មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បានធ្វើការបិទផ្សាយជាសាធារណៈ នូវឯកសារនៃការវិនិច្ឆ័យ ក្នុងនោះមាន ប្លង់សុរិយោដី និងបញ្ជីឈ្មោះម្ចាស់ដី ចំនួន៤៦៣៦ ក្បាលដី ក្នុងភូមិចំនួន៣រួមមាន ភូមិសំបួរ ភូមិវាល ភូមិជ្រៃ សង្កាត់សំបួរ ក្រុងសៀមរាប ដែលទុករយៈពេល១៥ថ្ងៃ គិតចាប់ពីថ្ងៃទី២៧ខែកុម្ភះ ដល់ថ្ងៃទី១២ ខែមីនា ឆ្នាំ២០២០ ។
លោក ហ៊ី សាយ ប្រធានមន្ទីររៀបចំដែនដី នគរូបនីយកម្ម សំណង់ និង សុរិយោដីខេត្តសៀមរាប បានមានប្រសាសន៍ក្នុងពិធីបិទផ្សាយជាសាធារណៈ នូវឯកសារនៃការវិនិច្ឆ័យខាងលើថា កាបិទផ្សាយនេះ អាជ្ញាធរទុករយៈពេល១៥ថ្ងៃ ដោយគិតទាំងថ្ងៃបុណ្យ និងថ្ងៃឈប់សម្រាក តម្រូវឲ្យម្ចាស់ដី ឬនិងអ្នកកាន់កាប់ដី ព្រមទាំងស្ថាប័ន និង អង្គភាពពាក់ព័ន្ធទាំងអស់ មកចូលរួមពិនិត្យ ផ្ទៀងផ្ទាត់មើលទិន្នន័យនេះឲ្យបានគ្រប់ៗគ្នា ដើម្បីធានាបាននូវសុក្រឹត ត្រឹមត្រូវ ក្នុងការចេញវិញ្ញាបនបត្រសម្គាល់ម្ចាស់អចលនវត្ថុ ដែលហៅថា ប័ណ្ណកម្មសិទ្ធិ ព្រោះថា នេះជាឱកាសចុងក្រោយ ដែលម្ចាស់កម្មសិទ្ធិទាំងអស់ មានសិទ្ធិធ្វើការ កែតម្រូវ ឬជំទាស់តវ៉ាបាន ក្នុងករណីដែលពិនិត្យមើលទៅឃើញថាមានកំហុសឆ្គង មកគណៈកម្មការរដ្ឋបាល ។ លោកបន្តថាក្រោយពីបញ្ជប់ការបិទផ្សាយ សាធារណៈនេះ គណៈកម្មការរដ្ឋបាលនិងលើកសំណើរ ទៅអភិបាលនៃគណៈអភិបាលខេត្ត ដើម្បីសម្រេច ចេញវិញ្ញាបនប័ត្រសម្គាល់ម្ចាស់អចលនវត្តុជូនប្រជាពលរដ្ឋដែលជាម្ចាស់ដីនិងអ្នកកាន់កាប់ដីដែលបានបំពេញលក្ខខ័ណ្ឌគ្រប់គ្រាន់តាមនីតិវិធីច្បាប់ និងជាក្បាលដីដែលមិនមានទំនាស់។
ក្នុងឱកាសនោះលោក បូ ម៉េងគ្រី អភិបាលរងក្រុងសៀមរាប បានឱ្យដឹងដែរថា ការចុះបញ្ចីដីធ្លីមានលក្ខណៈជាប្រព័ន្ធគឺធ្វើឡើងដើម្បីផ្តល់ប័ណ្ណកម្មសិទ្ធ ជូនប្រជាពលរដ្ឋដែលជាម្ចាស់ដី ឬអ្នកកាន់កាប់ដីទាំងអស់យកទៅប្រើប្រាស់ក្នុងហេតុផលផ្សេងៗ ឬទុកជាឯកសារសំអាងនៅពេលមានទំនាស់ដីធ្លីកើតឡើង។ ជាក់ស្តែងការចុះបញ្ចីដីធ្លីមានលក្ខណៈជាប្រព័ន្ធពិតជាអនុវត្តទៅតាមនីតិវិធី និងបច្ចេកវិទ្យាទំនើប មានតម្លាភាព និងការទទួលខុសត្រូវដែលប្រទេសជឿនលឿនលើពិភពលោកកំពុងអនុវត្តហើយនិងមានប្រសិទ្ធភាពលើការគ្រប់គ្រងដីធ្លី រួមទាំងស្របតាមគោលនយោបាយដីធ្លីរបស់រាជរដ្ឋាភិបាលដើម្បីកាត់បន្ថយភាពក្រីក្រ និងទំនាស់ដីធ្លីក្នុងសង្គមជាតិ ។
គួរំលឹកដែរថា កន្លងមកមន្ទីររៀបចំដែនដី នគរូបនីយកម្ម សំណង់ និង សុរិយោដីខេត្តសៀមរាប បានបិទផ្សាយ និងចែកប័ណ្ណកម្មសិទ្ធដីធ្លីក្នុងក្រុងសៀមរាប បានចំនួន៩សង្កាត់រួចមកហើយរួមមាន សង្កាត់សៀមរាប ០៧ភូមិ សង្កាត់សាលាកំរើក ០៧ភូមិ , សង្កាត់ស្វាយដង្គំ១៤ភូមិ , សង្កាត់ជ្រាវ០៧ភូមិ , សង្កាត់ស្លក្រាម០៨ភូមិ , សង្កាត់គោកចក០៣ភូមិ និងសង្កាត់នគរធំ ០១ភូមិ សង្កាត់ស្រង៉ែ០១ភូមិ និងសង្កាត់សំបួរចំនួន២លើកសរុប០៥ភូមិ ។ ជាមួយគ្នានោះ ស្រុកចំនួន០៤ មានស្រុកសូទ្រនិគម , ស្រុកប្រាសាទបាគង , ស្រុកពួក និង ស្រុកក្រឡាញ់ក៏បានបិទផ្សាយជាសាធារណៈនូវឯកសារនៃការវិនិច្ឆ័យមួយចំនួនផងដែរ ៕
អត្ថបទ ៖ លោក បុង ឆវ័ន
រូបថត ៖ លោក ធន់ ពូថេ
