រាល់សំណង់ ដែលសាងសង់ក្នុងឆ្នាំ ២០១៨-២០១៩ មន្ត្រីជំនាញខេត្តសៀមរាប នឹងចុះពិនិត្យឡើងវិញ ក្នុងករណីរកឃើញថា គ្មានលិខិតអនុញ្ញាត ឬគ្មានគុណភាព និងបច្ចេកទេសត្រឹមត្រូវ អាជ្ញាធរខេត្តនឹងធ្វើការរុះរើសំណង់ទាំងនោះ ដើម្បីចៀសវាងហានិភ័យក្នុងពេលកំពុងសាងសង់ នេះបើតាមប្រសាសន៍ ឯកឧត្តម ទៀ សីហា អភិបាលខេត្តសៀមរាប ក្នុងឱកាសបិទបញ្ចប់សន្និបាតបូកសរុបលទ្ធផលការងារឆ្នាំ២០១៩ និងលើទិសដៅឆ្នាំ២០២០ របស់រដ្ឋបាលខេត្តសៀមរាប កាលពីរសៀលថ្ងៃទី០៤ ខែមីនាឆ្នាំ ២០២០។
យន្តការរឹតបន្តឹងលើការងារគ្រប់គ្រងសំណង់នេះ ធ្វើឡើងបន្ទាប់ពី សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ប្រធានក្រុមការងារថ្នាក់ជាតិរបស់រាជរដ្ឋាភិបាលចុះជួយខេត្តសៀមរាប បានផ្ដល់យុទ្ធសាស្ត្រគន្លឺ ៧ចំណុច សម្រាប់ការអភិវឌ្ឍខេត្តសៀមរាប ក្នុងឱកាសបិទបញ្ចប់សន្និបាតបូកសរុបលទ្ធផលការងារឆ្នាំ២០១៩ និងលើទិសដៅឆ្នាំ២០២០។ ដោយក្នុងនោះ ការងារគ្រប់គ្រងសំណង់ គឺជាផ្នែកមួយយ៉ាងសំខាន់ និងចាំបាច់បំផុត ដែលអាជ្ញាធរគ្រប់លំដាប់ថ្នាក់ ត្រូវយកចិត្តទុកដាក់ត្រួតពិនិត្យឲ្យបានហ្មត់ចត់។
ក្នុងឱកាសនោះ សម្តេចពីជ័យសេនា បញ្ជាក់ថា សំណង់ដែលគ្មានគុណភាព វាបង្កឲ្យមានផលផលប៉ះពាល់ដល់សុវត្ថិភាពប្រជាពលរដ្ឋ។ ករណីបាត់រលំសំណង់អាគារនៅខេត្តព្រះសីហនុ ការបាក់រលំអាគារសំណង់សាលាឆាន់នៅខេត្តសៀមរាប និងករណីបាក់រលំសំណង់អគារនៅខេត្តកែប ត្រូវបានបង្កើតឡើងនូវសោកនាដកម្មប្រជាពលរដ្ឋ ដ៏ធ្ងន់ធ្ងរ។ យ៉ាងណាក៏ដោយអាជ្ញាធរខេត្ត ត្រូវពង្រឹងសេវាផ្តល់លិខិតអនុញ្ញាតិសាងសង់ ដែលប្រជាពលរដ្ឋបានស្នើសុំឲ្យបានលឿនបំផុត ឲ្យអស់លទ្ធភាពដែលអាចធ្វើទៅបាន។
មានប្រសាសន៍ក្នុងឱកាសនោះដែរ ឯកឧត្តម ទៀ សីហា លើកឡើងថា ចាប់ពីឆ្នាំ២០២០នេះទៅ អាជ្ញាធរខេត្ត នឹងអនុវត្តន៍វិធានការម៉ឺងម៉ាត់បំផុត សំណង់ណាដែលសាងសង់មុនមានច្បាប់អនុញ្ញាតិ និងត្រូវរុះរើចោលទាំងអស់ បើទោះជាសំណង់នោះសាងសង់បាន៣០% ឬ៥០% ក៏ដោយ។ មូលហេតុដែលអាជ្ញាធរធ្វើបែបនេះ គឺដើម្បីពង្រឹងការអនុវត្តច្បាប់សាងសង់ និងពង្រឹងគុណភាពសំណង់ ធានាសុវត្ថិភាពជូនកម្មករ កម្មការិនី និងប្រជាពលរដ្ឋ។
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
