នៅក្នុងសន្និបាតប្រចាំឆ្នាំរបស់រដ្ឋបាលខេត្តសៀមរាប នាព្រឹកថ្ងៃទី០៣ ខែមិនា ឆ្នាំ២០២០នេះ ឯកឧត្តម ទៀ សីហា អភិបាលខេត្តសៀមរាប បានកំណត់យកការដាក់ចេញឲ្យអនុវត្តន៍នូវវិធានការ៧ចំណុច របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ជាកាតព្វកិច្ចចំបងបំផុត បញ្ជូលក្នុងទិសដៅអនុវត្តឆ្នាំ២០២០ ដើម្បីជួយសង្គ្រោះវិស័យទេសចរណ៍នៅក្នុងខេត្ត ខណៈវិបត្តិជំងឺឆ្លង កូវីត-១៩ នៅតែជាកង្វល់ដ៏ធំរបស់ពិភពលោក។
ការដាក់បញ្ចូលវិធានការជួយសង្គ្រោះវិស័យទេសចរណ៍ក្នុងខេត្តសៀមរាប ទៅក្នុងទិសដៅអនុវត្តឆ្នាំ២០២០ របស់រដ្ឋបាលខេត្តនាពេលនេះ បន្ទាប់ពីសម្ដេចតេជោ បានថ្លែងសារពិសេសមួយជូនជនជាតិខ្មែរទាំងអស់ ពាក់ព័ន្ធស្ថានភាពថ្មីៗចុងក្រោយ ក្នុងកិច្ចប្រជុំឧត្តមក្រុមប្រឹក្សា ពិគ្រោះ និងផ្ដល់យោបល់កាលពីថ្ងៃទី ២៤ ខែកុម្ភៈ ឆ្នាំ២០២០ នៅវិមានសន្តិភាព រាជធានីភ្នំពេញ។
វិធានការ៧ចំណុច របស់ប្រមុខរាជរដ្ឋាភិបាល ដែលបានដាក់ចេញ និងកំណត់យកមកអនុវត្តន៍រួមមាន៖
ទី១/ (រដ្ឋទទួលបន្ទុកពន្ធជំនួស) លើកលែង នូវការបង់ពន្ធប្រចាំខែគ្រប់ប្រភេទរបស់សណ្ឋាគារ និងផ្ទះសំណាក់ រយៈពេលបួនខែ ចំពោះសណ្ឋាគារ និងផ្ទះសំណាក់ បានចុះបញ្ជី ជាមួយអគ្គនាយកដ្ឋានពន្ធដារ និងមានសកម្មភាពក្នុងខេត្តសៀមរាប ដោយគិតចាប់ពីខែកុម្ភៈ រហូតដល់ខែឧសភាឆ្នាំ ២០២០។ អាជីវកម្មសណ្ឋាគារ និងផ្ទះសំណាក់នៅតែមានកាតព្វកិច្ចដាក់លិខិតប្រកាសពន្ធអាករ និងប្រើប្រាស់ប្រព័ន្ធអនឡាញ សម្រាប់គ្រប់គ្រងអាករលើតម្លៃបន្ថែម (E-VAT) ជារៀងរាល់ខែក្នុងរយៈពេលលើកលែងពន្ធនេះ។
ព័ត៌មានជាតិ ថ្មីៗ
ទី២/ មិនធ្វើសាវនកម្មពេញលេញសម្រាប់ការិយបរិច្ឆេទឆ្នាំ ២០២០ ចំពោះសហគ្រាសក្នុងវិស័យសណ្ឋាគារ និងផ្ទះសំណាក់ ដែលបានចុះបញ្ជី ជាមួយអគ្គនាយកដ្ឋានពន្ធដារ និងមានសកម្មភាពអាជីវកម្មក្នុងខេត្តសៀមរាប
ទី៣/ ធ្វើវិចារណកម្មថវិកាជាតិឆ្នាំ២០២០ ទាំងចំណាយចរន្ត និងចំណាយវិនិយោគ ពិសេសកាត់បន្ថយការធ្វើដំណើរចូលរួមក្នុងកិច្ចប្រជុំនៅក្រៅប្រទេស ដោយគ្រប់ក្រសួងស្ថាប័នរបស់រាជរដ្ឋាភិបាល និងចូលរួមជំរុញវិស័យទេសចរណ៍ក្នុងស្រុកឲ្យទៅជាចលនាជាតិធំទូលាយ តាមរយៈការជំរុញនូវការធ្វើសិក្ខាសាលា កិច្ចប្រជុំ វគ្គបណ្ដុះបណ្ដាលខ្លីៗ និងកម្មវិធីផ្សេងៗទៀត រៀបចំដោយគ្រប់ក្រសួងស្ថាប័ន របស់រាជរដ្ឋាភិបាល វិស័យឯកជន ស្ថានទូតអង្គការ មិនមែនរដ្ឋាភិបាល ឲ្យទៅធ្វើតាមខេត្តសំខាន់ៗ ពិសេសខេត្តសៀមរាប។
ទី៤/ បង្កើនប្រសិទ្ធភាពនៃការធ្វើដំណើររួមគ្នា តាមផ្លូវគោក ផ្លូវទឹក និងផ្លូវអាកាស ជាពិសេសជាមួយប្រទេសជិតខាងដូចជា បាងកក-សៀមរាប និង ហូជីមិញ-សៀមរាប ពិសេសតាមរយៈរថយន្តក្រុង ឬរថយន្តផ្ទាល់ខ្លួន ដោយធ្វើការសម្របសម្រួលដោះស្រាយប្រកបដោយប្រសិទ្ធភាព នូវបញ្ហាប្រឈមនានា ដែលកើតឡើងនៅកន្លែងទទួលសេវាកម្មឆ្លងកាត់ព្រំដែន និងបញ្ហាពាក់ព័ន្ធប្រទេសទៀត។
ទី៥/ ក្រសួងទេសចរណ៍ និងក្រសួងស្ថាប័នពាក់ព័ន្ធ ត្រូវបើកយុទ្ធនាការរៀបចំសកម្មភាព និងព្រឹត្តិការណ៍ទាក់ទាញផ្សេងៗនៅក្នុងខេត្តសៀមរាប ដូចជា អង្គរសង្ក្រាន្ត ២០២០ ពិធីបុណ្យប្រពៃណី សាសនា កម្មវិធីប្រកួតកីឡា ការប្រគុំតន្ត្រី ការបញ្ចាំងភាពយន្ត និងការបង្ហាញម៉ូដសម្លៀកបំពាក់ជាដើម សម្រាប់ទាក់ទាញភ្ញៀវទេសចរជាតិនិងអន្តរជាតិ។
ទី៦ រក្សាតម្លៃសំបុត្រចូលទស្សនាតំបន់អង្គរឲ្យនៅដដែល ប៉ុន្តែបន្ថែមចំនួនថ្ងៃ សម្រាប់ប្រភេទសំបុត្រនីមួយៗ សំបុត្រសម្រាប់មួយថ្ងៃ អាចចូលមើលបាន២ថ្ងៃ សំបុត្រសម្រាប់បីថ្ងៃ អាចចូលមើលបាន ៧ថ្ងៃ សំបុត្រសម្រាប់ប្រាំពីរថ្ងៃ អាចចូលមើលបាន ១០ ថ្ងៃ ដើម្បីទាក់ទាញទេសចរឲ្យស្នាក់នៅបន្ថែមនៅព្រះរាជាណាចក្រកម្ពុជា។
ទី៧/ ក្រសួងទេសចរណ៍ ត្រូវរៀបចំកម្មវិធីបណ្ដុះបណ្ដាល ដល់កម្មករ-និយោជិត ដែលបាត់បង់ការងារ នៅក្នុងវិស័យទេសចរណ៍ (បុគ្គលិកបម្រើការនៅតាមសណ្ឋាគា រផ្ទះសំណាក់ និងភ្នាក់ងារទេសចរណ៍) តាមរយៈការរៀបចំឲ្យមាននូវវគ្គបណ្ដុះបណ្ដាលនៃមុខវិជ្ជាចំណេះដឹងថ្មី (Re-skilling) ឬការបង្កើនចំនេះដឹងបន្ថែម (Upskilling) និងការផ្ដល់នូវប្រាក់ខែសមរម្យ។
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
