ថ្ងៃទី២៧ ខែកុម្ភៈ ឆ្នាំ២០២០ ដែលបានរៀបចំឡើងនៅសាលប្រជុំមន្ទីរពេទ្យគន្ឋបុប្ផាសៀមរាប លោក ពិន ប្រាកដ អភិបាលរងខេត្ត និងជាតំណាងដ៍ខ្ពង់ខ្ពស់ ឯកឧត្តម ទៀ សីហា អភិបាល នៃគណអភិបាលខេត្តសៀមរាប មានប្រសាសន៍ស្នើសូមឱ្យគ្រប់ស្ថានប័ន អង្គភាព អាជ្ញាធរមូលដ្ឋាន អង្គការដៃគូរសុខភាព មេត្តាចូលរួមយ៉ាងផុលផុសនូវការផ្តល់មតិយោបល់ចូលរួមចំណែកកែលំអរសេវា ពិសេសអំពីបញ្ហាដែលបានជួបប្រទះនាពេលកន្លងមក នៅតាមមូលដ្ឋានរបស់ខ្លួនលើកជាបញ្ហាជូនអង្គពិភាក្សា ដើម្បីជាយុទ្ធសាស្ត្រសំរាប់ការអនុវត្តន៏បំពេញបន្ថែមនៅឆ្នាំខាងមុខបន្តទៀត។
លោកបានតទៀតថា ៖ អាជ្ញាធរខេត្ត ជានិច្ចជាកាលតែងយកចិត្តទុកដាក់ខ្ពស់ ព្រមទាំងមានកិច្ចសហការយ៉ាងជិតស្និទ្ធជាមួយស្ថាប័នសុខាភិបាលក្នុងកិច្ចគាំទ្រនូវរាល់ឧបសគ្គ និងតម្រូវការរបស់មន្ទីរសុខាភិបាលខេត្ត និង កិច្ចការជាច្រើន ដូចជាការងារសន្តិសុខសណ្តាប់ធ្នាប់សាធារណៈ ការចូលរួមអន្តរាគមន៍ទប់ស្កាត់ជម្ងឺឆ្លងរាត្បាតនានា ពិសេសទប់ស្កាត់ជម្ងឺឆ្លងអន្តរជាតិ និងដំណោះស្រាយជាបន្តបន្ទាប់ជាច្រើនជូនបងប្អូនប្រជាពលរដ្ឋ។ ពិសេសធានាបាននូវសន្តិសុខ និងសុវត្ថិភាពជូនគណៈប្រតិភូជាន់ខ្ពស់ជាតិ-អន្តរជាតិ ភ្ញៀវទេសចរ និងប្រជាពលរដ្ឋគ្រប់មជ្ឈដ្ឋានប្រកប ដោយភាពកក់ក្តៅទាំងផ្លូវកាយ និងផ្លូវចិត្ត។ កត្តាទាំងនេះបានជម្រុញឱ្យមានការអភិវឌ្ឍន៍លើគ្រប់វិស័យក្នុងខេត្ត ជាពិសេស វិស័យទេសចរណ៍ ដែលជាសក្តានុពលយ៉ាងខ្លាំងក្លាសម្រាប់ខឿនសេដ្ឋកិច្ចជាតិ គួបផ្សំជាមួយវិស័យសុខាភិបាលធានាបាននូវគុណភាព និងការទទួលខុសត្រូវខ្ពស់ បានធ្វើឱ្យកំណើនសេដ្ឋកិច្ចក្នុងខេត្ត មានការកើនទ្បើងជាលំដាប់ពីមួយឆ្នាំទៅមួយឆ្នាំ។ លោក ពិន ប្រាកដ បានថ្លែងកោតសរសើរដល់ថ្នាក់ដឹកនាំមន្ទីរសុខាភិបាលខេត្ត ដែលបានបង្កលក្ខណៈឱ្យមានការសហការយ៉ាងជិតស្និទ្ធ រវាងអង្គភាពវិស័យសុខាភិបាលជាមួយអង្គការដៃគូអភិវឌ្ឍន៏ មន្ទីរ-អង្គភាពនានា សប្បុរសជន និងអាជ្ញាធរមូលដ្ឋានជុំវិញខេត្ត ពិសេសទំនាក់ទំនងល្អជាមួយប្រទេសសម្ព័ន្ធមិត្ត ដែលបានជម្រុញឱ្យវិស័យសុខាភិបាលក្នុងខេត្តមានការរីកចម្រើនគួរជាទីមោទនៈភាព និងបានថ្លែងអំណរគុណផងដែរដល់ដៃគូរសុខភាព អាជ្ញាធរមូលដ្ឋានគ្រប់លំដាប់ថ្នាក់ និង មន្ត្រីសុខាភិបាលក្នុងខេត្តទាំងអស់ ដែលមានស្មារតីខ្ពស់ក្នុងការជ្រោមជ្រែងលើវិស័យសុខាភិបាលនាពេលកន្លងមកក៍ដូចនៅពេលអនាគត។
ឯកឧត្តម តែ គុយស៊ាង រដ្ឋលេខាធិការក្រសួងសុខាភិបាល មានប្រសាសន៍ថា៖ក្រសួងសុខាភិបាលមិនអាចទទួលបានជោគជ័យទេ ប្រសិនបើគ្មានការចូលរួមសហការយ៉ាងល្អពីរដ្ឋអំណាចអាជ្ញាធរមូលដ្ឋាន និងអង្គការដៃគូអភិវឌ្ឍ ភាគីពាក់ព័ន្ឋក៍ដូចជាថ្នាក់ដឹកនាំ មន្ត្រីរាជការ បំរើឱ្យវិស័យសុខាភិបាល ដែលបានខិតខំប្រឹងប្រែងយកអស់ពីកម្លាំងកាយចិត្ដ រយៈពេលពេញមួយឆ្នាំក្នុងការដឹកនាំ និងអនុវត្ដនូវតួនាទី ភារកិច្ច តាមជំនាញរៀងៗខ្លួនប្រកបដោយការទទួលខុសត្រូវខ្ពស់ រហូតដល់សម្រចបានជោគជ័យជាច្រើនគួរឱ្យកត់សំគាល់ ជាអាថ៌សមិទ្ធផលជាច្រើនដែលមន្ទីរសុខាភិបាលខេត្តសម្រេចបានក្នុងឆ្នាំ២០១៩ ស្របតាមកម្មវិធីនយោបាយ និងយុទ្ធសាស្ដ្រចតុកោណរបស់រាជរដ្ឋាភិបាលកម្ពុជា។ ។ វិស័យសុខាភិបាលគឺជាវិស័យអាទិភាពក្នុងការផ្តល់សេវាបង្ការ ការអប់រំលើកកំពស់សុខភាព ការធ្វើរោគវិនិច្ឆ័យ ការព្យាបាលនិងថែទាំជំងឺ ការស្តារនិតិសម្បទា តាមរយៈការផ្តល់សេវាមានគុណភាព សុវត្ថិភាព និងប្រសិទ្ឋភាព នៅតាមមូលដ្ឋានសុខាភិបាល ពង្រឹងប្រព័ន្ឋបញ្ជូនអ្នកជំងឺ ការផ្តល់សេវាតាមសហគមន៍ ជាពិសេសនៅក្នុងតំបន់ជនបទ ដែលប្រជាជនពិបាកមកទទួលសេវា។ តាមរយៈអង្គសន្នីបាតរយៈពេលពីរថ្ងៃ ឯកឧត្តម បានជំរុញដល់សមាជិក សមាជិកានៃអង្គសន្និបាត នាំគ្នាជជែកពិភាក្សាលើបញ្ហាសេសសល់ ដោយពិនិត្យ និងវាយតម្លៃឱ្យបានស៊ីជម្រៅរាល់សកម្មភាពការងារ ដែលយើងបានអនុវត្ដរយៈពេល១ឆ្នំាកន្លងមក ហើយក៍ត្រូវធ្វើការពិភាក្សា ការផ្តល់អនុសាន៍តាមរយៈអង្គសន្និបាតប្រកបដោយចក្ខុវិស័យ ដើម្បីមានមូលដ្ឋានជាក់លាក់ក្នុងការរៀបចំផែនការ យុទ្ធសាស្ដ្រថ្មីៗ សំរាប់អនុវត្ដបន្ដឱ្យទទួលបានជោគជ័យក្នុងឆ្នាំ២០២០ ។
លោកវេជ្ជបណ្ឌិត ក្រុស សារ៉ាត ប្រធានមន្ទីរសុខភិបាលខេត្តបានឱ្យដឹងថា៖ខេត្តសៀមរាបមានមណ្ឌលសុខភាព៩៣កន្លែង មានមន្ទីរពេទ្យបង្អែកស្រុក៤កន្លែង មន្ទីរពេទ្យខេត្ត១ មន្ទីរពេទ្យកុមារ២កន្លែង មន្ទីរពេទ្យឯកជន៥កន្លែង មន្ទីរពហុព្យាបាលនិងមន្ទីរសម្រាកព្យាបាល៣៤កន្លែងមន្ទីរពេទ្យមាត់ធ្មេញ៦កន្លែង បន្ទប់ពិនិត្យពិគ្រោះជំងឺ១៥៦ បន្ទប់ថែទាំផ្ទៃពោះ៤៤ បន្ទប់ថែទាំជំងឺ១៥១ ឱសថស្ថាន៣២៥ ឱសថបុរាណ៥ កំពុងផ្តល់សេវាតាំងពីទីប្រជុំជនរហូតដល់តំបន់ដាច់ស្រយាល ដែលជាការឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋក្នុងការទទួលយកសេវាសុខភាព។
អត្ថបទ និងរូបថត ៖ យូ វង្ស
