និស្សិតមហាវិទ្យាល័យស្ថាបត្យកម្ម និងនគរោបនីយកម្មនៃសាកលវិទ្យាល័យភូមិន្ទវិចិត្រសិល្បៈចំនួន៣៦០នាក់ មកពីរាជធានីភ្នំពេញ បានមកបំពេញទស្សនកិច្ចសិក្សា និងស្វែងយល់ពីប្រវត្តិសាស្ត្រអង្គរពីអ្នកជំនាញអាជ្ញាធរជាតិអប្សរា និងនៅតំបន់រមណីយដ្ឋានអង្គរ ដែលការចុះសិក្សាស្វែងយល់នេះ គឺមានរយៈពេល៥ថ្ងៃ ចាប់ពីថ្ងៃទី២២ ដល់ថ្ងៃទី២៦ ខែកុម្ភៈ ឆ្នាំ២០២០ ។
បើតាមលោកសាស្ត្រាចារ្យ អ៊ិន សារិន ព្រឹទ្ធបុរសរងនៃមហាវិទ្យាល័យស្ថាបត្យកម្ម និងនគរោបនីយវិទ្យានៃសាកលវិទ្យាល័យភូមិន្ទវិចិត្រសិល្បៈ បានឲ្យដឹងនៅថ្ងៃទី២៥ ខែកុម្ភៈ ឆ្នាំ២០២០នេះថា អ្នកជំនាញអាជ្ញាធរជាតិអប្ស រាបានចំណាយពេលវេលា ចែករំលែកចំណេះដឹងទាក់ទងនឹងប្រវត្តិសាស្ត្រអង្គរដល់និស្សិត និងចាប់អារម្មណ៍ជាខ្លាំងចំពោះកិច្ចខិតខំប្រឹងប្រែងរបស់អាជ្ញាធរជាតិអប្សរាលើកិច្ចការអភិរក្ស ជួសជុល និងការអភិវឌ្ឍនៅក្នុងរមណីយដ្ឋានអង្គរ ពិសេសលើការថែរក្សាមរតក វប្បធម៌ ជំនឿអរូបីជាមួយអ្នកស្រុក ។
លោកសាស្ត្រាចារ្យ ក៏សង្ឃឹមជឿរជាក់ថា ទស្សនកិច្ចសិក្សានាពេលនេះវានឹងអាចធ្វើឲ្យ សាកលវិទ្យាល័យភូមិន្ទវិចិត្រសិល្បៈ និងក្រុមការងារស្រាវជ្រាវរបស់អាជ្ញាធរជាតិអប្សរា កាន់តែមានទំនាក់ទំនងជិតស្និទ្ធ ដើម្បីផ្តល់ឱកាស ចំណេះដឹង ការងារដល់និស្សិតនៃសាកលវិទ្យាល័យភូមិន្ទវិចិត្រសិល្បៈបានរៀនសូត្របន្ថែមពីទីនេះកាន់តែច្រើននៅថ្ងៃអនាគត ។
ក្នុងឱកាសនោះដែរ លោក អ៊ឹម សុខរិទ្ធី ប្រធាននាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ តំណាងឯកឧត្តមអគ្គនាយកអាជ្ញាធរជាតិអប្សរា បានឱ្យដឹងថា អាជ្ញាធរជាតិអប្សរា គឺជាស្ថាប័នការងារមួយបានផ្តល់ឱកាសដល់និស្សិតនៃសាកលវិទ្យាល័យភូមិន្ទវិចិត្រសិល្បៈច្រើនជាងគេសម្រាប់ហាត់ការរយៈពេលខ្លី និងការងារអចិន្ត្រៃយ៍ផងដែរ ពិសេសមហាវិទ្យាល័យបុរាណវិទ្យា ។
លោក រិទ្ធី បន្ថែមថា អាជ្ញាធរជាតិអប្សរារីករាយក្នុងការផ្តល់កិច្ចសហការ ការបណ្តុះបណ្តាល និងទទួលយកនិស្សិតទាំងក្នុងពេលកំពុងសិក្សា និងបញ្ចប់ការសិក្សាហើយ ដើម្បីមកអនុវត្តកិច្ចការនៅទីនេះតាមគម្រោងនីមួយៗ ដែលធ្លាប់បានផ្តល់ជូនកន្លងមក ហើយនឹងមានជាបន្តបន្ទាប់ទៀត ៕
អត្ថបទ និង រូបភាព៖ បូ សាវី
កែសម្រួល៖ អ៊ុន ណារាជ្យ
