នៅព្រឹកថ្ងៃទី០៥ ខែមិនា ឆ្នាំ២០២០ សម្ដេចពិជ័យសេនា ទៀ បាញ់ អំពាវនាដល់ ប្រព័ន្ធផ្សព្វផ្សាយ និងប្រជាពលរដ្ឋខ្មែរទាំងអស់ សូមកុំធ្វើការចែករំលែក ឬវិភាគ ជុំវិញករណីជំងឺ Covid-19 មុនអ្នកនាំពាក្យរាជរដ្ឋាភិបាល ខណៈសារព័ត៌មានវៀតណាមមួយចំនួន បានចុះផ្សាយកាលពីម្សិលមិញថា មានជនជាតិជប៉ុន រស់នៅក្នុងខេត្តសៀមរាបម្នាក់ បានឆ្លងជំងឺ Covid-19 បន្ទាប់ពីធ្វើដំណើរតាមជើងយន្តហោះពីខេត្តសៀមរាប ឈប់ក្នុងប្រទេសវៀតណាម និងហោះបន្តទៅដល់ប្រទេសជប៉ុន។
តាមការបញ្ជាក់ របស់ ឯកឧត្តម ទៀ សីហា អភិបាលខេត្តសៀមរាប នៅលើហ្វេសប៊ុកផ្លូវការរបស់រដ្ឋបាលខេត្ត ជនជាតិជប៉ុនរូបនេះ ជាអាជីវករ និងបានកំពុងរស់នៅក្នុងខេត្តសៀមរាប មិនមែនជាអ្នកទេសចរឡើយ។ ក្នុងនោះដែរ មន្ត្រីសុខាភិបាលខេត្ត និងភាគីកុងស៊ុលជប៉ុនប្រចាំខេត្តសៀមរាប ក៏បានបញ្ជាក់ថា មុនចេញដំណើរ ការពិនិត្យសុខភាពជនជាតិជប៉ុនរូបនេះ ពុំមានករណីឆ្លងជំងឺ COVID-19នោះទេ។ ជាពិសេស ក្រសួងសុខាភិបាលជប៉ុន ពុំទាន់ប្រកាសព័ត៌មានជាផ្លូវការណាមួយ ថាជនជាតិជប៉ុនរូបនេះមានឆ្លង និងកើតជំងឺ Covid-19 នៅឡើយទេ។
ជុំវិញករណីនេះដែរ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តសៀមរាប លើកឡើងថា ខណៈពេល មន្ត្រីជំនាញសុខាភិបាលកម្ពុជា បាននិងកំពុងស្រាវជ្រាវលើកករណីនេះ ប្រជាពលរដ្ឋ រួមនិងប្រព័ន្ធផ្សព្វផ្សាយ ពុំគួរធ្វើការផ្សព្វផ្សាយ ចែករំលែក ឬវិភាគ មុនអ្នកនាំពាក្យរាជរដ្ឋាភិបាល ឬក្រសួងសុខាភិបាលកម្ពុជានោះទេ។
ព័ត៌មានជាតិ ថ្មីៗ
នាពេលកន្លងមក ក្រសួងសុខាភិបាលប្រទេសម៉ាឡេស៊ី ក៏ធ្លាប់បានដែរបញ្ជាក់ថា ពុំមានករណី អ្នកឆ្លងជំងឺ COVID-19 ពីប្រទេសកម្ពុជាឡើយ បន្ទាប់ពីប្រទេសនេះ ធ្វើការតាមដានយ៉ាងល្អិតល្អន់ ទៅលើសុខភាពអ្នកសង្ស័យថាជំងឺរូបនោះ។
អត្ថបទ និង រូបថត ៖ លោក សេង ផល្លី
