសៀមរាប បានបង្ហាញពីការការពេញចិត្តចំពោះការស្ថាបនាផ្លូវរបស់អាជ្ញាធរនៅពេលនេះ ព្រោះថា នៅក្នុងឆ្នាំ២០១៩កន្លងមកនេះ ប្រជាពលរដ្ឋនៅក្នុងខេត្តសៀមរាបជួបការលំបាកយ៉ាងខ្លាំងក្នុងការធ្វើដំណើរជាពិសេសនៅរដូវវស្សាដោយសារតែផ្លូវមានការខូចច្រើន តែឥឡូវនេះទទួលបានផ្លូវស្អាត គឺពិតជាល្អប្រសើរក្នុងការធ្វើដំណើរ៕
អត្ថបទ និងរូបភាព ៖ លោក ឃុត សៅ
